Sulisoqarneq pillugu politikki

Sulisoqarneq pillugu politikki tassaavoq naleqassutsit maleruagassallu suliffeqarfinnut ataasiakkaanut atuuttut. Tassa imaappoq aqutsisunut sulisunullu atuuttut.

Sulisoqarneq pillugu politikkit suliffimmit suliffimmut assigiinngitsorujussuusinnaapput. Pisortani suliffeqarfiit tamarmik sulisoqarneq pillugu politikkeqarput. Namminersorlutilli inuussutissarsiuteqartut piginneqatigiiffiillu tamarmik sulisoqarneq pillugu politikkeqanngillat, taakkununnga tunngatillugu inatsisitigut piumasaqaatigineqannginnami.

Sulisoqarneq pillugu politikki ilinnut attuumassuteqartoq atuassallugu soqutigigukku aqutsisunnut attaveqassaatit.

 

Sulisoqarneq pillugu politikkini illit aqutsisullu assersuutigalugu makkununnga atatillugu pisinnaatitaaffisi, periarfissasi pisussaaffisilu allaaserineqarput:

• Sulisussarsiortarneq
• Sulisunik attassiniarneq
• Piginnaasanik ineriartortitsineq
• Suliunnaarneq
• Piffissaq suliffiusoq
• Aningaasarsiaqarluni aningaasarsiaqaranilu sulinnginneq

Tassa imaappoq illit aqutsisullu ulluinnarni suliffimmi qanoq iliuuseqartariaqarnersusi sulisoqarneq pillugu politikkimi allaaserineqarpoq. Taamaalilluni sulisoqarneq pillugu politikki suliffiup anguniagaasa angunissaanut sakkussaavoq.

Sulisoqarneq pillugu politikkit suleqatigiinnermut ataatsimiititaliaq (SU) sulisunit aqutsisunillu ilaasortaaffigineqartoq isumasioqatigalugu aqutsisunit suliarineqakkajuttarput.

 

Sulisoqarneq pillugu politikki isumaqatigiissutinut tapertaliussaavoq. Tamanna isumaqarpoq sulisoqarneq pillugu politikki isumaqatigiissutaareersunut akerliusinnaanngimmat. Assersuutigalugu isumaqatigiissutinni allassimappat sapaatip-akunneranut nalunaaquttap-akunnerini 40-ni sulissasutit, tamannalu sulisoqarneq pillugu politikkimi allanngortinneqarsinnaanngilaq.

Illit aqutsisullu sulisoqarneq pillugu politikkip sapinngisarsi tamaat malinniarnissaanut pisussaaffeqarpusi.