Pisortanit ikiorsiissutit – Nalinginnaasumik paasissutissiineq

Inersimasut tamakkerlutik sapinngisaq tamaat atorlugu imminnut ilaquttaminnullu pilersuinissamut pisussaaffeqarput. Tamanna piffissap ilaani imaluunniit sivisunerusumik pisinnaanngippat, innuttaasutut pisortat ikiorsiissutaannik pisartagaqalernissamik qinnuteqaateqarsinnaavutit. Tamanna assersuutigalugu, toqusoqarneranut, napparsimasoqarneranut, suliffissaaleqisoqarneranut, erninermut atatillugu sulinngiffeqartoqarneranut avinnermulluunniit tunngasuusinnaavoq. Pisortat ikiorsiissutaat taamaalilluni inunnut tamanut Kalaallit Nunaannittunut aningaasaqarnikkut sillimmasiissutaavoq.

Pisortat ikiorsiissutaat assigiinngitsut marluupput: Tassanngaannartumik ikiorsiissutit aamma aningaasartuutinut aalajangersimasunut pilersuisussaanermullu ikiorsiissutit.

Pisariaqartitatit nalinginnaalluinnartut tassanngaannartumik ikiorsiissutit matussusissavaat. Assersuutigalugu nerisassat ineqarnerlu. Allatut oqaatigalugu pisortat ikiorsiissutaat inuuginnarnissamut ikiorsiissutitut oqaatigineqarsinnaapput pissarsiarisinnaasatit, tamanna tassanngaannartumik pisariaqalissappat.

Aalajangersimasumik aningaasartuutinut aamma pilersuinissamut ikiorsiissutit nalinginnaasumik sivisunerusumik aningaasaqarnikkut ikiorsiissutaasarput, aalajangersimasumik aningaasartuutinnut matussusiissutaasussat. Assersuutigalugu innaallagissamut, imermut kiassarnermullu tamakku aningaasartuutigisinnaavatit. Taakku saniatigut illit ilaquttavillu pilersornissaannut pisortat ikiorsiissutaat aningaasanik akilersuutinik aamma ilaqartinneqartarput.

Pisortat ikiorsiissutaannik pisariaqartitsinerit ullunik 14-inik sivisuneruppat, iliuusissatut pilersaarummik suliaqarnissat piumasaqaatigisinnaavat. Iliuusissatut pilersaarummi nassuiarneqassaaq, suliffeqalernissamut periarfissavit pitsanngorsarnissaannut qanoq iliorsinnaanersutit.


Aningaasat annertussusaat
Nalinginnaasumik SIK-ip isumaqatigiissutaa malillugu ilinniagaqarsimanngitsup akunnermusiaata minnerpaaffiata 65 %-iata naleqqataa annerpaamik tunniunneqarsinnaavoq.


Malugiuk
Pisortat ikiorsiissutaannik pisartagaqalernissamik qinnuteqarnissaq kissaatigigukku, illit imminut ilaquttannullu qanoq ilillutit pilersuisinnaalernissannut siunnersorneqarnissamik ilitsersuunneqarnissamillu pisinnaatitaavutit.

Ullunik 14-inik sivisussuseqartumik sulerinngiffeqarnissamut ataatsikkut tiguneqartussamik pisinnaatitaavutit. Sulerinngiffeqarnissat ullunik 14-inik sioqqutsillutit suliffissarsiuussisarfik tamatuminnga kalerrissavat.

Suliffissaaleqisutut inissisimaguit, suliffissaaleqinermi ikiorsiissutinik pisartagaqalersinnaanerlutit siullermik misissortariaqarpat. Suliffissaaleqinermi ikiorsiissutinik pisinnaatitaanngikkuit, pisortat ikiorsiissutaannik pisartagaqalernissat qinnuteqaatigisinnaavat. Assersuutigalugu ukiup ataatsip ingerlanerani sapaatit akunnerini 13-ini suliffissaaleqinermi ikiorsiissutinik pisartagaqareersimaguit.

Pisortat ikiorsiissutaannik pisartagaqarnissamik qinnuteqaateqarnerit tamakkiisuusumik ilaannakuusumilluunniit itigartinneqarpat, qinnuteqaatit pillugu aalajangiinerup allaganngukkap, tunngavilersugaallunilu naammagittaalliornissamut ilitsersuummik ilaqartup, pissarsiarinissaanut pisinnaatitaavutit.