Nuttarnerulersitsiniarluni tapiissutit

Naliginnaasumik paasissutissiineq
Sulisartut tamarmik sumi inunngorsimaneq peroriartorsimanerlu apeqqutaatinnagit suliffissaqarfiusunut qinnuteqarsinnaanissamut assigiimmik periarfissaqarnissaasa qulakkeerneqarnissaa, Kalaallit Nunaanni nunami sumiiffiit taamannerisa pisariaqalersippaa.

Nuttarnerulersitsiniarluni tapiissutit naapertorlugit atorfininnissamut isumaqatigiissummi, pingaartumik sulisartunut ilinniagaqarsimanngitsunut atugassaritinneqartartunut, atorfininnermi angalaneq aamma pequtit nassiunnissaat ilaatinneqarsimanngippat, ilinnut sulinermik inuussutissarsiuteqartumut ikiorsiissutaassapput.

Piumasaqaatit
Nuttarnerulersitsiniarluni tapiissutinik pisinnaanissamut tunngavissarititaasut arlallit naammassineqarsimasussaapput:

• 18-ileereersimassaatit
• Suliffeqanngitsutut Majoriami nalunaarsimassaatit
• Angalanissaq sioqqullugu Majoriami nuttarnerulersitsiniarluni tapiissutinik qinnuteqaqqaassuutit
• Nuuffigisassarni inissamik pissarsereersimassaatit

Piumasaqaatit – ukiup ilaani suliffeqarneq

• 18-ileereersimassaatit
• Suliffeqanngitsutut Majoriami nalunaarsimassaatit, minnerpaamik qaammat ataaseq
• Illoqarfimmi nunaqarfimmiluunniit allami utaqqiisaasumik sulinissamik neqeroortigineqarsimassaatit, taakkunani suliassaq taakkunani najugalinnit suliarineqarsinnaanngippat (sivikinnerpaamik qaammatini pingasuni). Majoriaqarfik nuuffigisamiittoq aperineqassaaq
• Angalanissaq sioqqullugu Majoriami nuttarnerulersitsiniarluni tapiissutinik qinnuteqaqqaassuutit
• Illoqarfimmi / nunaqarfimmi nuuffigigallangassarni inigisassamik / unnuiffissamik peqartoq uppernarsassavat
• Ukiup ilaani sulinissaq sivikinnerpaamik qaammatinik pingasunik sivisussuseqartoq uppernarsarneqassaaq

Atorfininnermut atatillugu angalaneq
Ilinnut, katissimaguit aappannut aamma qitornannut 18-iliisimanngitsunut angerlarsimaffinni najugaqartunut atorfininnermut atatillugu angalaneq tamakkiisumik matussusertissinnaavat. Atorfininnermi angalaneq angerlarsimaffiulersussamut sapinngisamik angallatit tamanit atorneqartartut akikinnerpaat atorlugit pissaaq. Allatut assartuusseriaatsimik atuissaguit, aningaasartuutit uppernarsarneqartut akilerneqassapput, taamaattoq angallatinut tamanit atorneqartartunut billetsip akikinnerpaap akia sinnerneqassanngilaq.

Pequtit nassiunnissaat
Pequtit nassiunnissaannut makkua akilertissinnaavatit:

• Kisermaat 15m3 tikillugu akiliunneqartarput, nalinginnaasumik imarsiornermut assartuussinermullu sillimmasiisoqartarpoq, 182.500 koruunit tikillugit sillimmasiissutitaqartumik
• Aappariit 30 m3 tikillugu akiliunneqartarput, nalinginnaasumik imarsiornermut assartuussinermullu sillimmasiisoqartarpoq, 364.800 koruunit tikillugit sillimmsiissutitaqartumik
• Qitornat ataasiakkaat tamarmik immikkut 5m3 tikillugu pequtit nassiunnissaannut akiliutsinneqartarput, nalinginnaasumik imarsiornermut assartuussinermullu sillimmasiisoqartarpoq, 60.800 koruunit tikillugit sillimmasiissuteqartartumik

Malugiuk
Pequtit nassiunnissaannut akuersissuteqartoqaraangat, atorfininnermulli atatillugu angalanermut ingerlaannaq ataqatigiissillugu pequtit umiarsuarmik assartorneqarsinnaanngippata, tamatumunnga peqqissaartumik uppernarsaasiinikkut inummut ataatsimut 10 kg tikillugit nassatat amerlanaarlugit nassarsinnaanissamut akiliussisoqarsinnaavoq.

Pequtit nassiunneranni ilaatinneqarput poortuineq, poortuusersuutit, assartuineq aamma pequtinik puuiaaneq. Pequtinik nassiussinermi nuunnermut atatillugu sullinneqartarnerit nalinginnaasut saniatigut pequtinik toqqorsivimmiititsineq ilaatinneqanngilaq.

