Nunanut allanut tuniniaanissamut akuersissummik qinnuteqarit

Suliffeqarfiit inuussutissarsiornermik ingerlataqartut aammalu inuit ataasiakkaat inuussutissarsiummik ingerlataqartut aningaasarsiutigalugu tunisassiaminnik Kalaallit Nunaannit nunanut allanut tuniniaanissaminnik kissaateqartut nunanut allanut tuniniaanissamut akuersissummik Inuutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiisitaanermullu Naalakkersuisoqarfimmit pissarseqqaarsimasariaqarput.

Immersugassamik quppernermi uani nanineqarsinnaasumik immersuinikkut nunanut allanut tuniniaanissamut akuersissummik qinnuteqartoqarsinnaavoq.

Nunanut allanut tuniniaanissamut akuersissut tassaavoq suliffeqarfiup aningaasarsiutigalugu Kalaallit Nunaannit nioqqutissanik akuerisaasumik annissisinnaaneranut uppernarsaat. Nunanut allanut tuniniaanissamut akuersissut nunani aalajangersimasuni immikkut atuuttussaatitaanngilaq, taamaattumillu suliffeqarfiup nunanut allanut tuniniaasartup pisussaaffigaa nunami tunitsivigineqartumi maleruagassanik misissuissalluni taakkununngalu naleqqussaasalluni. Nioqqutissat Kalaallit Nunaannit nunanut allanut tuniniarneqarsinnaanerat imaanngilaq nioqqutissaq nunami tunitsiviusumi imaasiallaannaq eqqunneqarsinnaasoq.

Nunanut allanut tuniniaanissamut akuersissummik pissarsiniaruit suliffeqarfigisat qinnuteqaatitut immersugassamik immersueriarluni qinnuteqaammik nassitsissaaq. Tamatuma saniatigut makku atuutsinneqarput:

• Inuinnartut nunanut allanut tunisaqartartutut Kalaallit Nunaanni najugaqassaatit imaluunniit,
• Ingerlatseqatigiiffik nunanut allanut tuniniaasartoq Kalaallit Nunaanni najugaqartutut nalunaarsorneqarsimassaaq.

Malugalugu:
Inuussutissanik soorlu aalisakkanik inuussutissanillu allanik nunanut allanut tuniniarneqartussanik tunisassiorniaraani suliffeqarfiup tunisassiorfigisallu Kalaallit Nunaanni Uumasunut Nakorsaqarnermut Inuussutissalerinermullu Oqartussaqarfimmiit (UNIO) suliffeqarfittut inuussutissaleriffiusutut akuerineqarsimanissaat piumasaqaataavoq.

Nioqqutissianik uumasunit pisunik nunanut allanut nioqquteqarnermi suliffeqarfik pissutsit ilaanni Danmarkimi Fødevarestyrelsen akuerineqarsimassaaq akuersissummillu normulimmik peqartussaalluni.

Suliffeqarfiit puisinik puisinillu tunisassianik nunanut allani nioqqutigineqartussanik tunisassiortartut nassitsinerit tamaasa naggueqatigiit Inuit pineqannginneranik uppernarsaammik Aalisarnermut Piniarnermullu Naalakkersuisoqarfimmit pissarseqqaarsimasartussaapput.
Puisinik nunanut allanut nioqquteqartarnermut tunngatillugu apeqqutit Aalisarnermut Piniarnermullu Naalakkersuisoqarfimmut ingerlanneqarsinnaapput, una aqqutigalugu: UUMASUT@nanoq.gl

Nunanut allanut nioqquteqarsinnaanissamut akuersissummik qinnuteqarneq tunineqarnerluunniit akeqanngillat.

Nunanut allanut nioqquteqarsinnaassagaanni qinnuteqaatitut immersugassaq immersorneqarsimassaaq.

Qinnuteqaatinnut ilanngullugit makkua nassiutissavatit:

• Danmarkimi Fødevarestyrelsenimit akuersissutit
  
  

Malugiuk:
MitID-it atorlugu iserlutit, qinnuteqaatit attaveqaatitigut aatsaat nassiussinnaavat.

Qinnuteqaat Inuutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiisitaanermullu Naalakkersuisoqarfimmit tiguneqaruni, Inuussutissarsiutinut Immikkoortortaqarfimmi sulianik sullissisumut attuumassutilimmut ingerlateqqinneqassaaq.

Qinnuteqaat misissorneqarlunilu suliarineqassaaq. Suliassat piffissap ilaanni suliarineqartarneri sivisuumik ingerlasinnaasarpoq, taamaattumik nunanut allanut niuersinnaanissamut piffissaagallartillugu qinnuteqartarit.

Akissut akuersissullu mailimut qinnuteqarnermi ilisimatitsissutigineqartumut nassiunneqassapput.

Nunanut allanut tuniniaanissamut akuersissut pissarsiarereernikup allanngortinnissaa kissaatigineqarpat tamanna Naalakkersuisoqarfimmut saaffiginninnikkut pisinnaavoq.

Allannguutinut ilaapput:

• nunanut allanut tunisassiarineqartartut allannguutaat ilassutaalluunniit,
• tunisassiat kodeat allanngorsimanerat imaluunniit
• suliffeqarfimmulluunniit tunngatillugu paasissutissat allanngorsimanerat

Allannguutit immersugassami allannguutit toqqarneratigut naalakkersuisoqarfimmulluunniit mailernikkut: isiin@nanoq.gl pisinnaavoq.

Ukioq kaajallallugu qinnuteqarsinnaavutit. Nunanut allanut niuersinnaanissamut akuersissut ukioq naallugu atuutsinneqartarpoq 31.decemberimilu atorunnaartarluni.

Nunanut allanut niuerneq ingerlaannartussaatillugu ukiut tamaasa nutaamik qinnuteqartoqartassaaq.

Nunanut allanut niuersinnaanissamut akuersissutip pigineqartup ulloq atorunnaarfissaa nallerpallaartinnagu qinnuteqarfissarititaasup naalernerani nutaamik qinnuteqartoqartarnissaa kaammattuutigineqarpoq, suliassat sivisunerusumik suliarineqarsinnaasarmata.

Nunanut allanut niuersinnaanissamut akuersissummik qinnuteqaatinnut nassiussannut atatillugu inuussutissarsiornermut Immikkoortortaqarfiup aalajangigaa pillugu naammagittaalliuteqarsinnaatitaavutit.

Naammagittaalliuut mailikkut nassiunneqarsinnaavoq uunga isiin@nanoq.gl

Naammagittaalliuut makkuninnga imaqassaaq:

• Naammagittaalliuutip tunngavilersornera
• Allagaatit attuumassuteqartut
  - Qinnuteqarnermi immersugassaq
  - Suliffeqarfiup Inuussutissarsiornermut Immikkoortortaqarfiullu akornanni attaveqaqatigiittarsimanerit
  - Aalajangerneq

Naammagittaaliuutit Inuussutissarsiornermut Immikkoortortaqarfimmit suliarineqartassapput suliarinerilu ullut 15-it angullugit sivisussuseqartarsinnaalluni.

Naammagittaalliuutigineqartoq suliarineqareerpat suliffeqarfik mail atorlugu Inuussutissarsiornermut Immikkoortortaqarfimmit attavigineqassaaq.