airplanebooksbriefcase business cogs cross election entertainment fish house law lockmedicalpeopleselfservices socialtax

Kommunerisannuinnaq aalajangersimasunik paasissutissaqarpoq

Kommune toqqaruk
Nalinginnaasumik paasissutissiineq
Umimmanniartoqartarpoq neqaa, amia, qiviui nassuilu pillugit. Uumasoq miluumasoq naasortortuuvoq nalinginnaasumillu 200-300 kg missaanni oqimaatsigilersarluni. Umimmaat nalinginnaasumik Tunumi Kalaallillu Nunaata Avannaani uumasuupput, Ittoqqortoormiinit Ingefield Landimut.

Kalaallit Nunaata Kitaani Kap Athollimi, Svartenhukimi, Naternami, Kangerlussuarmi, Ivittuuni aamma Nanortalimmi umimmaqarfeqarpoq. Umimmaat taaneqartuni kingullerni sumiiffinnilu allani siunnersuinertaqanngitsuni eqqissisimatitaapput.

Kommunerisanni umimmanniarnermut kommunip ileqqoreqqusaanik peqaratarsinnaavoq. Umimmanniartinnak kommunip ileqqoreqqusaasa ilisimaarinissaanut pisussaaffeqarputit.
Piniarnermut periutsit
Umimmaat aallaasersorluni kiisalu pisissimik piniarneqarsinnaapput:
  • Aallaasit inuussutissarsiutigalugu sunngiffimmilu piniartunut minnerpaamik 6,5 x 55 sulloqqortussuseqassapput (aqerloq 6,5 mm-inik diameter-eqassaaq)
  • Aallaasit akiliisitsilluni aallaaniartartunut minnerpaamik 7,62 x 63 sulloqqortussuseqassapput (aqerloq 7,62 mm-inik diameter-eqassaaq)
  • Kalaallit Nunaanni, Danmarkimi nunanilu allani pisissimik piniarsinnaanermut misilitsinnermut angusisimaguit aatsaat pisissimik qarsunillu piniarsinnaavutit. Pisisseq Compound-iussaaq (katitigaalluni / nutaaliaq) umersinnaanermut aalajangersimasumik aaqqissuussimasoq nusutsisinnaaneralu minnerpaamik 28 kg (60 pund) oqimaassuseqarluni. Qarsoq minnerpaamik 34 gram (525 grains) oqimaassuseqassaaq. Qarsutip nuua qisuariaateqarsinnaasumik akulik inerteqqutaavoq

Assartuutinik umimmanniarneq imaluunniit malersuineq inerteqqutaavoq aamma umimmanniarnermi qimmit nassaqqusaanatik. Angallatit motoorillit atorneqarnissaannut kommunini ileqqoreqqusaliat malinneqassapput taakkulu piniariarfimmut aamma piniariarfimmit assartuussinerinnarmut atoqqusaapput. Angallatinik motoorilinnik angalaniaruit, umimmaat uumasut qaninnerpaamik 500 meter-inik ungasitsigissavatit.

Qimuttunik qimmeqarfinni angalallutit qimussersinnaavutit piffinni ukunani 44° W kitaani aamma 66° N avannaani.

Inuussutissarsiutigalugu piniarnermut allagartaqaruit umimmannik ungoorinissamut immikkut ittumik akuersissummik qinnuteqarsinnaavutit. Immikkut ittumik akuersissummik qinnuteqarniaruit Aalisarnermut, Piniarnermut Nunalerinermullu Naalakkersuisoqarfimmut allakkatigut qinnuteqassaatit. Immikkut ittumik akuersissummik qinnuteqaat imaqassaaq:
  • Peqataasussat allattorsimaffiat, kiisalu ungoorinissaq qaqugu sumilu pissanersoq pillugu paasissutissat
  • Ungoorinissamut paasissutissiinermi snescooterit, ATV imaluunniit qulimiguulik atorlugu pissaaq

