Immiaaqqanik, viinninik imigassanillu kimittuunik nammineq atugassanik Kalaallit Nunaannut eqqussineq – Nassiussatut

Immiaaqqanik, viinninik imigassanillu kimittuunik Kalaallit Nunaannut nassiussatut eqqussiniaruit piumasaqaatit tunngaviusut pingasuupput:

1. Eqqussiniaruit 18-inik ukioqalereersimassaatit.
2. Eqqussiniaruit Kalaallit Nunaanni najugaqartuussaatit imaluunniit piffissami qanittunnguami Kalaallit Nunaanni najugaqalersussaassaatit.
3. Eqqussiniaruit ataasiartumik akuersissummik qinnuteqarlutillu tunineqarsimassaatit. Akileraartarnermut Aqutsisoqarfik akuersissutinik tunniussisartuuvoq.
4. Poortuutip utertittakkap akitsuusigassanik nalunaaruteqarnermi immersugassami allanneqarnissaani eqqussuisup pisussaaffigaa poortuutip stregkodeata Poortuutinik aqutsisumut internetikkut isertar-fimmi nalunaarsorneqarsimanera qulakkiissallugu.

Tamatumani uku atuupput:

• Stregkode nalunaarsorneqareersimappat eqqussuisoq qanoq iliuuseqassanngilaq.
• Nioqqutissiaq nalunaarsorneqarsimanngippat taanna Poortuutinik aqutsisumut internetikkut isertarfimmi (www.pant.gl) nalunaarsorneqassaaq.
• Uani takuuk: Ilitsersuut aka.gl-imiippoq. (https://aka.gl/emner/borger/afgifter/vejledninger?sc_lang=kl-gl )

Piumasaqaatit taakku sisamat eqquutsikkukkit aatsaat immiaaqqanik, viinninik imigassanillu kimittuunik Kalaallit Nunaannut nassiussatut eqqussisinnaavutit.

Immiaaqqanik, viinninik imigassanillu kimittuunik Kalaallit Nunaannut eqqussisinnaanermut ataasiartumik akuersissut – imak iliussaatit
Qinnuteqarneq qarasaasiakkut MitID atorlugu iserluni Sullissivik.gl aqqutigalugu pissaaq.
Qinnuteqaammi nioqqutissap suunera, akitsuutaata normua, kiisalu nioqqutissat eqqunniakkavit tamarmik immikkut qassiuneri nalunaassavatit. Taamatuttaaq nioqqutissat eqqunniakkavit fakturartaat ilanngullugu nassiunneqassaaq. Faktura akitsuusigassanik naatsorsuinissami atorneqartussaavoq. Kiisalu aamma nassiussat normuat aamma ulloq nassiutassatut tunniunneqarfissaat kingulleq allaqqassapput.
Akuersissut tunniunneqartinnagu piumasaqaatit makku atuupput:

1. Qinnuteqaat ullup nioqqutissat Kalaallit Nunaannut nassiussatut tunniunneqarfissaat kingulleq ullunik suliffiusunik 5-inik sioqqullugu elektroniskiusumik nassiunneqassaaq.
   - Nioqqutissat umiarsuakkut Aarhusimiit tallimanngornermi aallartussakkut nassiunniarukkit, taava tunniussivissaq kingulleq tassaavoq marlunngorneq. Tamannali suli atuunnersoq qulakkeertariaqarpat: Nassiunniakkanik tunniussinissamut piffissaliussaq nassiunniakkavit allagartaanni allaqqassaaq.
   - Taamaalillutit qinnuteqaat Akileraartarnermut Aqutsisoqarfimmut nassiutissavat kingusinnerpaamik sapaatip akunnera umiarsuup aallarfissaa sioqqullugu marlunngornikkut, tassami qinnuteqaat nassiussat tunniunneqarfissaat ullunik suliffiusunik 5-inik sioqqullugu nassiuttussaagakku.
2. Nioqqutissat akitsuutaat kiisalu akiliisitsissut akilerneqarsimassapput.
   - Akitsuutit, tapiliussatut akitsuut akiliisitsissullu kingusinnerpaamik akilerneqassapput qinnuteqaatip tunniunneqarnerani. Piviusorli unaavoq qinnuteqarfissamik immersuinerpit kingorna akiliinissamut immersugassamut toqqaannartumik ingerlateqqinneqassagavit. Akiliineq akuerineqariarpat qinnuteqaat nassiunneqassaaq.
3. Ataasiartumik akuersissummik tunineqassaguit nioqqutissat timmisartukkut, umiarsuakkut imaluunniit allakkerisarfikkut nassiussatut eqqunneqassapput.

