Nammineq pigisamik inissiaatillit peqatigiiffiat – Nalinginnaasumik paasissutissiineq

Illuut sunaluunniit, inissiaq nammineq pigisaq ataaseq sinnerlugu inissiartalik inissiaatillit peqatigiiffiannik peqartussaavoq.

Inissiamik nammineerluni pigisamik piginnittutut ingerlaannartumik inissiaatillit peqatigiiffiannut ilaasortanngussaatit – inissiaq attartukkat attartortumiit piginnittumut aaqqissuussineq aqqutigalugu pisiarisimagaluarukku imaluunniit inissiaq nammineerluni pigisaq inissianik niueruteqarneq nalinginnaasoq aqqutigalugu pisiarisimagaluarukku apeqqutaatinnagu.


Inissiaatillit peqatigiiffiata siunertaa
Ilaasortat pigisaat ataatsimoorussat susassaqarfiilu ataatsimoorussat allat aqunneqarnissaat inissiaatillit peqatigiiffiata siunertaraa. Illuummi inissianik nammineerluni pigisanik piginnittut tamarmik ilaasortaassapput.


Ataatsimeersuarneq
Ataatsimeersuarneq inissiaatillit peqatigiiffianni oqartussaasut qullersaraat. Ataatsimeersuarnermi aalajangiiffigisassat tamarmik taasisut amerlanerussuteqarnerisigut aalajangiiffigineqartassapput. Inissiat tamarmik immikkut ataatsimik taasisinnaatitaapput.


Inissiaatillit peqatigiiffiannut akiliut
Inissiaatillit peqatigiiffianni ilaasortatut inissiaatillit peqatigiiffiannut akiliut akilertassavat. Akiliut ataatsimoorullugit aningaasartuutissanut matussutissaavoq, ilaatigut

• inissiaatillit peqatigiiffiata nunataanik, illunik ataatsimoorussanik, aaqqissuussanik ataatsimoorussanik, teknikkikkut atortulersuutinik ingerlatsinermut aserfallatsaaliuinikkullu kiisalu ataatsimoorussamik pilersuinermut kiffartuunneqarnermullu aaqqissuussinernut, soorlu iluarsaassinernut antenne-nillu ingerlatsinermut
• aqqusinernut aputaajaanermullu aningaasartuutinut
• sillimmasiinermut akiliutinut
• naatsorsuutinik misissueqqinnermut
• aqutsinermut aningaasartuutinut
• illuartitassarisinnaasanut akiliutinut

Inissiaatillit peqatigiiffiannut akiliutivit annertussusissaannut apeqqutaassapput:

• Ukiumi tulliuttumi aningaasartuutissanut missingersuutit. Missingersuutit inissiaatillit peqatigiiffianni siulersuisunit imaluunniit siulersuisut sinnerlugit aqutsisumit suliarineqartarput, aammalu ataatsimeersuarnermi akuerineqartarlutik
• Inissiap najukkavit inissiaatillit peqatigiiffiata annertussusianut tamarmiusumut naleqqiullugu annertussusia. Inissiaq najukkat assersuutigalugu inissiaatillit peqatigiiffiata annertussusiata tamarmiusup 1/20-ianik annertussuseqarpat, akiliutissat inissiaatillit peqatigiiffianni tamarmiusumi akiliutip 1/20-ianik annertussuseqassaaq

Aserfallatsaaliuineq
Inissiaatillit peqatigiiffiata silami nutartigassat aserfallatsaaliugassallu illersorneqarsinnaasumik isumagissavai, taakkununngalu ukuninnga nutarterisarneq silamilu aserfallatsaaliuisarneq ilaapput

• ataatsimoortarfinnut matut
• silami igalaartassat igalaallu
• silami aneerasaartarfiit
• elevator-it
• ataatsimut pilersuinermut aqqusersuutit
• atortut ataatsimoorussat, taakkununnga kiassaateqarfiit ataatsimoorussat ilaallutik

Siulersuisunit akuerineqartinnak

• illuutip silataani, ataatsimoortarfinnut igalaat imaluunniit matut silataanni allannguissanngilatit, iluarsaassissanngilatit imaluunniit qalipaassanngilatit
• imaluunniit antenne-nik, allagartanik pilerisaarutinilluunniit ikkussissanngilatit

Kisiannili inissiap nammineerlutit pigisavit iluani aserfallatsaaliugassat illit nammineerlutit akisussaaffigissavatit.