Suliffeqarnermut ikiorsiissutit aqqutigalugit sulisartut akissarsianik taarsiiffigineqarallarnissaannut qinnuteqarit

Maana qinnuteqarit

Covid-19-ip siammatsaaliornissaa anguniarlugu killilersuisoqarnerata nalaani takornarialerinermik inuussutissarsiuteqarfinni sulisut, soraarsinnagit angerlartinneqarsimasut, akissarsiaannut taartisiaqartoqarallarsinnaanissaa anguniarlugu Naalakkersuisut aalajangiussaqarsimapput.

Ilitsersuummi matumani atuarsinnaavat qanoq suliffeqarfittut akissarsisartut akissarsianik taarsiiffigineqarallarnissaannut qinnuteqarsinnaanerlutit.

Aammattaaq atuarsinnaavat aaqqissuussamut ilaatinneqarsinnaanermut suut piumasaqaataanersut.

Malugiuk
Ataani allassimasut ilitsersuutaannaammata aammalu aaqqissuussamut aalajangersakkat qaqugumulluunniit atuuttut ”Inuussutissarsiortunut ikiorsiissutissat ataatsimoortitat”-ni takuneqarsinnaammata.

Una toorlugu ”Inuussutissarsiortunut ikiorsiissutissat ataatsimoortitat” aajuk

Akissarsianut taartisiaqarsinnaaneq
Suliffeqarfinnut ikiorsiissutit suliffeqarfinnut Covid-19-ip siammatsaaliornissaa anguniarlugu killilersuisoqarnerata nalaani minnerpaamik sulisumi 30 %-iinik imaluunniit sulisunik 25-t sinnerlugit soraarsitsisariaqarsimasunut atuuppoq.

Aaqqissuussaq takornariartitsinermik inuussutissarsiuteqartunut atugassiaavoq. Suliffeqarfiit takornariartitsinermik inuussutissarsiuteqartutut taaneqartut tassaapput tunngaviusumik suliarisartakkaminni minnerpaamik 50 %-imik isertitaqartartut. Tamannalu suliffeqarnermut ikiorsiissutit pillugu malittarisassani aamma allassimavoq.

Piumasaqaatit
Sulisut 1. januar 2021-p kingorna akissarsiassallit aammalu akissarsisimasunut taamaallaat taartisiassaannik suliffeqarfittut qinnuteqarsinnaavutit. Suliffeqarfimmi (CVR) qinnuteqartumi sulisut qinnuteqaatigineqartut 1. Januar 2021 tikitsinnagu sulisooriissapput pineqartullu 1. januar 2021-p kingorna sulinerat kipisinneqarsimassalluni.

Suliffeqarfittut sulisutit aningaasaqarneq tunngavigalugu suliunnaarsitsisimagaluarlutit, suliffeqarfinni kingusinnerusukkut sulisorisavit allat akissarsiaannut taartisiaqarsinnaanerannut qinnuteqarsinnaavutit.

Akissarsianut taartisiaqarsinnaanermut qinnuteqarneq siusinnerpaamik pisinnaavoq suliunnaarsitsinerup ulluani siullermi. Sulisunnut suliunnaarsinneqareersimasunut, naak suliunnaarfissap nallernissaata tungaanut suliffeqarfimmi suligaluartut, akissarsianut taartisiassaannik qinnuteqarsinnaanngilatit.

Taartisiassat ullut 14-kkaarlugit qaammatikkaarlugilluunniit naatsorsorneqartarput.

Piffimmi pineqartumi sulisut akissarsiaqartinneqarneri
Sulisunut angerlartitaasimasunut suli tamakkiisumik akissarsiaqartitsissasutit piumasaqaataavoq.

Suliffeqarfiup taartisiassai
Sulisumut atorfilimmut pineqartumut tamakkiisumik akissarsiassat 90 %-ii (suliffeqarfiup soraarnerussutissarsiassanut ileqqaarutissanut tapiissutaa ilanngullugu) tassaassaaq akissarsianut taartisiassaq. Sulisumut ataatsimut akissarsianut taartisiassaq qaammammut annerpaamik 20.190 koruuniussaaq.

Piffissap ilaanaani sulisunut akunnermusialinnullu taartisiassaq naatsorsorneqalerpat, tamakkiisumik sulisup akissarsiarisartagaanut sanilliussisoqassaaq.