Aningaasassat aningaasanut inatsimmi nuttarnerulersitsiniarluni tapiissutinut atugassatut akuersissutigineqartut, Isumaginninnermut, Suliffeqarnermut, Ilaqutariinnut Nunamullu Namminermut Naalakkersuisoqarfimmit qaangerneqartussaanngillat. Tamannalu ima paasineqassaaq aningaasanik atorneqarsinnaasunik suli peqarpat, qinnuteqaatit taamaallaat akuersissutigineqarsinnaapput.

Pequtit nassiunneqarnissaat taamaallaat aaliagersimasumik nuuttussanut atuuppoq.

Illit nammineerlutit killilersorneqanngitsumik suliffissarsiornissamut periarfissaqarputit. Illoqarfimmi imaluunniit nunaqarfimmi allami suliffissarsiguit, atorfininnermut atatillugu angalanissat aamma pequtinik nassiussinissaq matussusertinniarlugu qinnuteqarsinnaavutit.

Nuttarnerulersitsiniarluni tapiissutinik qinnuteqarnissaq pillugu immersugassaq immersussavat, taannalu najukkanni Majoriamut tunniutissavat.

Nuttarnerulersitsiniarluni aningaasaliissutinik qinnuteqaat

Majoriap periarfissanik misissuinissannut aamma immersugassap immersornissaanut ikiorsinnaavaatit. Aamma Majoriap suliffimmut qinnuteqaativit suliarinissaanut ikiorsinnaavaatit.

Makkua nassarnissaat isumagissavat:

• Sulisitsisoriligassanni aalajangersimasumik atorfinissimanermut uppernarsaat
• Sulisitsisoriligassavit angalanermut aamma pequtit nassiunnissaannut aningaasartuutit akilertussaanngikkai uppernarsaat
• Pequtit assartorneqarnissaannut tunngatillugu aningaasartuutit annertussusaannut neqeroorut

Illit sulisitsisutut Majoriaq aqqutigalugu sulisussarsioruit, illoqarfimmili piukkunnartunik nassaartoqarani, sulisussarsiornissamut allagarsiussassamik suliaqarsinnaavutit Majoriaqarfinnut allanut nassiussorneqartussamik.

Kommuninit allanit qinnuteqaatinik takkuttoqarpat, Majoriamit attavigineqassaatit.

Piukkunnaatilimmik qinnuteqartumik nassaartoqarpat, suliffissarsiortup qinnuteqarnissaa atorfittaarnissaalu pillugit isumaqatigiissusiorsinnaavusi, taamaattorli illit sulisitsisutut angalanissaanut pequtaasalu nassiunnissaannut akiliissinnaanat uppernarsaasiillutit. Tamatuma saniatigut aningaasarsiassat atorfinitsitaanermullu atugassarititaasut isumaqatigiissusiorfigineqassapput, aammalu ineqartitaanissaq uppernarsarneqassooq.

Majoriap nuttarnerulersitsiniarluni tapiissutit pillugit qinnuteqarnermi immersugassaq immersoriigaq Isumaginninnermut, Suliffeqarnermut, Ilaqutariinnut Nunamullu Namminermut Naalakkersuisoqarfimmut nassiutissavaa.

Qinnuteqartoq nuttarnerulersitsiniarluni tapiissutinik pisinnaatitaanersoq Naalakkersuisoqarfiup misissussavaa. Qinnuteqartup piumasaqaatit malissimappagit, ikiorsiinissaq akuersissutigineqassaaq aammalu Majoriaq nalunaarfigineqassaaq nuunnissaq sulissutigalugu aallartittoqarsinnaasoq.

Majoriap nuunnermut atatillugu aningaasartuutit akilissavai aammalu akiligassiissut ataatsimoortoq Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoqarfimmut nassiutissallugu.

Naalakkersuisoqarfiup aningaasartuutit kommunimut innuttaasup nuunneranut attuumassuteqartut utertillugit akilissavai.

Naalakkersuisoqarfiup uppernarsaatit pisariaqartut tigoreersimappagit, akissutissap nassiunneqarnissaanut ullut suliffiusut tallimaniit qulinut sivisussuseqartarpoq.

Qinnuteqaatinnut tunngatillugu allanngortoqassappat, sumiiffinni Majoriamut attaveqassaatit. Allannguutit tassaasinnaapput:

• Atorfininngitsutit, taamaattumillu suliartorfissaraluannut aallanngitsoorlutit
• Pequtit nassiunnissaannut aningaasartuutit qinnutigisannit annikinnerupput
• Aningaasaliissutigineqartut saniatigut immikkut aningaasartuutissaqalerputit

Nikingassutaasoq pillugu Majoriaq Naalakkersuisoqarfimmut qinnuteqaasiussaaq, tassanilu akuersissutigineqassanersoq nalilerneqassaaq.

Nuttarnerulersitsiniarluni tapiissutit pillugit Isumaginninnermut, Suliffeqarnermut, Ilaqutariinnut Nunamullu Namminermut Naalakkersuisoqarfimmit aalajangiunneqartut naammagittaalliutigineqarnissaannut periarfissaanngilaq.