Pisortanit ikiorsiissutit – Piniartunut aalisartunullu immikkut ittumik

Inersimasut tamakkerlutik sapinngisaq tamaat atorlugu imminnut ilaquttaminnullu pilersuinissamut pisussaaffeqarput. Imminut aamma ilaquttat pilersornissaat piffissap ilaani ajornarpat, pisortat ikiorsiissutaannik pisartagaqalernissap qinnuteqaatiginissaanut periarfissaqarpoq. Aalisarnermik piniarnermillu inuussutissarsiorneq immikkut ittumik piffissap ilaani isertitakiffiulluniluunniit isertitaqarfiuneq ajorpoq. Taamaammat aalisartut piniartullu pisortat ikiorsiissutaannik pisartagaqarsinnaagaangata mianerisassat immikkut ittut eqqumaffigineqarput.

Aalisartuuguit piniartuullutilluunniit pisortat ikiorsiissutaannik pisartagaqarsinnaavutit assersuutigalugu:

• Tunisineq unitsinneqarsimappat imaluunniit tunisiniarnermi allatut ajornartorsiuteqartoqarpat
• Silap ajornera pissutigalugu piniarniarneq aalisarniarnerlu piffissap ilaani ajornarpat
• Napparsimanerit imaluunniit ajutoornikuunerit pissutigalugu peqqissutsikkut ajornartorsiuteqarlutilluunniit timikkut piginnaassutsit appaqqagallarpat

Piumasaqaatit

Pisortat ikiorsiissutaannik pisartagaqarumaguit makku eqquutsissavatit

• inuttut atukkatigut arlaatigut eqqugaasimassaatit. Inuttut atukkatigut eqqugaaneq illit piniartutut aalisartutulluunniit pisortat ikiorsiissutaannik pisartagaqalernissamik qinnuteqaateqarninnut pilersitsigajuttoq tassaavoq, pisut siuliini taaneqartut ilaat ataaseq patsisaalluni suliffissaarukkallarnerit
• pisortat ikiorsiissutaannik pisartagaqarallarninni piffissami tassani suliffissarsiortutut nalunaaqqallutillu suliffissarsiortuussaatit. Tassa imaappoq suliffissarsiuussisarfimmi suliffeqanngitsutut nalunaaqqassaatit
• pisortat ikiorsiissutaannik pisartagaqarninni piffissami tassani suliffimmik neqeroorfigineqaruit imaluunniit arlaannik suliffeqalernissamik neqeroorfigineqaruit akuersissaatit

Inuussutissarsiutit ingerlassinnaagaluarukkuluunniit pisortat ikiorsiissutaannik pisartagaqalernissamik aamma qinnuteqarsinnaavutit. Taamaakkaluartoq illit nammineq ilaquttatillu pilersorumallugit isertitaqarsinnaanngikkuit taamaallaat pisortat ikiorsiissutaannik pisartagaqarsinnaavutit.

Tassa imaappoq, pisortat ikiorsiissutaannik pisartagaqartillutit inuussutissarsiutigalugu piniarsinnaanermut allagartat tunniutissanngilat.

Aningaasat annertussusaat

Aningaasartuutinut aalajangersimasunut aamma pilersuinissamut pisortat ikiorsiissutaannik pisartagaqarumallutik qinnuteqartut allat assigalugit pisortat ikiorsiissutaat tunniunneqartussat naatsorsorneqartarput. Tassa imaappoq, aningaasartuutitit aalajangersimasut akuerisaasut tunngavigalugit pisortat ikiorsiissutaasa annertussusissaat naatsorsorneqartarpoq. Taakku assersuutigalugu tassaasinnaapput, ineqarnermut akiligassaq, innaallagissamut, imermut kiassarnermullu akiligassat.

Taassuma saniatigut ilinnut ilaquttannullu pilersuinissamut aamma aningaasat akilersuutaasartut allat pisortat ikiorsiissutaannut ilaasarput.

SIK-ip isumaqatigiissutaa malillugu ilinniarsimasuunngitsup akunnermusiaata minnerpaaffiata 65 %-iata annertoqataa nalinginnaasumik annerpaamik tunniunneqarsinnaavoq. Taamaakkaluartoq illit manna tikillugu isertittagarisarsimasannit pisortat ikiorsiissutaat anginerusussaanngillat.

Malugiuk

Kateqqaguit imaluunniit ukioq ataaseq sinnerlugu inooqatereersimaguit, pisortat ikiorsiissutaat marluullusi isertitassi annertussusaat aallaavigalugit naatsorsuisoqassaaq. Tassa imaappoq, katissimasavit imaluunniit aapparisavit isertitai, assersuutigalugu akissarsiat, ilinniartuunersiutit, erninermut atatillugu ullormusiat, suliffeqannginnermi ikiorsiissutit imaluunniit pensionit, pisortat ikiorsiissutaannit peerneqassapput.

Illit nammineq tunisisarninnit isertitaqaruit, isertitat taakku aamma pisortat ikiorsiissutaannit peerneqassapput.