Malugiuk
Piniarnermi umimmammik uumasooruit piaarnerpaamik toqunnissaanut pisussaaffeqarputit. Umimmak uumasoorsimasaq nassaareqqinneqanngippat toqunneqaranilu tamanna Aalisarnermut, Piniarnermut Nunalerinermullu Naalakkersuisoqarfimmut nalunaarutigissavat imaluunniit Piniarnermut nakkutilliisumut.
Piniarnermut allagartaq aamma akuersissut
Umimmanniarusukkuit:
  • Ikinnerpaamik 16-ileereersimassaatit
  • Piniarnermut allagartamik atorsinnaasumik peqassaatit
  • Umimmannut akuersissummik atorsinnaasumik peqassaatit

Piniarnermut allagartamik qinnuteqarit imaluunniit allagartat nutarsaruk uani

Umimmannut akuersissuteqarnikkut sumiiffinni aalajangersimasuni umimmannik pisaqarnissamut akuersissutaavoq. Akuersissummi takuneqarsinnaapput sumi umimmaallu qanoq amerlatigisut pisarisinnaagitit. Umimmannut akuersissut illit kisivit atortussaavat. Tamanna ima paasineqassaaq, allamut tuneqqusaanngilaq imaluunniit allamut tunniuteqqusaanngilaq. Umimmanniartillutit akuersissutip tigumminissaanut pisussaaffeqarputit.

Umimmannut akuersissummik pissarsineq
Umimmannut akuersissummik pissarsiniaruit najukkanni innuttaasunut sullissivimmut imaluunniit nunaqarfimmi kommunip allaffianut saaffiginnissaatit.

Ukiaanerani umimmanniarnissamut umimmannut akuersissummik pissarsiniaruit piniarnermut allagartat kingusinnerpaamik 1. maj akilereersimassavat. Inatsit naapertorlugu 1. maj sioqqullugu piniarnermut allagartap atornissaanut piumasaqaammit immikkut ittumik akuersissuteqartoqarnissaa periarfissaavoq. Tamannali taamaallaat aqutsiveqarfitsigut pissutsit malillugit pissalluni. Ukioq piniarfiusumi 2016/2017-imi piumasaqaammit immikkut ittummik akuersisoqanngilaq.
Nalunaaruteqartarneq
Umimmattatit nalunaarutigissavatit. Taamaaliornissamut periutsit marluupput:
  • NemID-mik atuisuuguit pisatit Imminut sullinneq atorlugu nittartakkatigut nalunaarutigisinnaavatit
  • NemID-mik atuisuunngikkuit pisatit PINIARNEQ quppersagaq atorlugu ukiumut immersuiffissatigut nalunaarsorsinnaavatit, quppersagaq piniarnermut allagartamik tunisinninni ilanngullugu tunniunneqartarpoq nalunaarsukkallu uunga nassiunneqassapput fax-ikkut: (+299) 34 53 40, imaluunniit e-mail-ikkut: jagtbeviser@nanoq.gl

Pisatittaaq nalunaaruteqarnermi immikkut ittumik immersuiffikkut / immikkut nalunaaruteqarnissami immersuiffissakkut, umimmannut akuersissutivit tunuatigut nalunaarutigisassavatit. Piffissap piniarfiusup naanerani kingusinnerpaamik ullut 14-it qaangiutsinnagit akuersissutit immersugassartaa immersorsimasoq innuttaasunut sullissivimmut imaluunniit nunaqarfimmi kommunip allaffianut utertissavat.

Malugiuk
Ukiup tulliani piniarnermut allagartamik piniaruit, pisatit nalunaarutigissavatit – aamma pisaqarsimanngikkaluaruilluunniit.
Pisassiissutit
Umimmattassat aalajangersarneqartarput agguataarneqartarlutillu imatut:

Naalakkersuisut imaluunniit Piniarnermut Naalakkersuisup umimmattassat annertussusaat aamma tamanut tusarniaareernerup kingorna nuna tamakkerlugu agguaanerit aalajangertarpai.

Tamatuma kingorna najukkani KNAPP-t suleqatigalugit nunap immikkoortuini pisassiissutit kommuninit agguataarneqartarput.

