Piginnaanngorsaqqinneq aamma ilinniagaqarneq
Suliffissaaleqisuuguit suliffissaaleqisutut nalunaarsorsimassaatit. Taamatut nalunaarsugaasimatillutit pisinnaatitaaffigissavat ilinnut iliuusissatut pilersaarusiortoqarnissaa, tassani nassuiaatigineqassammat sulilersinnaanissannut periarfissatit qanoq pitsanngorsarsinnaassaneritit.
Assersuutigalugu imaassinnaavoq piginnaanngorsaqqittariaqartutit imaluunniit qaavatigut ilinniagaqaqqittariaqartutit.
Najukkanni Majoriami ilinniagaqarnissamut periarfissatit, ilinnialernissamut piumasaqaatit qinnuteqarnissamullu killissarititaasut pillugit ilitsersorneqarsinnaavutit.
Meeqqat atuarfianni atuartinneqarneq taannaavoq ilinniagaqaqqinnissamut sumulluunniit tunngaviusartoq. Meeqqat atuarfianni soraarummeersimanngikkuit (FA) taanna Majoriakkut ingerlassinnaavat, tassuunakkullu ilinniagaqalersinnaanissamut piginnaanngorsarlutit.
18-inik sinnerlugilluunniit ukioqaruit piginnaanngorsaqqinnissamut piffissami sivikitsumi pikkorissartitsisarnernut qinnuteqarsinnaavutit. Pikkorissartitsinernut taamaattunut ikiorserneqarnissamik qinnuteqartoqarsinnaavoq PKU-mut aamma AMA-mut aningaasaliissutaasartut aqqutigalugit. PKU-mut annerusumik inunnut 25-it sinnerlugit ukiulinnut piukkussaavoq. AMA-mut tamanut 18-ileereersimasunut.
Meeqqat atuarfianni soraarummeerneq (FA) naammassisimagukku, inuusuttunut ilinniartitaanernut qinnuteqarnissamut periarfissaqassaatit. Inuusuttunullu ilinniartitaaneq naammassereerukku ingerlaqqiffiusumik ilinniagaqarnissamut qinnuteqarsinnaavutit.
30-it sinnerlugit ukioqaruit periarfissaqarputit inersimasutut lærlingitut qinnuteqarnissamut, assersuutigalugu sanasunngorniaruit assigisaanilluunniit.
Suliffeerunnermut ikiorsiissutinik pisartagaqarsinnaanissamut piumasaqaataavoq suliffeqarnermut piareersimasuunissat. Taamaattumik suliffeerunnermut ikiorsiissutinik nalinginnaasumik pisartagaqarsinnaanngilatit ilinniagaqartuuguit. Akerlianik suliffeerunnermut ikiorsiissutisinak ilinniagaqarnersiutisisinnaavutit.
Suliffimmik misiliinerpit nalaani sulinerit atorunnaarsinneqassappat, inuussutissarsiornermut ilinniartitaanermik ingerlatsitsillutit, suliffeerunnermut ikiorsiissutinik qinnuteqarsinnaavutit. Suliffimmik misiliinerpit nalaani sulinerup atorunnaarsinneqarnerata nalaani taamaallaat suliffeerunnermut ikiorsiissutinik pisartagaqarsinnaavutit.
PKU-mi aamma AMA-mi pikkorissarnerit ilinniagaqarnertut isigineqarneq ajorput. Taamaattumik pikkorissartitsinerni taamaattuni peqataaninni suliffeqanngikkallarnermi ikiorsiissutinik pisartagaqarsinnaavutit.