Pappiaqqanik nalilinnik naqissusiinermi akitsuut

Naqissusiinermi akitsuut Nunatta karsianut akilerneqassaaq. Akileraartarnermut Aqutsisoqarfik uppernarsaatinik naqissusiisarpoq.
Uppernarsaatit naqissuserneqartussaatitaasut tassaapput:

- Piginnittuunermut uppernarsaatit
- Qularnaveeqqusiinermi allagartaq
- Akiitsut allagartaat
- Pigisanut nuunneqarsinnaasunut uppernarsaatit – assersuutigalugu sunngiffimmi angallat aamma biilit - matumani qaammatit pingasut sinnerlugit taarsersugassanik ilaqartumik taarsigassarsisoqarsimatillugu
- Aktiaatit
- Isumaqatigiissummut tapiliussaq (isumaqatigiissutinut tapiliussaq)

Naqissusiinermut akitsuut pisuni tulliuttuni akilerneqassaaq:

- Illuutinik aalajangersimasunik niueruteqarnermi imaluunniit tunniussinermi. Matumunnga ilanngullugu nammineq inuugallartilluni qitornanut pigisanik tunniussineq.
- Pappiaqqanik nalilinnik, akiitsunik aamma ingerlatseqatigiiffinni, peqatigiiffinni assigisaannilu piginneqataassutinik niueruteqarnermi.
- Taarsigassarsinermi aamma akiitsunik imaluunniit qularnaveeqqutinik pilersitsinermi.

Pisinermut tunisinermullu isumaqatigiissutit, kina naqissusiinermut akitsuummut akiliissanersoq. Naqissusiinermut akitsuummut aningaasartuutit aamma avinneqarsinnaapput.

Naliusup procent-iata ilaatut (1,5 %) naqissusiinermut akitsuut naatsorsorneqassaaq. Naliusoq tassaavoq niuernemi naliusoq. Taanna pisinermi aningaasat amerlassuserikkajuppaat, kisianni pisut ilaanni aningaasat amerlassusiat allaanerusinnaavoq. Assersuutigalugu illuutinik aalajangersimasunik imaluunniit suliffeqarfimmik akiliinertaqanngitsumik imaluunniit niuernermi naliusumik ilanngussinani tunniussinermi, niuerfimmi naliusoq aallaavigalugu naqissusiinermut akitsuut aalajangersarneqassaaq.

Taarsigassarsinermut uppernarsaatit, taarsigassarsiat ilaat qaammatit pingasut qaanngiunneranni akilerneqarsimanngitsut aallaavigalugit naqissusiinermut akitsuutip nalinga naatsorsorneqassaaq.

Assersuut

Angallammik nuannaariummik katillugu 300.000-inik akeqartumut innuttaasoq taarsigassarsianik nutarterippat. Aningaasat amerlassusiannut atatillugu innuttaasup 100.000 kr.-it akilerpagit, sinneruttullu 200.000 kr.-it taarsigassarsiarippagit. Taarsigassarsiat 200.000 kr.-iusut qaammammut 10.000 kr.-inik akilersorneqarput. Uani assersuummi naqissusiinermut akitsuut 170.000-it 1,5 %-erissavaat, taarsigassarsiallu ilaat taanna, qaammatit pingasut kingorna innuttaasup akilersuiffigisimanngilaa.

Uppernarsaatit arlaqartut naqissusiinermut akitsuummut ilaanngillat.

• Inuussutissarsiutinik umiarsuarnik angallatinillu pisinermi uppernarsaatit
• Pisortat illuutaannik tunniussineq, naqissusiinermut akitsuummut ilaanngilaq.
• Inissianik il.il. sanaartornermut tapiissuteqartarneq pillugu inatsisartut inatsisaanni, inatsisit kapitaliisa ilaat naapertorlugit qularnaveeqqutinut allagartat aamma pigisanut nuunneqarsinnaasunut allagartat Naalakkersuisunut tunniunneqartut.
• Inuussutissarsiutit siuarsarnissaannut kiisalu nunani avannarlerni ineriartortitsinermut aningaasaateqarfinnut aaqqissuussinerit arlaqartut malillugit qularnaveeqqusiinermi allagartat aamma pigisanut nuunneqarsinnaasunut allagartat tunniunneqarsimasut.
• Kalaallit Nunaanni Naalakkersuisut, Kalaallit Nunaanni kommunit, Danmark-ip imaluunniit naalagaaffiit allat akornanni nuussinerit pillugit uppernarsaatit.
• Kalaallit Nunaanni kommuninut aamma Kalaallit Nunaanni Naalakkersuisunut taarsigassarsititsineq pillugu uppernarsaatit
• Inunnut taakkununngarluinnaq pisinnaatitaaffiit pisussaaffiillu taamaallaat pilersinneqaraangata, inooqatigiittut pissutsit allanngorneranni uppernarsaatit pilersinneqartut. Matumani kingornussinerup, avinnerup, averusernerup, inooqatiggiikkunnaarnerup assigisaalu kiisalu toqukkut qimagunnerup pilersitai ilanngullugit.
• Ingerlatseqatigiiffinnik ataatsimoortitsinerit imaluunniit avissaartitsinerit, matumani akileraaruteqartoqassanngitsoq Akileraartarnermut Aqutsisoqarfimmit akuerineqarsimappat, akitsuummut ilaanngillat.

