Qamutinik kalusiuttakkanik aammalu peertakkanik nalunaarsuineq, nalunaarsuinermik allannguineq aammalu atuiunnaarnermik nalunaaruteqarneq

Qamutit kalusiuttakkat peertakkallu inatsit malillugu nalunaarsorneqarsimasussaapput.
Qamutit kalusiuttakkat peertakkallu tassaapput qamutit qamutit motoorillit, inunnik pigisanilluunniit angallassissutitut atortussiat, tunuinut imaluunniit siuinut ikkuttakkat. Assersuutigalugu trailerit mikisuusinnaapput aammalu biilinut usisarfiit, atv’t aammalu traktorit aammalu lastbiilinut kalusiuttakkat angisuut.


Nalunaarsortinneri
Qamutit kalusiuttagaq imaluunniit peertagaq nalunaarsortinniarukku politiinut saaffiginnissaatit. Makkua nassassavatit:
• Qamut kalusiuttagaq - nalunaarsuinermi qamut kalusiuttagaq ajoquteqannginnersoq politiit nalilissavaat. Annermik qulliit, unittaatit sangunermi takutitsissutit politiit eqqumaffigissavaat.
• Nalunaarsuinermi immersugassaq immersorsimasoq aammalu atsiorsimasoq
• Sillimmasiinermut uppernarsaat
• Nalunaarsuinermi immersugassaq immersorsimasoq aammalu atsiorsimasoq. Piginnittoq pillugu paasissutissat immersugassami aammalu sillimmasiisimanermut uppernarsaammi assigiissapput.

Nalunaarsuinermi immersugassaq

Malugiuk stelnummer politiinut takutinnerani salinneqarsimassammat aammalu ersarissammat.

Nalunaarsuinermi immersugassaq politiiniit pissarsiarigukku nummerplade ilanngullugu pissarsiarissavat, taakkulu qamutip kalusiuttakkat imaluunniit peertakkap tunuanut ikkunneqassaaq.

Illoqarfimmi politeeqarfeqanngitsumi najugaqaruit politeeqarfik qaninnerpaaq attavigissavat, isumaqatigiissutigissavarsilu qanoq ilillutit qamut kalusiuttagaq imaluunniit peertagaq nalunaarsortissanerlugu.

Atuiunnaarluni nalunaaruteqarneq
Qamutip kalusiuttakkap imaluunniit peertakkap atorunnaarnerata nalunaarutiginissaa inatsisitigut piumasaqaataavoq.
Qamutip kalusiuttakkap imaluunniit peertakkap nalunaarsorneqarnera atorunnaarsinniarukku, atorunnaarsillugu nalunaarutigissavat. Assersuutigalugu tunissagaluarukku taamaaliussaatit. Tamatuma kingorna piginnittup nutaap pisussaaffigaa qamut kalusiuttagaq imminut nalunaarsussallugu.

Qamut kalusiuttagaq atorunnaarsinniarukku nummerplade politiinut tunniutissavat.

Qamummik piginnittup nutaap imminut nalunaarsoreersimalerpagu, qamutip kalusiuttakkap imaluunniit peertakkap ilinnut nalunaarsorsimajunnaarneranut politiit nalunaarfigissavaatsit.

Nalunaarsuinermi uppernarsaat
Politiit nalilerpassuk suut tamarmik pissusissamisoortut, nalunaarsuinermi uppernarsaat politiit ilinnut tunniutissavaat aammalu assinganik sillimmasiisarfiit nassissallugu.

Sillimmasiininni normut imaluunniit policenummer nalunaarsuinermi uppernarsaammi allaqqavoq.

Nalunaarsuereernermi paasissutissat, qamut pillugu immersukkami nalunaarsorneqarsimasut, allanngorsimappata, allannguineq politiinut nalunaarutigineqassaaq. Tamatuma kingorna politiit nutaamik nalunaarsuinermi uppernarsaasiussapput. Taamaattorli najukkamik allannguinermi atunngilaq.

Piginnittoq allanngorpat piginnittup - piginnittup nutaap - piaarnerpaamik – nutaamillu piginnittoqalerneraniit kingusinnerpaamik sapaatip akunneri pingasut qaangiutsinnagit – qamut pillugu nalunaartussaatitaavoq, qamut atorunnaarsinneqareersimanngippat.

Kalaallit Nunaanni qamutit nalunaarsorneqartarnerat pillugu Nalunaarut nr. 573 31. maj 2013-imeersoq.