Taartisiassat ima naatsorsorneqartarput:

    a) Sulisumut ataatsimut ulluni 30-ni tamakkiisumik sulisumut akissarsianut aningaasartuutit 90 %-iat (suliffeqarfiup soraarnerussutissarsiassanut ileqqaarutissanut tapiissutaa ilanngullugu) taartisiarsissutaasinnaavoq, annerpaamilli 20.190 koruunit ullunut 30-inut akisarsianik taartisiaqarfissami pissarsiarineqarsinnaavoq.

    b) Ullut akissarsiffiusussat ullunit 30-nit ikinneruppata, ullukkaarlugit naatsorsoriarlugit sanilliullugit naatsorsorneqassapput.

    c) Akissarsianut aningaasartuutaasunut oqartussanit tapiissutit qinnuteqartup qinnuteqaataanit ilanngaatigineqartarput.
    Akissarsiassaagaluanut taartisiassat naatsorsornerani akileraarutinut sulisitsisullu akitsuutaannut qaammammi pineqartumi akiliutigineqartussanut 30 %-it illuartinneqartarput.


Malugiuk
Sulisoq sulileqqippat taartisiaqartitsineq atorunnaarsinneqassaaq.

Qinnuteqarneq
Taartisiassanut qinnuteqarniaruit immersugassaq digitalimik immersussavat, ugguuna: linki

Malugiuk
Piffissami aalajangersimasumi sulisut angerlartinneqarsimasut akissarsiassaat ataatsimut qinnutigissavatit.

Paasissutissat pisariaqartinneqartut tamaasa nassiunnerlugit qulakkiissavat.

Qinnuteqarninni tulliuttut ilanngunneqassapput:

  • Suliffeqarfiup aqqa, CVR normu, suliffeqarfiullu kode-a (branchekode).
  • Tlf.nr., mobil aamma E-mail.
  • Kontonormu (Taartisiassat tunniunnissaannut).
  • Sulisut angerlartinneqartut annertussusaat (minnerpaamik 30 % imaluunniit minnerpaamik sulisut 25).
  • CPR-normu, akissarsiat sulinerullu annertussusaa (tamakkiisumik imaluunniit ilaannakortumik sulisuunersoq).
  • Piffissaq qinnuteqarfiusoq kiisalu sulisoqarsinnaannginnermut tunngavilersuut, assersuutigalugu suliassaaleqineq.
  • Akissarsiat allagartai kingulliit.
  • Excel ark, sulisut qinnuteqaatigineqartut tallimanit amerlaneruppata
  • Uppernarsaalluni neriorsuuteqarlunilu nalunaarut


Sulisut amerlassusaannik naatsorsuinermi suliffeqarfimmi atorfillit aallaaviussapput.

Qinnuteqaruit, qinnuteqaatit Akileraartarnermut Aqutsisoqarfimmit suliarineqassaaq.

Qinnuteqaatit suliarineqareerpat aalajangiussaq ilinnut nassiunneqassaaq.

Taartisiaqarnissaq akuerineqarpat aningaasat piaartumik tunniunneqassapput.

Sulisunik amerlanerusunik angerlartitsisoqartoqartillugu
Suliffeqarfigisat akissarsianut taartisiassanik qinnuteqareersimappat arlaatigulli ajornerusumik pisoqalerpat sulisunillu amerlanerusunik angerlartitsisoqartariaqalerluni, taamaasillutillu akissarsianut taartisiassanik pisariaqartitsinerulissallutit, taava suliffeqarfik sulisut angerlartinneqarsimasut pillugit qinnuteqartoqarsinnaavoq.

Akissarsianut aningaasartuutit:

  1. piffissami taartisiaqarfiusinnaasumi akissarsiassaassapput. Tassa imaappoq piffissaq akissarsiffiusoq akissarsiap allagartaani allassimassaaq. Piffissarlu taanna suliffeqarfiup taartisiaqarfigerusuppagu, taava akissarsiamut allagartaq nassiunneqassaaq.
  2. piffissami uani pissapput januaarip aallaqqaataa 2021 – oktoberip 31-at 2021, ullut pineqartut ilanngullugit.

 

Suliffeqarfiup aqutsisuisa uppernarsaalluni neriorsuuteqarlunilu nalunaarut atorlugu, paasissutissat tunniunneqartut tamarmik eqqortuusut uppernarsassavaat.

Qinnuteqarnermut atatillugu uppernarsaalluni neriorsuuteqarlunilu nalunaarut anillatseriarlugu, atsioriarlugu, scanneriarlugu uploaderneqassaaq.

Una toorlugu ”Uppernarsaalluni neriorsuuteqarlunilu nalunaarut” aajuk

Taamungaannaq tigooraalluni misissuineq
Aaqqissuussinerup atorunnaarnerata kingorna, suliffeqarfik taamungaannaq tigooraalluni misissuisoqarnerani misissorneqarsinnaapput, tassungalu atatillugu piumasaqaataasinnaavoq akissarsiallit sinniisaat imaluunniit sulisut inniisaat peqataatinneqassasoq.