Ataasiartumik akuersissut nioqqutissat ilinnut tunniunneqarniariarpata atorunnaassaaq.

Immiaaqqanik, viinninik imigassanillu kimittuunik Kalaallit Nunaannut nassiussatut kingusinnerusukkut eqqusseqqiniaruit aammaarlutit qinnuteqaammik nassiussissaatit, ataasiartumillu akuersissummik nutaamik Akileraartarnermut Aqutsisoqarfimmit nassinneqassallutit.
Oqaatigineqassaaq Akileraartarnermut Aqutsisoqarfik akuersissuteqartoqarnissaanik itigartitsisinnaammat, inummut aalajangersimasumut akuersissutaasimasut amerlassusii tunngavigalugit ilimagineqarpat nammineq atugassat sinnerlugit eqqussisoqarsimasoq.

Immiaaqqanik, viinninik imigassanillu kimittuunik nammineq atugassanik eqqussinermi akilersinneqartussaapput eqqussuinermi akitsuutit, tapiliussatut akitsuut kiisalu akiliisitsissut. Eqqussinermissaaq akilerneqartussaasinnaapput poortuutit akitsuutaat kiisalu utertittakkat qularnaveeqqutaat allaffissornermullu akiliut:

1. Eqqussuinermi akitsuutit
   - Nioqqutissat eqqunniakkavit suuneri tassunga apeqqutaapput. Tassami imigassat aalakoornartortallit akitsuutaat, imigassat aalakoornartortaallit procentiat qaffasinnerujartortillugu qaffasinnerulersarmata. Eqqussinermissaaq akilerneqartussaasinnaapput poortuutit akitsuutaat kiisalu utertittakkat qularnaveeqqutaat allaffissornermullu akiliut. Eqqussuinermi akitsuutit atuuttut uani takusinnaavatit: https://aka.gl/emner/borger/afgifter/indfoerselsafgift_for_varer?sc_lang=da
2. Tapiliussatut akitsuut
   - Tapiliussatut akitsuut eqqussuinermi akitsuutit naatsorsorneqartut 50%-eraat – poortuutit akitsuutaat imaluunniit utertittakkat qularnaveeqqutaat allaffissornermullu akiliut tapiliussatut akitsuummik tapeqartinneqassanngillat . Immikkoortumi ataaniittumi assersuut takuuk.
3. Sullissinermut akiliut
   - Immiaaqqanik, viinninik imigassanillu kimittuunik nammineq atugassanik eqqussiniarluni ataasiartumik akuersissummik qinnuteqaatinut tamanut sullissinermi akiliut 250 kr.-iusoq Akileraartarnermut Aqutsisoqarfiup akiligassiissutigissavaa. Akuersissummut ataatsimut nioqqutissat eqqunneqartut amerlassusii tassani apeqqutaanngillat . Tassa imaappoq: Akiliut aalajangersimasuuvoq, immiaaqqanik puiaasaaqqanik 100-nik, imigassanik kimittuunik puiaasanik 10-nik viinninilluunniit puiaasanik 50-inik eqqussinerit apeqqutaatinnagu.

Imaappoq qinnuteqaammik nassiussinermi kisitsisit taakku pingasut katinnerat kiisalu immaqa poortuutit akitsuutaat, utertittakkat qularnaveeqqutaat allaffissornermullu akiliut Akileraartarnermut Aqutsisoqarfimmut akilerneqassapput. Akiliisoqariarpat eqqussinissamut ataasiartumik akuersissut tunniunneqassaaq.