Nunap immikkoortuini agguaassineq makitsinikkut imaluunniit qinnuteqarnikkut pisarpoq.
Piniarnermi nunat immikkoortui piffissallu piniarfiusinnaasut
Umimmanniarnissamut piffissaliussat piniarfinni assigiinngitsuupput. Taamaakkaluartoq piniarfinni tamani atuuppoq norrereernerup kingorna - pisarneq malillugu maajimi juunimilu pisartoq – aatsaat umimmanniartoqalernera.

Piniarnermi nunat immikkoortui takusinnaavatit uani www.nunagis.gl.

Ukiaanerani ukiuuneranilu inuussutissarsiutigalugu, sunngiffimmi aamma tammajuitsussanik umimmanniarnissamut piffissaliussat piniarfinni amerlanerpaani imaapput:
  • Inuussutissarsiutigalugu umimmanniarneq: 1. august 2016 – 15. oktober 2016
  • Sunngiffimmi umimmanniarneq: 1. august 2016 – 15. oktober 2016
  • Naternamiit avannamullu piniarfinni tamani tammajuitsussanik umimmanniarneq Ittoqqortoormiit ilanngullugit: 1. juli – 31. oktober 2016 aamma 15. februar – 10. april 2017
  • Piniarfik Sisimiut-Kangerlussuaq-mi tammajuitsussanik umimmanniarneq: 1. august 2016 – 31. oktober 2016 aamma 11. marts – 10. april 2017
  • Ivittuuni tammajuitsussanik umimmanniarneq: 1. juli 2016 – 15. oktober 2016

Aqutsiveqarfik Ivittuut
Inuussutissarsiutigalugu umimmanniarneq Arsuk: 1. august 2016 – 15. december 2016.

Inuussutissarsiutigalugu umimmanniarneq Nuuk/Paamiut: 1. oktober 2016 – 15. december 2016.

Inuussutissarsiutigalugu umimmanniarneq Kommune Kujalleq: 1. august 2016 – 15. oktober 2016.

Sunngiffimmi umimmanniarneq Kommuneqarfik Sermersooq: 1. august 2016 – 15. december 2016.

Immikkut suiaassusilikkanik umimmanniarneq ingerlateqqinneqarpoq tamannalu pillugu akuersissutini allaqqasarpoq arnavissamut imaluunniit angutivissamut atuunnersoq utoqqaassusaalu aamma allaqqalluni.

Kangerlussuup eqqaani Aqutsiveqarfik Maniitsoq – Ukiuunerani umimmanniarneq
Inuussutissarsiutigalugu umimmanniarneq Piniarfik 1 aamma 3: 10. januar 2017 – 10 marts 2017.

Inuussutissarsiutigalugu umimmanniarneq Piniarfik 2: 22. januar 2017 – 31. januar 2017.

Sunngiffimmi umimmanniarneq Piniarfik 1: 10. januar 2017 – 10. marts 2017.

Piniarfik 2-mi inuussutissarsiutigalugu umimmanniarnissamut umimmattassiissutit 400-iupput Piniarfimmilu 3-mi inuussutissarsiutigalugu umimmanniarnissamut umimmattassiissutit 800-iullutik. Tamanna pillugu inuussutissarsiutigalugu piniartut Qeqqata Kommunianeersut kisimik Piniarfik 2-mi aamma Piniarfik 3-mi ukiuunerani umimmanniarnissamut akuersissutinik pisinnaapput.

Aqutsiveqarfik Qaanaaq
Inuussutissarsiutigalugu sunngifffimmilu umimmanniarneq Nuna Inglefield: 1. august 2016 – 30. april 2017.

Inuussutissarsiutigalugu sunngiffimmilu umimmanniarneq Kangaarsuk: 1. august 2016 – 30. april 2017.

Aqutsiveqarfik Ittoqqortoormiit – Ukiuunerani umimmanniarneq
Inuussutissarsiutigalugu sunngiffimmilu umimmanniarneq: 1. marts 2017 – 31. marts 2017.
Allaaserisat attuumassutillit
Aalisarnermut Piniarnermullu Naalakkersuisoqarfik
Imaneq 1A, 701
Postboks 269
3900 Nuuk

Oqarasuaat: (+299) 34 50 00
Fax: (+299) 34 63 55
E-mail: apnn@nanoq.gl
Nittartagaq: www.naalakkersuisut.gl