airplanebooksbriefcase business cogs cross election entertainment fish house law lockmedicalpeopleselfservices socialtax
Nalinginnaasumik paasissutissiineq
INI-p inissiaataa attartortittagaq tassaavoq pisortat inissiaataat attartortittagaq, Namminersorlutik Oqartussanit imaluunniit kommuninit pigineqartoq aammalu INI-mit aqunneqartoq. Tassa imaappoq, INI-p inissiamut tunngasut nalinginnaasut isumagisarpai.

Illuni ataasiakkaani illuniluunniit affarleriinni nutaanerusuni najugaqaruit innaallagissamut, imermut kiassarnermullu immikkut uuttuuteqartunik, imermik kiassarnermillu atuininnut qaammatit tamaasa Nukissiorfimmut toqqaannartumik akiliisassaatit. Tamatuma saniatigut nammineq innaallagissamut, imermut kiassarnermullu atuilernissamik atuiunnaarnermillu nalunaaruteqassaatit.

Affarleriinni najugaqaruit imermut kiassarnermullu uuttuuteqanngitsumi, qaammatit tamaasa imermut kiassarnermullu siumut akiliisassaatit. Ukiup ingerlanerani annikippallaamik imaluunniit annertuallaamik akiliisimanersutit paasiniarlugu, imermik kiassarnermillu atuinerit ukiumoortumik INI-mit naatsorsorneqartarpoq.

Imermut, kiassarnermut uuliamullu akit allanngorsinnaapput taamaalillutillu siumut akiligassavit angissusaa aamma allanngorsinnaalluni.

Imermut kiassarnermullu siumut akiligassat kukkusumik naatsorsorneqarsimaneri isumaqarfigigukkit, naammagittaalliuuteqarnissannut periarfissaqarputit.
Iserterluni nuunnermi atuilernermik nalunaaruteqarneq
Illut ataasiakkaat aamma illuni affarleriinni (inissiat inissiarsuarniittut aamma uigulukutsuniittut) nalinginnaasumik immikkut innaallagissamut, imermut aamma kiassarnermut uuttuutinik peqarput. Illit inigisat immikkut uuttuuteqarpat, inimik tigusininnut atatillugu Nukissiorfinnut nalunaartussaavutit.

Inissiamik tigusinnginninni atuilernermik immersugassannik tunineqassaatit, taannalu atsioriarlugu Nukissiorfinnut nassiutissavat imaluunniit tunniutissavat.

Aamma nittartakkakkut imminut sullillutit innaallagissamik, imermik kiassarnermillu atuisussatut nalunaarsinnaavutit.

Nukissiorfinnut innaallagissamik, imermik kiassarnermillu atuilernissamik nalunaarneq

Inissiamik attartortittakkamik tigusinnginninni inissiat immikkoortortaqarfiata uuttuutinik atuiunnaarneq nalunaarutigissavaa, taamaalilluni illit innaallagissamut, imermut aamma kiassarnermut atuinerit immikkoortortap akiligassarilissanngilai. Taamaammat pingaartuuvoq illit uuttuutinik atuilernerit Nukissiorfinnut nalunaarutigissagakku, taamaaliunngikkuit innaallagissap erngullu matuneqarnissaat angoriaannaagakku. Illit uuttuutit nalunaarutiginissaat akisussaaffigaat.
Nuunnermi akiliuteqartarneq
Illut ataasiakkaat aamma illuni affarleriinni (inissiat inissiarsuarniittut aamma uigulukutsuniittut) nalinginnaasumik immikkut innaallagissamut, imermut aamma kiassarnermut uuttuutinik peqarput. Illit inigisat immikkut uuttuuteqarpat, inimit anininnut atatillugu Nukissiorfinnut nalunaartussaavutit.

Uuttuutinik atuiunnaarnerit nalunaarutiginngikkukku, nuunnerpit kingorna innaallagissamut, imermut kiassarnermullu atuineq akilissavat.

Inissiaq attartukkat attartorunnaarniarlugu nalunaaruit, atuiunnaarnissamik immersugassamik tunineqassaatit immersugassannik, taannalu atsioriarlugu Nukissiorfinnut nassiutissavat imaluunniit tunniutissavat.

