1992-ip kingorna arnat sianiginngisaminnik akuerseqqaaratilluunniit naartunaveersaaserneqarsimasut aningaasanngorlugit ajunngitsorsiassinneqarnissamik qinnuteqaataat

1. januar 1992-imi peqqinnissaqarfiup tiguneqarnerata kingorna arnat sianiginngisaminnik
akuerseqqaaratilluunniit naartunaveersaaserneqarsimasut ajunngitsorsiassinneqarnissamik qinnuteqarnissamut periarfissinneqarput. Aningaasanngorlugit ajunngitsorsiassanik aaqqissuussinerup malitsigisaanik:

• Arnat sianiginngisaminnik akuerseqqaaratilluunniit 1. januar 1992-imi peqqinnissarfiup oqartussaaffigineqalernerata kingorna naartunaveersaaserneqarsimasut,
• Piumasaqaatinillu naammassinnittut,
• Aningaasanngorlugit ajunngitsorsiassinneqarnissaminnik qinnuteqarsinnaapput.

Kinguliini piumasaqaatit takukkit.

Ajunngitsorsiassanik qinnuteqarniaraanni piumasaqaatit makkua naammassineqarsimasussaapput:

• arnaavutit
• 1. januar 1992-ip kingorna ataasiarlutit arlaleriarlutilluunniit sianiginngisannik akuerseqqaarnalluunniit naartunaveersaaserneqarsimavutit
• pisoq/pisut Kalaallit Nunaanni peqqinnissaqarfimmi pivoq/pipput,
• pisumi/pisuni peqqinnissaqarfimmi sulisunit suliarineqarpoq/put
• Pisoq/pisut napparsimavimmi, pisortat suliffeqarfiutaanni imaluunniit
• Pisoq/pisut Danmarkimut allamulluunniit Namminersornerullutik Oqartussat/Naalakkersuisut akiligaannik atuariartornerup nalaani pivoq/pipput
  
  
• Naartunaveersaat tassaasinnaavoq spirali, DepoProveramik kapitinneq, P-stave imaluunniit kinguaassiorsinnaajunnaarsitaaneq.
• Naartunaveersaat alla pisuni immikkut ittuni ilanngunneqarsinnaavoq.

Matumani oqaaseq ’’sianiginngisaminnik’’ isumaqarpoq

• Arnap piffissap ingerlanerani sianiginngisaminik naartunaveersaaserneqarsimanerminik paasisaqarnera

Matumani oqaaseq ”akuerseqqaarnani” ima paasineqassaaq,

• Arnap paasitinneqarnera, imaluunniit
• nammineq paasisaqarnera naartunaveersaaserneqarsimanerminik, naak nakorsaq sulisorluunniit alla tamanna pillugu oqaloqatigisimanngikkaluarlugu taamalu/imaluunniit taamaaliornissamut akuersisimanani

Taamaattumik naartunaveersaaserneqarsimaneq naartusinnaajunnaarsitaasimanerluunniit pinngitsaaliisumik iliuuseqarfigineqarsimasuusariaqanngilaq.

Matumani arnat peerutereersimasut aningaasanngorlugit ajunngitsorsiassanik tunineqarsinnaanissaat periarifissaanngilaq.

Massakkorpiaq ilisimaneqanngilaq qinnuteqartuni piumasaqaatinik naammassinnittut qanoq annertutigisumik ajunngitsorsiassinneqassanersut. Aningaasanulli inatsimmi kontomi pingaarnermut nassuiaatit naapertorlugit arnat tamarmik annerpaamik 300.000 kr.-inik ajunngitsorsiassinneqarsinnaapput.

Aningaasanngorlugu ajunngitsorsiap annertussusia isertitat akileraarutaasussat pillugit Inatsisartut inatsisaat malillugu isertitanut akileraarutaasussanut ilaanngilaq kiisalu annertussusissanik tulluarsaanerup procentia massakkullu isertitat pillugit Inatsisartut inatsisaat malillugu tigusisussap imalunniit tigusisussap inoqutaasa massakkut isertitaannut ilanngunneqartussaanani.

Ajunngitsorsiassinneqarnissamik qinnuteqarniaruit onlinekkut qinnuteqassaatit toortagaq sungaartoq nammineq immersuinermi atorneqartussaq toorlugu ”Maana qinnuteqariti”, quppernermi uani qullerpaamiittoq.
Onlinekkut nammineq immersuiniaruit MitID nammineq pigisat atorlugu isissaatit immersuillutillu.

