airplanebooksbriefcase business cogs cross election entertainment fish house law lockmedicalpeopleselfservices socialtax

Allakkat Digitaliusut

Kommunerisannuinnaq aalajangersimasunik paasissutissaqarpoq

Kommune toqqaruk
Nalinginnaasumik paasissutissiineq

Allakkat digitaliusut tassaapput illit digitaliusunik allagarsiivinnut nassiussarsiarisartakkatit.

Digitaliusumik allakkerinerup pisortatigut oqartussaasut suliffeqarfiillu isumannaatsumik attaveqaqatiginissaannut periarfissipaatit.
e-Boks tassaavoq internettikkut digitalimik allagarsiivik, taannalu atorlugu allagarsiatit digitaliusut pissarsiarisassavatit.

Pisortatigut oqartussaasunit allagarsiassatit digitaliusut pingaarutillit tamarmik isumannaatsumik e-Boksimiittassapput. Taakkulu qarasaasianniit, tabletsinniit smartphonenniillu atuarsinnaavatit.

Allagarsiatit digitaliusut e-Boks.dk-mi atuarsinnaavatit.

 

Piumasaqaatit

1.apriili 2020 aallarnerfigalugu, 15-inik ukioqalereersimaguit, pisortanit digitalimik allagarsisalernissannut inatsisitigut pisussaatitaalissaatit.

Inatsisartut Pisortani Digitalimik Allakkerineq pillugu inatsit juunimi 2017-imi akueraat, tassanilu allassimavoq innuttaasut suliffeqarfiillu pisortatigut oqartussaasunit digitaliusunik allagarsisalernissaat 1. apriili 2020 aallarnerfigalugu piumasaqaataalissasoq.

e-Boks-eqarnissannut makku piumasaqaataapput:

  • NemID-eqassaatit
  • Kalaallit Nunaanni najugaqassaatit
  • 15-inik ukioqalereersimassaatit

 

Qanoq iliussaanga?

NemID pigisat isissutitut atorlugu allagarsiatit digitaliusut e-boksikkut ammarsinnaavatit. NemID pigisat pisortat namminersortullu imminut sullinnissamut aaqqiissuutaannut isissutissaavoq isumannaatsoq.

Allagarsiatit digitaliusut atuarniarukkit, imaaliussaatit:

Nittartakkamut www.e-boks.dk-mut iseriarlutit ”Log på privat” toqqariarlugu NemID pigisat atorlugu isissaatit.

Siullermeerlutit e-Boks-imut iserniaruit ”Ny bruger” toqqassavat, ”Log på privat”-ilu toorukku nemadgang.dk-mut ingerlateqqinneqassaatit, tassanilu NemID pigisat isertaatitut atussavat.

NemID pigisat atorlugu isernialeruit atuisutut ilisarnaatit aamma isertaatitut kodet allassavatit. Taamaalioriarlutit, kode nøglekortimiittoq allassavat imaluunniit NemID-mut app atorlugu isernissat akueralugu.


Imaaliornikkut akeqanngitsumik NemID-taarsinnaavutit:

  • Najugarisanni innuttaasunut sullissivimmut nunaqarfinniluunniit kommunip allaffianut saaffiginnillutit. Makku arlaat nassarnissaat eqqaamassavat:
    - pas-i atuuttoq
    - kørekortit
    - kuisinnermut allagartaq aamma najugaqarnermut uppernarsaat.
  • Aningaaseriviit aqqutigalugu
  • Nittartagaq NemID.nu aqqutigalugu NemID-iissannik inniminniillutit.
    NemID-mik inniminniissaguit pas-i Danmarkimeersoq nunatsinneersorluunniit atuuttoq pigissavat.

NemID pillugu annerusumik ugguuna atuarit, ilitsersuissutitulluunniit videoliat takukkit

 

Akigititat

e-Boks-imik atuineq akeqanngilaq, e-Boks-imilu qanoq amerlatigisunik allagarsiaqarsinnaaneq killilersorneqarani.

 

Kiap allakkanik digitaliusunik nassittassavaanga?

Pisortatigut oqartussaasut soorlu kommuunini Namminersorlutillu Oqartussani ingerlatsiviit suliffeqarfiillu allakkanik digitaliusunik innuttaasunut nassiussisarsinnaapput.

