Napparsimaneq – Pissutaalluni soraarsitaaneq

Kalaallit Nunaanni suliffeqarfeqarfiit pisortanit namminersortunillu ingerlanneqarput.

Namminersortut pisortallu suliffeqarfiutaanni sulinermut atatillugu pissutsit inatsisit aqqutigalugit naleqqussagaapput. Tamatuma saniatigut pisortani atorfeqartunut atorfinitsinneqarnermi atugassarititaasut isumaqatigiissummi sulisut ataasiakkaat atorfinitsinneqarneranni malinneqartuni aamma maleruagassiorneqarput. Matuma kinguliani allassimasut pisortani atorfeqartunut taamaallaat atuupput.

Sulisinnaatillutit suliffivit paarinissaanut pisussaatitaavutit. Napparsimaleruilli peqqissinissavit tungaanut angerlarsimaannarnissat pisariaqalersinnaassaaq. Pisortani atorfeqaruit napparsimanerit pissutigalugu soraarsinnissannut sulisitsisut pisinnaatitaasinnaavoq.

Ullunut 120-nut aalajangersagaq
Qaammatit kingulliit 12-it ingerlanerini ulluni 120-ni napparsimasimaguit ullunut 120-nut aalajangersagaq atorneqalersinnaavoq. Ullunut 120-nut aalajangersagaq tassaavoq maleruaqqusaq sulisitsisuit soraarsitsinissamik ilimasaaruteqarnissamut piffissaritinneqartumit sivikinnerusumik ilimasaaruteqarnermigut soraarsinnissannik periarfissiisoq. Ullunut 120-nut aalajangersakkami ilaatinneqaruit soraarsitsinissamik ilimasaaruteqarfigineqarnissannut piffissaq qanoq sivisutigisoq atorneqassanersoq isumaqatigiissutinni allassimanersoq apeqqutaassaaq. Ullunut 120-nut aalajangersagaq malillugu qaammammik ataatsimik sioqqutsilluni ilimasaarinikkut soraarsinneqarsinnaanerit nalinginnaasuuvoq.

Maleruaqqusap sulisitsisunnit atorneqalersinnaaneranut qaammatini kingullerni aqqaneq marlunni ulluni 120-ni napparsimasimassaatit.

Ullunut 120-nut aalajangersakkamut aatsaat ilaatinneqassaatit, tamanna atorfinitsinneqarninnut allakkani imaluunniit atorfinitsinneqarninnut isumaqatigiissutinni allassimappat.

Ullunut 120-nut aalajangersagaq malillugu sulisitsisunnit napparsimanerit pissutigalugu soraarsinneqarsinnaanerit sioqqullugu ulluni 120-ni napparsimasinnaaninnik pisinnaatitsinngilaq. Ulluni 120-ni napparsimasimanngikkaluartutilluunniit napparsimanerit pissutigalugu sulisitsisunnit soraarsinneqarsinnaavutit.

Peqqutit allat
Ukiup ataatsip ingerlanerani ullut 120-t napparsimaffigalugit suli angunngikkaluaritilluunniit sulisitsisuit soraarsissinnaavaatit:

• Peqannginnerit suliffeqarfiup ingerlanneqarnissaanut annertuumik ajoqusersuutaappat
• Soraarsinneqarnissat sioqqullugu mianersoqqussummik tunineqareersimaguit
• Suliffinnut uternissat ilimanaateqarunnaarpat