Nuttarnerulersitsiniarluni tapiissutit

Kalaallit Nunaanni inoqarfiit inissisimanerisa pisariaqalersippaat, sulisartut tamarmik sumi inunngorsimaneq peroriartorsimanerlu apeqqutaatinnagit suliffissaqarfiusunut qinnuteqarsinnaanermut assigiimmik periarfissaqarnissaq qulakkeerneqassasoq.

Ilinnut sulisussamut, atorfininnermut isumaqatigiissummi pingaartumik sulisussanut ilinniagaqarsimanngitsunut atugassarititaasartut, atorfininnermi angalaneq aamma pequtit nassiunnissaat ilaatinneqarsimanngippata, nuttarnerulersitsiniarluni tapiissutit ikiorsiissutaassapput.

Nuttarnerulersitsiniarluni tapiissutinik pisinnaanissamut naammassisariaqarpatit:

• 18-ileereernissaq
• Majoriami suliffissaaleqisutut nalunaarsortinnissaq
  
  

Suliffissaq najukkami najugaqartunik inuttassarsineqarsinnaassanngilaq. Atorfimmut naleqquttunik piginnaasalinnik najukkami suliffissaaleqisoqarpat, Majoriamit pineqartut innersuunneqassapput.

Piumasaqaatit – ukiup ilaani suliffeqarneq

• 18-ileereernissaq
• Majoriami suliffissaaleqisutut minnerpaamik qaammat ataaseq nalunaarsortinnissaq
• Illoqarfimmi nunaqarfimmiluunniit allami utaqqiisaasumik sulinissamik neqeroorfigineqarneq, suliassaq najukkami najugalinnit suliarineqarsinnaanngippat (sivikinnerpaamik qaammatini pingasuni). Majoriaq nuuffigisassamiittoq aperineqassaaq
• Angalanissaq sioqqullugu Majoriami nuttarnerulersitsiniarluni tapiissutinik qinnuteqaqqaassaatit
• Illoqarfimmi nuuffigisassarni ilinnut inissamik / unnuiffissamik peqartoq uppernarsassavat
• Ukiup ilaani sulinissaq sivikinnerpaamik qaammatinik pingasunik sivisussuseqassaaq

 

Atorfininnermut atatillugu angalaneq
Ilinnut, aapparisannut aamma meeqqanut 18-it inorlugit ukiulinnut angerlarsimaffimmi najugaqartunut atorfininnermut atatillugu angalaneq tamakkiisumik matussusertissinnaavat. Atorfininnermi angalaneq angerlarsimaffiulertussamut sapinngisamik angallatit tamanit atorneqartartut akikinnerpaat atorlugit pissaaq. Assartuusseriaatsimik allamik atuissaguit, aningaasartuutit uppernarsarneqartut taarserneqassapput, taamaattoq angallatinut tamanit atorneqartartunut billetsip akikinnerpaasup akia qaangerneqassanngilaq.

Pequtit nassiunnissaat
Pequtit nassiunnissaannut makkua akilertissinnaavatit:

• Kisermaat 15 m3 angullugu akiliunneqartarput, nalinginnaasumik imarsiornermut assartuussinermullu sillimmasiisoqartarluni, 182.500 koruunit angullugit sillimmasiissutitaqartoq
• Aappariit 30 m3 angullugu akiliunneqartarput, nalinginnaasumik imarsiornermut assartuussinermullu sillimmasiisoqartarluni, 364.800 koruunit angullugit sillimmasiissutitaqartoq
• Meeqqat tamarmik immikkut 5 m3 angullugu pequtit nassiunnissaannut akiliunneqartarput, nalinginnaasumik imarsiornermut assartuussinermullu sillimmasiisoqartarluni, 60.800 koruunit angullugit sillimmasiissutitaqartoq

Malugiuk
Pequtit nassiunnissaannut akuersissuteqartoqartillugu, kisianni atorfininnermut atatillugu angalanerup kinguninngua pequtit umiarsuarmik assartorneqarsinnaanngippata, nassatat oqimaassusaat inummut ataatsimut 10 kg angullugit sippuinermut akiliussisoqarsinnaavoq, tamatumunnga aningaasartuutit uppernarsarneqarsinnaappata.

Pequtit nassiunneranni ilaatinneqarput poortuineq, poortuusersuutit, assartuineq aamma pequtinik puuiaaneq. Pequtinik nassiussinermi nuunnermut atatillugu sullinneqartarnerit nalinginnaasut saniatigut pequtinik toqqorsivimmiititsineq ilaatinneqanngilaq.