Allakkat tassaasinnaapput Akileraartarnermut Aqutsisoqarfimmit ukiumut naatsorsuutit, kommunimiilluunniit ilisimatitsissutitut allakkat.

Suliffeqarfinnit namminersortunit allakkanik digitaliusunik aamma allagarsisinnaavutit. Taamaattorli tamanna periarfissaasinnaassappat suliffeqarfik namminersortuusoq e-Boksimut nassiussisinnaasussatut attavilersimasariaqassaaq illillu allagarsisinnaassaguit e-Boks-eqartariaqassallutit.
Eqqumaffigissavat suliffeqarfinnit namminersortunit allakkanik digitaliusunik aatsaat allagarsisinnaagavit, suliffeqarfik e-Boks-imut attavilersissimappat.

 

Allat allagarsiannut isertaasersinnaavakka?

e-Boks-imi allagarsiatit allanut atuartissinnaanngorlugit isertaatilersinnaavatit. Tassani inuk tatigisat toqqassavat.

e-Boks-innut iserlutit imaaliorlutit allat isertaasersinnaavatit:

  1. Menu (toqqagassat) tooruk
  2. Adgange (iserfissat) tooruk
  3. Giv andre adgang (allat isertaasikkit) tooruk

Tassani uku immersussavatit:

  • Inuup isertaaserniakkavit atia inuullu normua.
  • Isumannaallisaanissamullu kode illit nammineq toqqakkat.
    Inummut kukkusumut isertaasiinnginnissaq kodip isumannaassavaa, assersuutigalugu inuup normua kukkusumik allanneqarsimappat.

Inuk isertaaserneqartoq isersinnaalernissani imannak atuutsilissavaa:

  1. Menu (toqqagassat) tooruk
  2. Adgange (iserfissat) tooruk
  3. Toortagaq Accepter for den nye adgang (isertaaserneqarnermik akuersissut) tooruk

Isumannaallisaanissamut kodeliussaq allaguk, isertaaserneqarnerlu atuutilissaaq. Allagarsiat ”Mit overblik”-ip toorneratigut takuneqassapput.

 

Allagarsiakka allanut ingerlateqqissinnaavakka?

Allagarsianut ataatsimoorussamik toqqorsiveqartoqarsinnaanngilaq.
Kisianni ”Giv andre adgang” (allat isertaasikkit) atorsinnaavaat, assersuutigalugu aapparisallu allagarsiassinnik isumaginneqatigiittassagussi. Immissinnut isertaasersimagussi illit aapparisavillu allagarsisarfissinnut isertaat ataasiinnaq atorlugu, allagarsisarfisi marluullusi takusinnaalissavasi. Marluullusi atuisartuunissarsi piumasaqaatituaavoq.

Allagarsisarfissinnut immissinnut attavilerniarlusi qulaani qulequttami ”Allagarsiannut allat isertaasersinnaavakka”-mi ilitsersuut malittariuk.

 

Meeqqama e-Boks-issaannik pilersitsisinnaavunga?

Meeqqatit 15-it inorlugit ukioqarpata e-Boks-imut ilanngussinnaapput atorfinitsitaanerup ilaatut e-Boks-ikkut aningaasarsianut allagarsisassagunik, imaluunniit aningaaseriviup isumaqatigiissuteqarfiginerata ilaattut kontomi aningaasanut atukkanut takussutissanik pissarsisarniarunik.
Taamaattoqassappat angajoqqaat namminneq e-Boks-iminniit meeqqamik e-Boks-iani atuarsinnaanissaminnut isertaatitaartinneqarnissaannut pilersitsinissamik e-Boks ikiuisinnaavoq.

Malugiuk
e-Boks-imut attaveqarneq taamaallaat atuisartooreersunut pilersinneqartarpoq. Meeqqatit nassitsisumit namminersortumit allagarsineq ajorpata attaviliisoqarsinnaanngilaq.

 

Killiliussat

1. april 2020 aallarnerfigalugu innuttaasut suliffeqarfiillu, pisortanit oqartussaasuniit digitaliusunik allagarsisalernissaat piumasaqaataasumik atuutsinneqalissaaq.

 

Inatsisit
Attavissaq

Allakkat Digitaliusut pillugit apeqqutissaqaruit oqaaseqaatissaqaruilluunniit Digitalimik Sullissinermut Aqutsisoqarfimmut allassinnaavutit ugguuna: digitalpost@nanoq.gl