Aamma nittartakkakkut imminut sullillutit innaallagissamik, imermik kiassarnermillu atuiunnaarnermik nalunaarsinnaavutit.

Innaallagissamik, imermik kiassarnermillu Nukissiorfinnut atuiunnaarnermik nalunaarneq

Ulloq taanna inissiamit aniguit uuttuutinik atuiunnaarnerit nalunaarutigissavat. Assersuutigalugu inigisannit anisussanngorputit 30. juni taava uuttuutit 30. juni-miit atorunnaarnissaat nalunaarutigissavat – aamma tamanna sioqqullugu inigisannit anigaluaruilluunniit.

Ini attartortagaq najorneqanngikkuni, assersuutigalugu sanasut inissiami suliaqarniassammata inissiat immikkoortortaqarfiata inissiap innaallagissamut, imermut kiassarnermullu uuttuutit nalunaarutigissavai atussasut.
Imermut kiassarnermullu naatsorsuineq
Illut ataasiakkaat aamma illuni affarleriinni (inissiat inissiarsuarniittut aamma uigulukutsuniittut) nalinginnaasumik immikkut innaallagissamut, imermut aamma kiassarnermut uuttuutinik peqarput. Illit inigisat immikkut uuttuuteqarpat, inimik tigusininnut atatillugu Nukissiorfinnut nalunaartussaavutit.

Illut affarleriit (inissiat inissiarsuarniittut aamma uigulukutsuniittut) nutarsarneqanngitsut, imermut kiassarnermullu uuttuuteqanngillat. Tassa imaappoq, inissiat ataasiakkaat imermik kiassarnermillu atuinerat uuttorneqarsinnaanngillat. Atuinerit pillugu akilersuinak, imermut kiassarnermullu qaammatit tamaasa siumut akilersuissaatit.

Nukissiorfiit sinnerlugit imermut kiassarnermullu siumut akiliutit naatsorsuutaat ukiumut ataasiarlugit INI-mit akilerneqartarput.

Imermut kiassarnermullu siumut akiliuteqarneq
Imermut kiassarnermullu siumut akiliuteqaraangavit, qaammammut aningaasat aalajangersimasunik amerlassusillit akiliutigisassavatit:
• Illit inissiavit angissusia aamma imermut akigititat tunngavigalugit imermut siumut akiliuteqarneq naatsorsorneqartarpoq. Imermut akigititat illoqarfimmit illoqarfimmut allanngorartarput aamma imermik atuineq inissianut immikkoortortaqarfimmit inissianut immikkoortortaqarfimmut allanngorartarluni
• Illit inissiavit angissusia aamma inissisimanera kiisalu kiassarnermut akigititat uuliallu akia tunngavigalugit kiassarnermut siumut akiliuteqarneq naatsorsorneqartarpoq

Imermut kiassarnermullu akigititat allanngorneri
Imermut, kiassarnermut uuliamullu akigititat qaffappata imaluunniit apparpata, imermut kiassarnermullu siumut akiliinikinnerunissat imaluunniit akiliinaarnissat pinngitsoortinniarlugu, imermut kiassarnermullu siumut akiliutit iluarsineqassapput.

Allannguutit atuutilernissaannut kingusinnerpaamik sap. ak. pingasut sioqqullugit, akit qaffariarnerini allannguutit INI-mit ilimasaarisoqartarpoq.

Imermut kiassarnermullu ukiumoortumik naatsorsuineq
Ukiup ingerlanerani imermik kiassarnermillu atuinermut annikippallaamik annertuallaamilluunniit akiliuteqarsimanersutit paasiumallugu, ukiumut ataasiartumik INI naatsorsuutinik suliaqartarpoq. Illit inissiaqarfivit immikkoortortaqarfiani tamakkiisumik imermik atuinera aamma illit kiassarnermut immikkoortortaqarfinni tamakkiisumik kiassarnermik atuinera, inissiat attartortittakkat assigiinngitsut angissusiinut agguataarneqarnerat tunngavigalugit naatsorsuutit suliarineqartarput. Tassa imaappoq tamakkiisumik atuinerup ilaanut inissiaq 120 kvadratmeteriusoq inissiamit 90 kvadratmeteriusumit annertunerusumik akiliuteqartussaavoq.