Nioqqutissanik pisiniarneq eqqussiniartumit nunanulluunniit allanut nioqquteqartumit unitsiinnarneqarpat allanngortinneqarpalluunniit ataasiartumik akuersissut atortussaajunnaassaaq, taannaavormi paasissutissat qinnuteqaammi nalunaarsorneqartut tunngavigalugit akuersissutaasoq. Taamaattoqartillugu ataani allassimasutut iliussaatit.

Pisiariniakkanik unitsitsiinnarneq
Takorlooruk nunanut allanut nioqquteqartup nalunaarfigigaatit, nioqqutissat pisiariniaraluakkatit nassiussinnaanngikkini. Allaammi ataasiartumik akuersissut Akileraartarnermut Aqutsisoqarfimmut qinnutiginikuullugulu akilernikuuat.
Taamatut pisoqartillugu ataasiartumik akuersissut taanna Sullissivik aqqutigalugu atorunnaarsissinnaavat aningaasallu ilunnut utertillugit. Taamaallaat eqqaamassavat: Atorunnaarsitsineq nioqqutissat nassiussassatut tunniunneqarfissaat kingulleq nallertinnagu pissammat.

Pisiariniakkanik allannguineq
Takorlooruk nioqqutissat pisiariniakkatit allannguiffigineqartut – assersuutigalugu puiaasat amerlassusii imaluunniit nioqqutissap suussusia. Taamatut pisoqartillugu ataasiartumik akuersissutit allannguiffiginiarpat. Tamanna pissaaq akuersissutaaqqaartup 7.1-imi taaneqartup atorunnaarsinneratigut. Taassuma kingorna nutaamik qinnuteqaateqassaatit nioqqutissat paasissutissartaannik nutaanik nalunaarsuillutit.
Eqqumaffigissavat, qinnuteqaatip nutaap nassiunneqarfissaa suli tassaammat nioqqutissat nassiussassatut tunniunneqarfissaat kingulleq ullunik suliffiusunik 5-inik sioqqullugu. Assersuut: Nioqqutissat pisiariniakkavit allannguiffigineqarnerat nioqqutissat nassiussassatut tunniunneqarfissaraluat kingulleq ullunik 3-nik sioqqullugu pippat, taava nassiussinissamik nutaamik inniminniissaatit, taavalu nassiussassatut tunniussivissaq kingulleq tassaassaaq ataasiartumik akuersissummik qinnuteqarnerup kingorna ullut suliffiusut 5-it qaangiutsinnagit.

Pisiariniakkatit unitsinniarukkit uunga emailimut nassiussissaatit: toldindberetning@nanoq.gl

Qinnuteqaat ullup nioqqutissat Kalaallit Nunaannut nassiussatut tunniunneqarfissaat kingulleq ullunik suliffiusunik 5-inik sioqqullugu elektroniskiusumik nassiunneqassaaq.

• Nioqqutissat umiarsuakkut Aarhusimiit tallimanngornermi aallartussakkut nassiunniarukkit, taava tunniussivissaq kingulleq tassaavoq marlunngorneq. Tamannali suli atuunnersoq qulakkeertariaqarpat: Nassiunniakkanik tunniussinissamut piffissaliussaq nassiunniakkavit allagartaanni allaqqassaaq.
• Taamaalillutit qinnuteqaat Akileraartarnermut Aqutsisoqarfimmut nassiutissavat kingusinnerpaamik sapaatip akunnera umiarsuup aallarfissaa sioqqullugu marlunngornikkut, tassami qinnuteqaat nassiussat tunniunneqarfissaat ullunik suliffiusunik 5-inik sioqqullugu nassiuttussaagakku.

Qinnuteqaammut nassiussannut atatillugu Akileraartarnermut Aqutsisoqarfiup aalajangigaanut maalaaruteqarnissamut pisinnaatitaaffeqarputit. Maalaarummik nassiussiniaruit, maalaarutigisat mail-ikkut uunga nassiutissavat toldindberetning@nanoq.gl

Maalaarutinni allassimassapput:

• Aalajangiinermut sooq maalaaruteqarnersutit tunngavilersuutit allassavatit
• Uppernarsaatit attuumassutillit kakkiutissavatit