Uppernarsaasiineq naatsorsueqqissaartartumik ikiorteqarluni suliarineqarsinnaavoq.

Taartisianik uterteqqusineq
Taartisiassat uterteqquneqarsinnaapput tulliuttut tunngavigalugit:

    A. Qinnuteqartup piffissami akissarsianut taartisiassaqarnerup nalaani aningaasaqarneq peqqutigalugu sulisunik angerlartitsisimaguni.
    B. Qinnuteqartup sulisoq taartisianik akissarsiaqartinneqartoq sulitissimappagu.
    C. Qinnuteqartup akissarsianut taartisiaqarnissamut qinnuteqaammik suliaqarnermini paasissutissanik eqqunngitsunik tunniussisimappat.
    D. Qinnuteqartoq qulaani piumasaqaatinik naammassinninnani malinninnaniluunniit akissarsianut taartisianik pissarsisimappat.

 

Nammineerlutit qulakkiissavat nalinginnaasumik ingerlaavartumillu qaammatikkaartumik Akileraartarnermut Aqutsisoqarfimmut A1-imik nalunaaruteqarnissap ingerlanneqarnissaa.

Sulisut angerlartinneqarsimasut piffissami taartisiaqartinneqarfiup nalaani suleqqusaanngillat.

Sulisut angerlarsimaffissap nalaani suliffeqarfimmut qinnuteqarsimasumut sullississanngillat – imaluunniit sulisitsisumut allamut akissarsiaqarlutik sullississanatik (imaluunniit suliffigeriikkaminni sulinerulissanatik.)

Akissarsianut taartisiaqartitsisoqartarpoq sulisut ilaannakortumik angerlartinneqarsimappat sulisorlu piffissami pineqartumi tamakkiisumik akissarsiaqartinneqassalluni.

Akissarsianut taartisiaritinneqartup annertussusaa tassaassaaq piffissaq angerlarsimaffigineqartoq.

Sulisorisat soraarsissimagukku nalinginnaasutuulli suliffeerunnermut ikiorsiisutit imaluunniit oqartussanit ikiorsiissutit pillugit malittarisassat atuutissapput.

Pineqartumut akissarsianik taartisiassanik pissarsisinnaanngilatit.

Sulisoq piffissami taartisiaqarfiusumi pinngitsoorani ulluni 5-ni sulinngiffeqartinneqassaaq / qaangiuttoornermut taarsiullugu sulinngiffeqartinneqassaaq.

Piffissaq taartisiaqarfiusoq ullunit 30-nit ikinneruppat ullunilu 14-init ikinneruppat sulinngiffeqarnissaq ulluni 2,5-ni pissaaq. Taartisiaqarfissaq ullut 14-it sinnerpagit 30-llu ataappagit, sulinngiffeqarnissaq ulluni tallimani pissaaq.

Sulisut sulinngiffeqarnerminni akissarsiaqartinneqarsinnaanngippata, taarsiullugu akissarsiaritinneqartussaq ullunik 2,5 / 30-nik 5/30-nilluunniit ilanngarneqassaaq.

Qinnuteqaammut nassiussannut atatillugu Akileraartarnermut Aqutsisoqarfiup aalajangigaanut maalaaruteqarnissamut pisinnaatitaaffeqarputit.

Maalaarummik nassiussiniaruit, maalaarutigisat mail-ikkut uunga nassiutissavat STmaalaarut@nanoq.gl

Maalaarutinni allassimassapput:

  • aalajangiinermut sooq maalaaruteqarnersutit tunngavilersuutit allassavatit
  • uppernarsaatit attuumassutillit kakkiutissavatit:
    • uppernarsaatit
    • uppernarsaatit


Maalaarutinut allattoqarfimmit maalaarutigisat suliarineqassaaq.

Maalaarutigisat suliarineqareerpat, Inuussutissarsiornermut Sulisoqarnermullu Naalakkersuisoqarfimmiit mail-ikkut attavigineqarumaarputit.

Uannga allanneqarpoq: Inuussutissarsiornermut Suliffeqarnermullu Naalakkersuisoqarfik

Inuussutissarsiornemut Suliffeqarnermullu Naalakkersuisoqarfik
Imaneq 1A - 201
Postboks 390
3900 Nuuk

Oqarasuaat: (+299) 34 50 00
E-mail: ISIIN@nanoq.gl
Nittartagaq: www.naalakkersuisut.gl
Innuttaasumut

sullissivik.gl-imut tikilluarit

Sullissivik Innuttaasumut isilerputit. Suliffeqarfiutilimmut nuunniaruit, qulaani ‘Suliffeqarfiutilimmut’ toqqassavat.