Tamatuma saniatigut inissiami qanoq sivisutigisumik najugaqarnikuunerit akiliuteqartitsinissami eqqarsaatigineqartussaavoq. Assersuutigalugu juni-mi anillutit nuussimaguit, januar-imit juni ilanngullugu tamakkiisumik atuinermi illit atukkatit taamaallaat akilissavatit.

Kingusinnerpaamik 30. april INI-mit allagarsissaatit, tassani allaqqassaaq illit inissiaqarfinnut aamma kiassarnermut immikkoortortaqarfinnut tamakkiisumik atuinermut tunngatillugu ukiup ingerlanerani annikippallaamik annertuallaamilluunniit akiliuteqarsimanersutit.
Akiliuteqaqqusineq aamma utertitsilluni akiliuteqarneq
Imermut imaluunniit kiassarnermut siumut akiliutit annikippalllaartut akilersimagukkit, girokort-ikkut akiliiffissamik nassinneqassaatit aningaaserivimmi imaluunniit allakkerivimmi akiligassannik.

Imermut imaluunniit kiassarnermut siumut akiliutit annertuallaartut akilersimagukkit, aningaasat sinneruttut utertillugit ilinnut akilerneqassapput. INI-mut kinguaattoorutinik akiligassaqaruit aningaasanik ilinnut utertitsinneqarnissat pilersinnagu taakku akilersinneqassapput.

Aningaasanik tunniussineq isumamineersumik aningaaserivimmi konto-nnut pissaaq. Taamaattumik konto normut najukkanni INI-p allaffeqarfianut tunniunnissaa pingaaruteqarpoq. Najukkannit nuussimaguit INI-mut najukkat nutaaq taamaammat nalunaarutigissavat.
Naammagittaalliuuteqarneq
Ukiup ingerlanerani imermut aamma kiassarnermut annikippallaamik imaluunniit annertuallaamik akiliuteqartarsimanersutit paasiniarlugu, INI ukiumoortumik ataasiartumik naatsorsuutinik suliaqartarpoq.

Naatsorsuutit kukkusuusut isumaqaruit naammagittaalliuteqarnissamut periarfissaqarputit. Imermut imaluunniit kiassarnermut naatsorsuutit pillugit naammagittaalliuteqarniaruit, allaganngukkamik naammagittaalliummik suliaqassaatit.

Naammagittaalliuut makkuninnga pinngitsoornani imaqassaaq:
• Atuisutut normut (assersuutigalugu 36-163-0001-02)
• Ateq aamma najugaq
• Postnormu

Ukiumoortumik nalunaaruteqarnermut atatillugu INI-mit tigunikuusat naatsorsuutit saqqaa ilanngutissagakku aamma eqqaamassavat.

Illit naammagittaalliutit kingusinnerpaamik 1. august INI-p tigoreersimasussaavaa.

Naammagittaalliutit nassiutissavat uunga ini@ini.gl. E-mail atorlugu nassiussinissamut periarfissaqanngikkuit, najukkanni INI-p allaffeqarfianut naammagittaalliutit aamma tunniussinnaavat.
INI A/S
E-mail: ini@ini.gl
Oqarasuaat: 70 10 00
Fax: 86 57 00

Ammasarfii:
Ataasinngornermiit tallimanngornermut 08.00 - 16.00
Inissialiornermut tapiissuteqartarneq 10.00 - 14.00

Toqqaannartumik sianerfissat:
Inissiat attartortittakkat: 70 10 00, 1 tooriarlugu 1 toorlugu
Inissialiornermut tapiissuteqartarneq aqqutigalugu illuutit (Boligstøttehuse): 70 10 00, 1 tooriarlugu 2 toorlugu
Saaffiginnittarfik: 70 10 00, 1 tooriarlugu 9 toorlugu

Nittartagaq: www.ini.gl