Nammineq immersugassat digitaliusoq tuugassaq sungaartoq una toorlugu aallartissavat ”Maana qinnuteqarit’’

Malugiuk:
Aatsaat digitalimik qinnuteqaatit nassiussinnaavat, MitID atorlugu iseruit.

Ajunngitsorsiassannik qinnuteqaatit nammineq nassiunniarukku, imaaliussaatit:

A) Pappiaqqanik immersukkanik taamaallaat tunniussisinnaagaanni
Aningaasanngorlugit ajunngitsorsiassannik qinnuteqarniaruit akuersissuteqarnermut uppernarsaat, attavissat pillugit immersugassaq qinnuteqarnermilu immersugassaq immersortussaavatit.

Immersugassat immersukkat pingasut mailimut uunga nassiunneqassapput: sl@frederiksen.gl iml. Advokatanpartsselskabet Frederiksen, Kissarneqqortuunnguaq 10, st. 003, 3900 Nuuk

Qinnuteqaatinnut ilanngussassat makkua nassassavatit:

• Kuisinnermut allagartavit, sumi najugaqarnermut uppernarsaatippit, passippit, biilernermut allagartappit allatulluunniit ilisarnaatippit assilineri.
  
• Uppernarsaatissat allat, soorlu nakorsap allagai imaluunniit nammineq nassuiaatit.
  

Aasassat una toorlugu aajuk ‘’Immersugassat pingasut ataatsimoortinneqarsimasut ’’

B) Immersugassat attaveqaatitigoortumik immersussagaanni namminerlu anisillugu (MitID pisariaqanngilaq)

Aningaasanngorlugit ajunngitsorsiassinneqarnissamik qinnuteqarniaruit akuersissummut uppernarsaat, attavissat allattorsimaffiata immersugassartaa kiisalu qinnuteqaatip immersugassartaa immersussavatit.
Toortagaq sungaartoq toorlugu ”Maana qinnuteqarit” imaaliussaatit:

• Toqqaruk ‘’Immersoruk anisillugulu” onlinekkut immersuiniaruit naqiterlugillu (MitID piumasaqaataanngilaq)
  
• Toqqaruk “Anisiguk” immersugassaq anillatsinniarukku namminerlu allallutit immersorlugu tunniullugulu (MitID piumasaqaataanngilaq)
  

Immersugassat taakku pingasut mailikkut uunga nassiutissavatit: sl@frederiksen.gl iml. Uunga: Advokatanpartsselskabet Frederiksen, Kissarneqqortuunnguaq 10, st. 003, 3900 Nuuk

Qinnuteqaatinnut ilanngullugit nassiutissavatit makkua:

• Kuisinnermut allagartavit, sumi najugaqarnermut uppernarsaatippit, passippit, biilernermut allagartappit allatulluunniit ilisarnaatippit assilineri.
  
• Uppernarsaatissat allat pigigukkit, soorlu nakorsap allagai imaluunniit nammineq nassuiaatitit.

Qinnuteqaatit sullissisumut, Advokatanpartsselskabet Frederiksenimut, apuuppat sullissineq piaarnerpaamik aallartittussaavoq.

Mailikkut qinnuteqaatippit tigunera uppernarsarneqassaq imaluunniit oqarasuaatikkut.

Sullissinerup sivisussusissaa ataavartumik ingerlasussaavoq, inassuteqarnermili aalajangiisuussaaq qinnuteqartut pissarsiarineqarsimasut amerlassusaat taakkulu naligiimmik naapertuilluartumillu sullinneqarnissaasa qulakkeerneqarnissaat.

Aalajangiinerit naammassillutik suliarineqarnissaat kingusinnerpaamik 2026-mi januaarip naanerani pinissaa naatsorsuutigineqarpoq.

Qinnuteqarfissaq 31. december 2025-mut killeqarpoq.

Ajunngitsorsiassanik aalajangiinerit allanngortinneqarsinnaanngillat allaffissornikkullu oqartussaasumut allamut suliassanngortinneqarsinnaanatik. Aalajangiinerit Nunatta Eqqartuussivianut suliassanngortinneqarsinnaapput.


Arnap suliaritissimanini maalaarutiginiaruniuk imaluunniit naartunaveersaaserneqarnermi kinguneranik ajoquserneqarsimanerminut atatillugu ajunngitsorsiassanik qinnuteqarniaruni, makkua sukumiinerusumik atuarsinnaavai

1. Peqqinnissakkut sullinneqarsimaneq pillugu malaaruteqarneq
2. Taarsiivigitinnissamik qinnuteqarnissamut immersugassaq