Inissiap qalipannissaanut ilitsersuut

Nalinginnaasumik paasissutissiineq

INI-p inissiaataa attartortittagaq tassaavoq pisortat inissiaataat attartortittagaq, Namminersorlutik Oqartussanit imaluunniit kommuninit pigineqartoq aammalu INI-mit aqunneqartoq. Tassa imaappoq INI-p inissiamut tunngasut nalinginnaasut amerlasuut isumagisarpai. Naak attartortutut najugaqaraluarlutit – tassa inissiaq nammineq piginagu – inissiami iikkat qilaallu nammineq qalipassavatit naterlu lakkerlugu.

Qalipaaneq sulianik suliarinnittarnikkut eqqortumik suliarineqassaaq qalipaatillu tamarmik akuerisaasumik pitsaassuseqarlutik. Misileraanaveersaarit tamanna akisoorujussuanngorsinnaammat.

Sulineq peqqissaartumik pitsaasumillu ingerlakkaanni tamatigut akilersinnaajuaannarpoq. Taamatut suliat inerneri pitsaanerpaat angussavatit.

Qalipannerit naammassigukku, qalipanneqartut tamarmik qaavi assigiiaartumik qalipaateqarlutillu qillissuseqassapput. Itersat quppallu matoorneqarsimassapput aammalu qaavi killingilu attorlugit manissuussallutik.

Innersuussutigineqassaaq nateq lakkertissagit aammalu sulianik suliarinnittartunut ini isugutasunik suliaqarfiusoq qalipatsillugu.

Suliareqqaarnera

Pitsaasunik qallersimanissaat tamatigut eqqaamasaruk. Qalipanneqassanngillammi:
• Matut alloriusai
• Innaallagissap ikittarfii
• Innaallagissamut ikkuffiit
• Nateq

Qilaamik qalipaaneq

Qilaaq qalipannialerukku, immikkoortut arfinillit makku malissavatit:
1. Qalipaat kaanngalasoq kiliorlugu aallartissutigiuk
2. Qilaaq qaqorsaammik asaammillu peqqissaarullugu asaguk
3. Kingorna imermik akoqanngitsumik peqqissaarullugu asaguk panerserlugulu
4. Peqqissaarullugu qallersuigit, taamaalilluni qalipaat natermut, igalaanut aamma ilitsivinnut serpalissinnaajunnaarniassammat
5. Qilaaq tamakkerlugu eqqiareerpat aamma qallersuisoqareerpat, itersat immerneqassapput manissarlugillu
6. Qilaaq qalipaammik imermik akullugu sanaamik imaluunniit qalipaammik plastikkertalimmik qillarissutsimik 5-iusumik qalipaguk

Eqqumaffigissavat imeq annertuallaaq ataatsikkut atorukku, qilaaq qequssiaasoq aserorsinnaammat.

INI-mit akuersissummik peqanngikkuit, qilaaq qisuusoq qalipassinnaanngilat.

Iikkanik qalipaaneq

Iikkat qalipannialerukkit, immikkoortut sisamat makku malissavatit:
1. Qaqorsaammik asaammillu peqqissaartumik asaagit
2. Kingorna imermik akoqanngitsumik asaagit panerserlugulu
3. Ilitsiviit, innaallagissap ikittarfii, innaallagissamut ikkuffiit naterlu qalipaalluni nipitittakkanik plastikkimillu peqqissaartumik assersukkit
4. Qalipaammik plastikkertalimmik qillarissutsimik 5-iusumik qalipaagit

Iikkat sannakuarartalinnik qallikkat, ilusilikkamik assigisaannilluunniit qallikkat qalipassinnaavatit. Aamma iikkat siusinnerusukkut qalligaasimasut qalipaateqanngitsut qalipassinnaavatit.

Qilaami iikkamilu itersat matooreerukkit, qaliaasiummik asaammilluunniit isugutattumik qillarissarsinnaavatit. Taama iliornikkut killingi piiassavatit sukkinnarunnaarnissaat suliarisariaarullugu.

Qalipaareernerup kingorna

Qalipaat qaqortuunngitsoq atorsimagukku, anillutit nuukkuit inissiap qalipaataa qaqortunngorteqqissagakku eqqaamassavat. Inissiap qaqortumik qalipanneqaqqinnera illit nammineq akilissavat.