Nammineq aningaasartuutiginagu eqqartuussisulersuussineq – Nalinginnaasumik paasissutissiineq qinnuteqartarnerlu

Aningaasaqarnerit pitsaavallaanngippat eqqartuussivikkullu suliaqartitserusullutit, nammineq aningaasartuutiginagu eqqartuussisulersuussisinnaavutit. Nammineq aningaasartuutiginagu eqqartuussisulersuussineq imatut paasineqassaaq

• eqqartuussissuserisoq inatsisileritoorluunniit alla pisortat aningaasarsiaqartitaat suliamik illit suliassanngortitannik ingerlatsisussaq eqqartuussiviup toqqassavaa,
• eqqartuussisulersuussinermut akitsuut illit akilissanngilat,
• illuatungerisamut ajorsaruit illuatungerisamut suliami aningaasartuutit illit akilissanngilatit
• suliap suliarinerani misissuinernut tunniussatit paasissutissiissutitilluuniiit pisortanit aningaasarsissutigissavatit

Eqqartuussutip nalunaarutiginerani pisortat akiligassaat eqqartuussiviup annertussusilissavaa.

Nammineq aningaasartuutiginagu eqqartuussisulersuussinissaq Naalagaaffiup Sinniisoqarfianut qinnuteqaatigisinnaavat, suliaq ingerlanneqassappat

• najukkani eqqartuussivinni
• Kalaallit Nunaanni Eqqartuussivimmi
• Kalaallit Nunaata Eqqartuussisuuneqarfiani

Qinnuteqaateqarnikkut nammineq aningaasartuutiginagu eqqartuussisulersuussisinnaatitaavutit

1. unnerluussutip eqqartuussivimmut suliassanngortinnissaa naammaginartumik tunngavissaqartikkukku,
2. unnerluussineq inatsisilerinikkut ikiorserneqartariqarpat
3. aamma inatsisilerinikkut ikiorserneqarneq malittarisassat malillugit akilersinnaanngikkukkit

Tamatumunnga piumasaqaatit naalagaaffiup sinniisoqarfiata nittartagaani annertunerusumik atuarsinnaavatit. Piumasaqaatit naammassineqanngitsutut sulianik suliarinnittartup nalilerpagit itigartinneqassaatit. Itigartitsineq Civilstyrelsen-imut naammagittaalliuutigisinnaavat.


Qinnuteqarneq
Nammineq aningaasartuutiginagu eqqartuussisulersuussinissaq qinnuteqaatigissagukku qinnuteqaat immersuiffissaq immersussavat. Taanna naalagaaffiup sinniisoqarfiata nittartagaani pissarsiarisinnaavat. Aamma qinnuteqaat immersugassaq Naalagaaffiup Sinniisoqarfianut aasinnaavat.

Nammineq aningaasartuutiginagu eqqartuussisulersuussinissaq qinnuteqaatigigukku eqqaamassavat uppernarsaatit tamaasa ilanngutissagakkit. Qinnuteqaammi immersuiffissami uppernarsaatit sorliit ilanngunneqassasut allattorneqarsimapput. Uppernarsaatit pineqartut ilanngussimanngikkukkit suliaq Naalagaaffiup Sinniisoqarfiata suliarisinnaanngilaa.

Qinnuteqaat immersugaq uppernarsaatillu tamaasa Naalagaaffiup Sinniisoqarfianut nassiutissavatit tunniukkiartorlugilluunniit.


Malugiuk
Nammineq aningaasartuutiginagu eqqartuussisulersuussinissamik suliat Naalagaaffiup Sinniisoqarfiata suliarisarpai malittarisassat makku malillugit:

• Kalaallit Nunaanni eqqartuussiveqarneq pillugu inatsit nr. 305 april-ip 30-anni 2008-meersoq
• Kalaallit Nunaanni nammineq aningaasartuutiginagu eqqartuussisulersuussineq pillugu nalunaarut immikkut ittoq, nittartakkami uani nassaarineqarsinnaasoq www.lovtidende.dk. Nalunaarut nutaaq ukiut tamaasa saqqummersinneqartarpoq

Tamatuma saniatigut nammineq aningaasartuutiginagu eqqartuussisulersuussineq pillugu suliat naalagaaffiup sinniisoqarfianit suliarineqartillugit pisortat ingerlatsinerat pillugu inatsit aamma ingerlatsinermi inatsisit nalinginnaasut malinneqartarput.