Meeqqap napparsimmavimmut uninnera – Sulinnginneq

Meeqqat ima napparsimatigilerpata napparsimmavimmut unittariaqarlutik, angajoqqaat amerlasuut qitornartik ilagerusuttarpaat.

Taama pisoqartillugu aningaasarsiassannit annaasaqaataanngitsumik sulinngissinnaatitaavutit. Tamatumunnga maleruaqqusanut erseqqinnerusunut apeqqutaavoq isumaqatigiissut sorleq malillugu atorfinitsinneqarsimanersutit. Matuma kinguliani allassimatut AK-p ataani atorfilinnut maleruaqqusat aallaavigalugit allataapput.

Aningaasarsianut annaasaqaataanngitsumik sulinnginneq
Tjenestemand-i AK malillugu atorfeqartoq ullut 12-it angullugit aningaasarsiassaminut annaasaqaataanngitsumik sulinngissinnaatitaavoq

• Meeqqap illoqarfigisami taassumaluunniit avataani napparsimmavimmut uninnerani
• Angalanermi ingiallortaaguni
• Aammalu meeqqap napparsimmavimmut uninnissamini peqqinnissaqarfiup akiligaanik ingiallorteqarluni angalanerani

Pisuni immikkut illuinnartuni aammalu nakorsamit uppernarsaateqarluni sulinnginneq ullut tallimat angullugit sivitsorneqarsinnaavoq.

Piumasaqaatit
Meeraq 16-it sinnerlugit ukioqassanngilaq.

Aningaasarsiassanut annaasaqaataanngitsumik sulinnginniaruit qitornavit napparsimmavimmut uninnissaa uppernarsarsinnaassavat.

Uppernarsaat napparsimmavimmit pissarsiarissavat. Uppernarsaat pissarsiarigukku sulisitsisunnut takutissavat, tamatuma kingorna sulisitsisuit aningaasarsiaqarlutit sulinngissinnaatissavaatit.

Qitornavit napparsimmavimmut uninnissaa uppernarsarsinnaanngikkukku aningaasarsiaqarlutit sulinnginnissat sulisitsisunnit itigartinneqarsinnaavoq.

Qanoq sivisutigisumik
Ulluni qitornavit napparsimmavimmi uninngaffigisaani aningaasarsiaqarnak taamaallaat sulinngissinnaavutit. Taamaalillutit qitornat assersuutigalugu ulluni tallimani uninngappat, taamaallaaat ulluni tallimani aningaasarsiaqarlutit sulinngissinnaavutit.

Aningaasarsiannut annaasaqaataanngitsumik sulinngissinnaanerit sinnerlugu meeraq sivisunerusumik uninngappat, isumaqatigiissutit ilaat malillugit piffissaq sivitsortissinnaavat. Piffissaq sivitsortissinnaanngikkukku aningaasarsiaqarnak sulinnginnissannik sulisitsisunnut qinnuteqarsinnaavutit.

Naammagittaalliuteqarneq
Qitornavit napparsimmavimmi uninnganerani aningaasarsiaqarnak sulinnginnissannik sulisitsisunnit pissusissamisuunngitsumik itigartinneqarsoriguit peqatigiiffinnut saaffiginnissinnaavutit. Tamatuma kingorna peqatigiiffivit suliaq ilinnut tunngasoq sulisitsisunnut oqaloqatigiissutigisinnaavaa.

Malugiuk
Meeqqat napparsimmavimmi uninneranni aningaasarsianut annaasaqaataanngitsumik sulinnginneq pillugu maleruaqqusat isumaqatigiissutini ataasiakkaani allassimasarnerat nalinginnaasuuvoq.