Uppernarsaatit naqissusiinermut akitsuusiiffiusussaanngitsut aamma naqissusiinermut akitsuutitaqanngitsut

• Pigisanik nuunneqarsinnaasunik tunniussineq, akiitsunik qaammatinik pingasunik sivisunerusumik akilersugassanik pilersitsiffiunngitsut.
• Ineqarfigisinnaasatut pisinnaatitaffimmik ilaqartumik inissiamik tunniussineq

Uppernarsaat naqissuserneqartussaatitaasoq, naqissusiinissamik pisussaaffiup atuutilernerata kingorna sapaatit akunneri arfineq-pingasut qaangiutsinnagit naqissusiiffigineqassaaq. Naqissusiinissamik pisussaaffik atuutilertarpoq, uppernarsaat naqissuserneqartussaatitaasoq pilersinneqaraangat.

Uppernarsaammik naqissuserneqartussaatitaasumik suliaqaraangavit – assersuutigalugu illuummik aalajangersimasumik niueruteqarnermi – uppernarsaat aamma uppernarsaanerlu pisariaqartoq Akileraartarnermut Aqutsisoqarfimmut nassiunneqarlunilu naqissusiinermut akitsuut akilerneqassaaq.

Naqissusiineq akitsuut akilerneqareerpat aamma uppernarsaatit pioqqaartut taakku Akileraartarnermut Aqutsisoqarfimmit tiguneqareerpata aatsaat pissaaq.

Akiliineq
Akileraartarnermut Aqutsisoqarfimmut uppernarsaatit pigisavit nassiunneranni, naqissusiinermut akitsuut akilereersinnaavat. Aningaaserivimmit nuussineq aqqutigalugu akiliiguit, akiliuteqarnermi uppernarsaammik Akileraartarnermut Aqutsisoqarfimmit nassinneqarnissat utaqqisariaqanngilat.

Kontop normua Grønlandsbanken A/S 6471-1836711

Kontop normua BankNordik
8120-1593102

Akileraartarnermut Aqutsiveqarfiup naqissusiinermut akitsuutaanut konto-p eqqortup nuussinermi tigusisussatut allannissaa pingaaruteqarpoq (piginnittuunermut uppernarsaat)

Assersuut
B-1010 Nuussuaq (Nuussuarmi imaluunniit Qinngutsinni najugaqaruit)
B-35 Nuuk (Nuummi najugaqaruit)
B-100 Upernavik (Upernavimmi najugaqaruit)
Inuup normua aterlu atorneqassanngillat – illup normua imaluunniit nammineq pigisap inissiap b normua illoqarfillu atorrneqaannarsinnaavoq.

Akileraartarnermut Aqutsisoqarfimmut uppernarsaammik nassiussineq

- Attavissaq(t)
- Naqissusiinermut akitsuutip akilerneqarnerani akiliinermut allagartaq aningaaserivimmeersoq
- Pigisamut uppernarsaat pioqqaartoq (illuummik aalajangersimasumut tunngasoq) Nuussinermi pilersinneqarnikuusoq. Kalaallit Nunaanni Eqqartuussiviit nittartagaanni, immersuiffissaq ilitsersuullu nassaarisinnaavatit.
- Taarsigassarsinermi uppernarsaatit pioqqaartut, pigisaqartup qularnaveeqqutitut allagartaatai, isumaqatigiissummut tapiliussat il.il.
- Inuit peqataasut CVR-ii imaluunniit inuttut normui.

Uppernarsaatit pioqqaartut kingornatigut sumut nassiunneqassanersut, ersarissumik nalunaarneqassammat eqqaamallugu.
Akileraartarnermut Aqutsisoqarfiup inassutigissavaa, uppernarsaatit pioqqaartut allakkatut tammatsaaliukkatut nassiutissagitit. Imaluunniit Akileraartarnermut Aqutsisoqarfiup najugaqarfigisaanut uppernarsaatit tunniutissagitit.

Allakkanik nassiussinikkut
Akileraartarnermut Aqutsisoqarfik
Intaleeqqap Aqqutaa nr. 1
Postboks 1605
3900 Nuuk

Nassiussinerup akiliinerullu kingorna
Uppernarsaatit naqissusiinermullu akitsuummik akiliineq Akileraartarnermut Aqutsisoqarfiup tigoreerpagit, uppernarsaat naqissuserneqartussaatitaasoq naqissuserneqassaaq. Uppernarsaat naqissuserneqareerpat, illit nalunaakkannut tigusisussamut taanna nassiunneqassaaq – nalinginnaasarpoq ilinnut imaluunniit Kalaallit Nunaanni Eqqartuussivinnut. Uppernarsaatit pioqqaartut allakkatut tammatsaaliukkatut nassiunneqassapput.

Akileraartarnermut Aqutsisoqarfiup sapinngisamik piaarnerpaamik qinnuteqaat suliarissavaa, kisianni piffissap suliamik suliarinniffiusussap naammagittarfigineqarnissaanut pisinnaatilluni.