Qamuteralannik nalunaarsuineq, nalunaarsuinermik allannguineq aammalu atuiunnaarnermik nalunaaruteqarneq Nalinginnaasut

Nalunaarsortinneri
Qamuteralaat inatsit malillugu nalunaarsorneqarsimasussaapput.

Qamuteralaat nalunaarsortinniarukku politiinut saaffiginnissaatit.

Makku nassassavatit:
• Qamuteralak – nalunaarsuinermi qamuteralak ajoquteqannginnersoq politiit nalilissavaat. Annermik qulliit, unittaatit aquutaalu politiit eqqumaffigissavaat.
• Sillimmasiisimanermut uppernarsaat
• Nalunaarsuinermi immersugassaq immersorsimasoq aammalu atsiorsimasoq. Piginnittoq pillugu paasissutissat immersugassami aammalu sillimmasiisimanermut uppernarsaammi assigiissapput.

Nalunaarsuinermi immersugassaq

Malugiuk
Malugiuk stelnummer politiinut takutinnerani salinneqarsimassammat aammalu ersarissammat.

Illoqarfimmi politeeqarfeqanngitsumi najugaqaruit politeeqarfik qaninnerpaaq attavigissavat, isumaqatigiissutigissavarsilu qanoq ilillutit qamuteralak nalunaarsortissanerlugu aammalu nummerpladenik pissarsissanerlutit.

Nalunaarsuinermut ilisarnaatit
Nalunaarsuisimanermut uppernarsaammut nalunaarsuinermut ilisarnaatit marluk aammattaaq tigussavatit. Ilisarnaatit qamutip saneraanut illugiinnik imaluunniit motoorip qalequtaanut nipputsissavatit. Isumannanngitsumik ikkunniarukkit ikkussivissat eqqiarluarsimasariaqarpoq. Ikkussivissap kissasseqqarnissaa pisariaqarsinnaavoq, imaassinnaavoq tagiartorneratigut.

Atuiunnaarluni nalunaaruteqarneq
Qamuteralaat pigisavit nalunaarsorneqarsimanera kissaatigiunnaarukku, taassuminnga atuinnaarnerit nalunaarutigissavat. Politiit attaviginerisigut taamaaliorsinnaavutit. Assersuutigalugu tunissagaluarukku taamaaliussaatit. Tamatuma kingorna piginnittup nutaap pisussaaffigaa qamuteralak imminut nalunaarsortissallugu.

Qamuteralammik piginnittup nutaap imminut nalunaarsoreersimalerpagu, qamuteralaap ilinnut nalunaarsorsimajunnaarneranut politiit nalunaarfigissavaatsit.

Nalunaarsuinermi ilisarnaatit
Qamuteralaat atorunnaarlugu nalunaaruteqareeruit, nipputsitassanik ilisarnaateqanngitsunik, nalunaarsuinermi ilisarnaatit qaavinut nipputsitassannik, politiit tunissavaatsit. Aammattaaq piiginnarsinnaavatit. Eqqumaffigiinnassavat ilisarnaatit eqqortumik ikkussimanngippata qalipaataa ajoqusersinnaammat.

Nalunaarsuinermi uppernarsaat
Politiit nalilerpassuk suut tamarmik pissusissamisoortut, nalunaarsuinermi uppernarsaat politiit ilinnut tunniutissavaat aammalu assinganik sillimmasiisarfiit nassissallugu.

Nalunaarsuereernermi paasissutissat, qamut pillugu immersukkami nalunaarsorneqarsimasut, allanngorsimappata, allannguineq politiinut nalunaarutigineqassaaq. Tamatuma kingorna politiit nutaamik nalunaarsuinermi uppernarsaasiussapput. Taamaattorli najukkamik allannguinermi atunngilaq.

Piginnittoq allanngorpat piginnittup - piginnittup nutaap - piaarnerpaamik – nutaamillu piginnittoqalerneraniit kingusinnerpaamik sapaatip akunneri pingasut qaangiutsinnagit – qamut pillugu nalunaartussaatitaavoq, qamut atorunnaarsinneqareersimanngippat.

Kalaallit Nunaanni qamutit nalunaarsorneqartarnerat pillugu Nalunaarut nr. 573 31. maj 2013-imeersoq.