Aningaasaliissutit aningaasanut inatsimmi nuttarnerulersitsiniarluni tapiissutinut atugassatut akuersissutigineqartut, Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoqarfimmit qaangerneqartussaanngillat. Tamanna isumaqarpoq, suli atorneqarsinnaasunik aningaasaliissuteqarpat, qinnuteqaatit aatsaat akuersissutigineqarsinnaapput.

Pequtit nassiunneqarnissaannut akuersissuteqarnermut aalajangersimasumik nuuttussat taamaallaat ilaatinneqarput.

Illit nammineerlutit killilersorneqanngitsumik suliffissarsiornissamut periarfissaqarputit. Illoqarfimmi imaluunniit nunaqarfimmi allami suliffissarsiguit, atorfininnermut atatillugu angalanissaq aamma pequtinik nassiussinissaq matussusertinniarlugit qinnuteqarsinnaavutit.
Nuttarnerulersitsiniarluni tapiissutit pillugit qinnuteqarnissamut immersugassaq immersussavat, taannalu najukkami Majoriamut tunniullugu.

Nuttarnerulersitsiniarluni tapiissutinik qinnuteqarit

Majoriap periarfissanik misissuinissamut aamma immersugassamik immersuinissamut ikiorsinnaavaatit. Majoriap suliffimmut qinnuteqaativit suliarinissaanut aamma ikiorsinnaavaatit.

Makkua nassarnissaat isumagissavat:

• Sulisitsisoriligassami aalajangersimasumik atorfininnissamut uppernarsaat
• Sulisitsisoriligassap angalanermut aamma pequtit nassiunnissaannut aningaasartuutit akilertussaannginneranut uppernarsaat
• Pequtit assartorneqarnissaannut tunngatillugu aningaasartuutit annertussusaannut neqeroorut

 

Illit sulisitsisutut Majoriaq aqqutigalugu sulisussarsioruit, kisianni illoqarfimmi piukkunnartunik nassaarsinnaanak, sulisussarsiornissamut allagarsiussassamik suliaqarsinnaavutit Majoriamit Qitiusumik Ingerlatsivinnut allanut nassiussorneqartussamik.

Kommuniniit allaniit qinnuteqaatinik takkuttoqarpat, Majoriamit attavigineqassaatit.

Piukkunnaatilimmik qinnuteqartumik nassaartoqarpat, suliffissarsiortup qinnuteqarnissaa atorfininnissaalu pillugit isumaqatigiissusiorsinnaavusi, kisianni illit sulisitsisutut angalanissamut pequtillu nassiunnissaannut akiliissanngitsutit. Tamatuma saniatigut akissarsiat atorfinitsitaanermullu atugassarititaasut isumaqatigiissusiorfigineqassapput, ineqartitaanissarlu qulakkeerneqassalluni.

Majoriap nuttarnerulersitsiniarluni tapiissutit pillugit qinnuteqarnermi immersugassaq immersugaq Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoqarfimmut nassiutissavaa.

Qinnuteqartoq nuttarnerulersitsiniarluni tapiissutinik pisinnaatitaanersoq Naalakkersuisoqarfiup misissussavaa. Qinnuteqartup piumasaqaatit naammassippagit, ikiorsiinissaq akuersissutigineqassaaq aamma Majoriaq nalunaarfigineqarluni nuunnissaq sulissutigalugu aallartittoqarsinnaasoq.

Majoriap nuunnermut atatillugu aningaasartuutit akilissavai aamma akiligassiissut ataatsimoortoq Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoqarfimmut nassiutissallugu.

Naalakkersuisoqarfiup aningaasartuutit innuttaasup nuunneranut attuumassuteqartut kommunimut utertillugit akilissavai.

Naalakkersuisoqarfiup uppernarsaatit pisariaqartut tigoreersimappagit, akissutissap nassiunneqarnissaanut ullut suliffiusut tallimaniit qulinut sivisussuseqartarpoq.

Qinnuteqaatinnut tunngatillugu allanngortoqassappat, kommunerisannut attaveqassaatit. Allannguutit tassaasinnaapput:

• Atorfininngitsutit, taamaattumillu suliartorfissaraluannut aallanngitsoorlutit
• Pequtit nassiunnissaannut aningaasartuutit qinnutigisannit annikinnerusut
• Akuersissutigineqartut saniatigut immikkut aningaasartuutissaqalertutit
  
  

Nikingassutaasoq pillugu kommuni Naalakkersuisoqarfimmut qinnuteqaammik nassiussissaaq, tassanilu akuersissutigineqarsinnaanersoq nalilerneqassalluni.

Nuttarnerulersitsiniarluni tapiissutit pillugit Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoqarfimmit aalajangerneqartut pillugit naammagittaalliuteqarnissamut periarfissaqanngilaq.