Danmarkimi siusinaartumik pensionisiat – Qinnuteqarneq

Danmark aamma Kalaallit Nunaat siusinaartumik pensionisiat pillugit immikkut inatsiseqarput. Tamatuma kingunerisaanik Danmark-imi Kalaallit Nunaanniluunniit najugaqarnerit apeqqutaalluni, siusinaartumik pensionisianik pisartagaqalernissamut piumasaqaatit assigiinngitsut eqquutsittussaavatit.

Danmark-imi siusinaartumik pensionisiaqarnermut maleruagassat allanngortinneqarnikuupput, tamatuma kingunerisaanik siusinaartumik pensionisianik pisartagaqalersinnaaneq assut ajornarsinikuuvoq.


Suliap ingerlanera
Suliffeqarnermut utertikkumallutit illit suleqatigalutit piginnaanngorsaqqinnermik pilersaarut kommunip suliarissavaa. Tassa imaappoq kommune suleqatigalugu suliap ingerlanissaa inummut tulluarsagaq illit ingerlatissavat. Kommunip nalilerpagu illit siusinaartumik pensionisianik pisartagaqalersinnaassanersutit, ilaatigut makku ilanngullugit isiginiarneqartarput

• Illit ilinniagarisimasat
• Illit suliffeqarfinni misilittakkatit
• Illit peqqissutsit
• Illit kissaatitut suliffigiumasat

Aatsaat periarfissat tamakkerlutik misilinneqareerpata aammalu piginnaanngorsaqqinnermik pilersaarut suliffeqarnermik kinguneqanngippat, siusinaartumik pensionisianik pisartagaqalersinnaavutit.


Siusinaartumik pensionisianik pisartagaqalerniaraanni
Siusinaartumik pensionisianik pisartagaqalerniaruit illit sulisinnaassutsikkut piginnaasaqarnerit ataavartumik apparsimasussaavoq. Siusinaartumik pensionisianik pisartagaqalersinnaaniaruit piumasaqaatit arlaqartut eqquutsissavatit

• Dansk-isut innuttaassuseqassaatit
• Danmark-imi aalajangersimasumik najugaqassaatit
• 15-inik ukioqalernermiit utoqqalilluni pensionisiaqalersup ukiuisa nallernissaat tikillugu Danmark-imi najugaqareersimassaatit, Savalimmiuni imaluunniit Kalaallit Nunaanni aalajangersimasumik najugaqarsimassaatit sivikinnerpaamik ukiuni pingasuni

Danmark-imi siusinaartumik pensionisiat pillugit annertunerusumik uani atuagaqarsinnaavutit


Sivisusinnaavoq
Illit sulisinnaassutsikkut piginnaasaqarnerit ataavartumik apparsimasussaavoq, siusinaartumik pensionisianik pisartagaqalersinnaassaguit. Siusinaartumik pensionisianik pisartagaqalernissap tungaanut piffissaq sivisusinnaavoq, tamatumani pissutaavoq piffissami aalajangersimasumi aallaavittut isigalugu suliffeqarnermut utertinniarneqaqqaassagavit. Tassa imaappoq sulisinnaanissamut periarfissatit pitsanngorsarniaqqaartussaavatit.


Sulisinnaassutsikkut piginnaasat pitsanngornerat
Sulisinneqarneq aqqutigalugu sulisinnaassutsikkut piginnaasaqarnerit pitsanngortissinnaagukku taamalu imminut pilersorsinnaallutit, nalinginnaasumik atugassarititaasut imaluunniit suliffik eqaatsoq atorlugu siusinaartumik pensionisianik pisartagaqalersinnaanngilatit. Siusinaartumik pensionisiat tassaapput allatut oqaatigalugu aaqqiissut kingullerpaajusoq.


40-t inorlugit ukioqaruit
40-t inorlugit ukioqaruit pisuni immikkut ittuni taamaallaat siusinaartumik pensionisianik pisartagaqalersinnaavutit.