Atuarfiup siulersuisui

Atuarfimmi siulersuisut suleqatigiiupput atuisunit inuttalersukkat. Tassa ilaasortat atuisuupput, taakkualu atuisoqatigiit akornannit qinerneqartarput.
Atuarfiup siulersuisui pineqartillugit imaappoq, ilaasortat atuarfimmi angajoqqaajusunit angajoqqaatut oqartussaassusilinnit, ilinniartitsisunit atuartunillu qinerneqartarlutik.

Atuarfiup siulersuisuini ilaasortaasut angajoqqaaqatiminnit angajoqqaatullu oqartussaassusilinnit ukiuni sisamani atuuttussanngorlugit qinerneqartarput.
Atuarfiup siulersuisuini ilinniartitsisut ilaasortaasut ilinniartitsisunit ilinniartitsisullu akornanni ukiukkaartumik qinerneqartarput.
Atuarfiup siulersuisuini atuartut sinniisaat atuartunit atuartullu akornanni ukiukkaartumik qinerneqartarput.


Malugiuk
Najukkami kommunalbestyrelsit aalajangertarpaat atuarfiup siulersuisuini ataasiakkaani angajoqqaat qassit ilaasortaassanersut. Ilaasortat pingasuusarput imaluunniit tallimat.
Atuarfinni 7. klasse tikiinnarlugu atuartulinni atuarfiup siulersuisuini atuartunik sinniisoqarnissaa piumasaqaataanngilaq.

Atuarfiup siulersuisuisa ilaatigut atuarfimmi nakkutilliineq suliassaraat. Tassa ilaatigut makkua akuersissutigisassaraat:

• Atuarfimmi malittarisassat
• Atuarfimmi atuartitsissutissatut pilersaarusiat
• Atuarfiup siulersuisuisa, aningaasatigut sinaakkutissat atuarfimmut atuuttussatut aalajangersarneqarsimasut iluanni, atuarfiup aningaasartuutissatut isertitassatullu missingersersuutai akuersissutigisassavaat
• Atuarfimmi atortut atuartitsinermut atortussat

Tamatuma saniatigut atuarfiup siulersuisuisa atuarfimmi aqutsisoq qinnuigisinnaavaa, atuarfimmi ulluinnarni pissutsit assigiinngitsut pillugit paasissutisseeqqullugu.

Inatsisit maleruagassallu aalajangersimasut malillugit meeqqat atuarfiat atuarfimmi siulersuisunit aqutsivigineqassaaq. Inatsisit maleruagassallu taakku taaneqartarput politikkikkut sinaakkusiussat. Meeqqat atuarfiat pillugu pingaarnertut inatsisit maleruagassallu Namminersorlutik Oqartussanit akuersissutigineqartarput. Sinaakkusiussat taakku atorlugit meeqqat atuarfiini maleruagassiat atortussallu kommunalbestyrelsimit suliarineqartarput, taamaalillutik Namminersorlutik Oqartussat politikkikkut sinaakkusiat atuutsitaasa iluanni meeqqat atuarfiat inerisarlugulu aqutsivigisinnaavaat.
Assersuutigalugu atuartitsinermi maleruagassiat tunngavigalugit atuarfimmi siulersuisut:

• Atuarfiup politikkikkut anguniagassaanik sanaassinnaavaat, atuarfiit ataasiakkaat ingerlanneqarneranni pingaarnertut anguniarneqartussat
• Ilinniartitsinermi anguniagassat sinaakkutissallu suliarisinnaavaat, assersuutigalugu ilinniartitsinerup ingerlannissaanut akunnerit ilinniartitsisullu naammattut pigineqarnissaat
• Ilinniartitsinissamut pilersaarutit akuerineqarnerat taamaaliornikkullu atuartitsissutaasussat sulisoqarnissaat qulakkeerlugu
• Atuarfiup angerlarsimaffiullu akornanni suleqatigiinneq pillugu ilitsersuineq

Politikkikkut sinaakkusiussat qulakkiissavaat atuartut pitsaanerpaamik atuartinneqarnissaannut aningaasat sulisullu naammattut pigineqarnissaat. Atuartut ilinniartitaanermik pisinnaatitaaffigisaminnik pissarsinissaat sinaakkusiussat taakku siunertaraat.