Naalakkersuisunut akuersissummik qinnuteqassanngilatit, inuttut danskisut innuttaassuseqaruit.
Danskisut innuttaassuseqanngikkuit, akuersissummik qinnuteqassanngilatit, piumasaqaatit marluk uku naammassisimagukkit:
• Kalaallit Nunaanni aalajangersimasumik najugaqaruit, aammalu ukiuni marlunni kingullerni sivisunerusumiluunniit inuit allattorsimaffianni nalunaarsorsimaguit
• Kalaallit Nunaannut tamakkiisumik akileraartussaatitaaguit, aammalu ukiuni marlunni kingullerni sivisunerusumiluunniit Kalaallit Nunaannut tamakkiisumik akileraartussaasimaguit
Ingerlatseqatigiiffik aningaasaliisartoq Kalaallit Nunaanni angerlarsimaffeqartoq aamma akuersissummik qinnuteqassanngilaq, ima pisoqarpat:
• ingerlatseqatigiiffiup aningaasaatitai tamarmik toqqaannartumik inunnit inatsimmi piumasaqaatinik naammassinnissimasunit pigineqarpata
• taasisinnaatitaanerit tamarmik toqqaannartumik inunnit inatsimmi piumasaqaatinik naammassinnissimasunit atorneqarsinnaappata
Tassa imaappoq, ingerlatseqatigiiffik aningaasaliisartoq Kalaallit Nunaanni angerlarsimaffeqartoq akuersissummik qinnuteqanngikkaluarluni pisinnaavoq, piginnittut taasisinnaatitaanernillu atuisinnaasut tamarmik danskisut innuttaassuseqarpata imaluunniit danskisut innuttaassuseqanngikkaluarlutik ukiuni marlunni najugaqarnermut, inuit allattorsimaffianni nalunaarsimanermut aamma Kalaallit Nunaannut tamakkiisumik akileraartussaatitaanermut piumasaqaatinik naammassinnissimappata.
Ingerlatseqatigiiffik piumasaqaatinik naammassinnissimanngippat, Naalakkersuisut akuersissutaannik qinnuteqartoqassaaq.
Aamma suliffeqarfiit peqatigiiffiillu aalajangersimasut akuersissummik qinnuteqanngikkaluarlutik pisinnaapput. Tamanna ilaatigut atuuppoq:
• aningaaseriviinnut, realkredit-imik taarsigassarsititsisarfinnut, sillimmasiisarfiinnut aamma soraarnerussutisiassanut aningaasaateqarfinnut aalajangersimasunut, Danmarkimi, Kalaallit Nunaanni imaluunniit Savalimmiuni angerlarsimaffeqartunut, aammalu nakkutilliinermut ilaasunut
• inunnut imaluunniit suliffeqarfinnut Naalakkersuisunit akuersissummik, koncessionimik imaluunniit licensimik tunineqarsimasunut, pigisaq imaluunniit atuisinnaatitaaneq suliffeqarfiup akuersissutaa naapertorlugu sulineranut atorneqassappat
• Kalaallit Nunaanni peqatigiiffinnut soqutigisaqaqatigiiffinnullu inuussutissarsiornermik ingerlatsinngitsunut, inatsimmi piumasaqaatinik naammassinnissimasunut
Akuerineqarnerit, akuersissutit uppernarsaatilluunniit tunngavigalugit suliffeqarfiit
Illit imaluunniit suliffeqarfiit inatsit manna malillugu immikkut akuersissummik qinnuteqassanngilasi, suliamik ingerlatsigussi Naalakkersuisut tunniussaat tunngavigalugu, uku arlaat naapertorlugu:
• Aalisarnermut Inatsisartut inatsisaat,
• Aatsitassanut tunngasunik suliaqarneq pillugu Inatsisartut inatsisaat,
• Najukkani aatsitassanut tunngasunik suliaqarneq pillugu Inatsisartut inatsisaat,
• Aatsitassat pillugit ingerlatallu tamatumunnga pingaarutillit pillugit Inatsisartut inatsisaat
(aatsitassanut ikummatissanullu inatsit),
• Takornariartitsinermut aamma inuussutissarsiutigalugu suliaqarnermi nunap aggornerinut il.il. Inatsisartut inatsisaat,
• Sumiiffinni toqqarneqartuni takornariartitsisarnissamut akuersissutinut Inatsisartut inatsisaat,
• Sermip erngullu niuernikkut iluaqutigineqarnissaat pillugu Inatsisartut inatsisaat.
Tamanna taamaallaat atuuppoq, Kalaallit Nunaanni pigisaq aalaakkaasoq suliffeqarfissinni atugassatut pisiarineqarpat imaluunniit atuisinnaatitaaffigineqarpat.
Assersuutigalugu pineqarsinnaapput:
• illuutit imaluunniit init suliffeqarfiup ingerlatsineranut atorneqartussat
• toqqorsiviit, sannaviit imaluunniit ingerlatsinermi atortulersuutit allat
• sulisunut inissiat, taakku suliffeqarfiup ingerlatsineranut ilaappata
Aalajangersagaq atuutinngilaq, pigisaq aalaakkaasoq suliffeqarfiup akuersissummi, akuersissummi uppernarsaatimiluunniit pineqartup avataani siunertanut atorneqassappat.
Assersuutigalugu aatsitassarsiornermik suliffeqarfik aalajangersagaq manna atorlugu illumik attartortittagassamik pisisinnaanngilaq.