Illumik piginnittut nikinnerat – Nalunaarneq

Illuuteqaruit allannguutaasinnaasut suut tamaasa pisortanut susassaqartunut nalunaarutiginissaat pingaaruteqarluinnarpoq. Susassaqartut tamakku ilagisinnaallugu kommunimi najugaqarfinni Teknikkimut Immikkoortortaqarfik.

Tamatumani peqqutaavoq, allannguutinik nalunaaruteqanngikkuit, taava akiligassinneqarataannaavutit, immaqa illit akiligassarinngisaraluannik.

Allannguutit ilinnut tunngasut pisussaaffigileriataarsinnaasatit tulliuttuusinnaallutik, tassa Teknikkimut Immikkoortortaqarfimmut nalunaarutiginnissimanngikkuit:


Piginnittup allanngornera: Illut tunigukku tamannalu Teknikkimut Immikkoortortaqarfimmut nalunaarutiginagu, taava suli illumik piginnittutut nalunaarsorsimassaatit, taamaattu­millu akiligassannik nassinneqartassallutit, soorlu paaviiaatitsinermut eqqaavinnullu.

Illumik piginnittutut illup eqqaata saligaatsuutinnissaa akisussaaffigivat. Taamaattoqanngip­pat taava Teknikkimut Immikkoortortap saliisitsinermut akiligassamik nassissinnaavaatit. Akiligassarlu taanna aamma ilinnut tussinnaalluni, illumik tunisinerit Teknikkimut Immikkoor­tortamut nalunaarutigisimanngikkukku.


Avinnermi inooqatigiikkunnaarnermiluunniit: Avikkuit tamatumanilu aappallu isumaqatigiissutigisimagussiuk arlassi illu tigummisussaagaa, taava tamanna ilissi Teknikkimut Immikkoortortaqarfimmut nalunaarutigisussaavarsi. Taamaaliunngikkussi, illumi najugaqa­runnaarsimasoq tulliuttutigut akiligassinneqarataannaavoq, soorlu anartarfiit anninnerinut paaviaatitsinermullu.


Toqukkut qimagunnermi kingornusinermilu: Toqukkut qimaguttoqarnerani illit assersuutigalugu angajoqqaavit illuat kingornussimagukku, illumilu najugaqarnerit Teknikkimut Immikkoortortamut nalunaarutigisimanagu, taava Teknikkimut Immikkoortortap eqqaavinnik anartarfinnillu anitsinissamiit peersimasinnaavaatsit.

Illit kommuninni Teknikkimut Immikkoortortap ilinnit atugassamitut pisariaqartitai tassaapput:

• Illumik pineqartumik piginnittutut allagartaq. Piginnittutut allagartaq tassaavoq, kiap il­lumik piginnittuuneranik uppernarsaat
• Akuersissut tassaasorlu, pisisup tunisisullu atsiornermikkut isumaqatigiissutaat, illullu tunineranut uppernarsaataasussaq

Paasissutissat tamakku Teknikkimut Immikkoortortamut iluaqutaassapput, soorlu akiligassat allakkalluunniit eqqortumik inuttassaannut nassiunnissaannik.