Misileraalluni aalisarnissamut qinnuteqaat

Maana qinnuteqarit

Misileraalluni aalisarnikkut aalisariaatsinut nutaanut ineriartortitsinissamut periarfissat, aalisariaatsinik allanik nutaanilluunniit atuinissaq aamma aalisarnerni ingerlanneqareersuni piniutit allat atorneqartarnerat ilisimasaqarfiulersinnaapput.

Misileraalluni aalisarneq sinerissamut qanittumi avataasiorluniluunniit ingerlanneqarsinnaavoq. Misileraalluni aalisarnikkut imaaliortoqarsinnaavoq:

  • Artit ilisimaneqanngitsut assersuutigalugit eqqusat misilerarneqarsinnaapput,
  • Sumiiffiit ilisimaneqanngitsut assersuutigalugit siusinnerusukkut aalisarfiusimanngitsut misilerarneqarsinnaapput,
  • Aalisarnermi periaatsit imaluunniit atortuutit nutaat misilerarneqarsinnaapput.

Misileraalluni aalisarnissamut siunnersuutissaqaruit, Aalisarnermut, Piniarnermut Nunalerinermullu Naalakkersuisoqarfimmut saaffiginnissaatit.

 

Misileraalluni aalisarnissamut aalisarnermut akuersissummik pissarserusukkuit naatsorsuutigineqarsinnaanissannut tunngaviusumik piumasaqaatit arlallit naammassisimassavatit, taakkununngalu ilaapput:

  • Inuussutissarsiutigalugu aalisartuussaatit, imaluunniit kalaallit piginneqatigiilluni umiarsuaatileqatigiiffiani piginneqataassaatit, imaluunniit pineqartoq kalaallit ingerlatseqatigiiffigissavaat
  • Ingerlatseqatigiiffik aktiaateqarluni ingerlatseqatigiiffiussaaq, piginneqataassuteqarluni ingerlatseqatigiiffiussaaq, piginneqatigiiffiussaaq imaluunniit piginneqatigiilluni umiarsuaatileqatigiiffiussalluni
  • Ingerlatseqatigiiffiup aningaasaataasa minnerpaamik 2/3-lii inunnit ataasiakkaanit toqqaannartumik imaluunniit toqqaannanngitsumik pigineqassapput, taannalu
    • Kalaallinut inuiaqatigiinnut aalajangersimasumik attuumassuteqassaaq,
    • Kalaallit Nunaanni inuit nalunaarsorsimaffianni nalunaarsorsimassaaq ukiullu siuliini marlunni Kalaallit Nunaanni inuit nalunaarsorsimaffianni nalunaarsorsimassalluni,
    • aamma Kalaallit Nunaanni tamakkiisumik akileraartartuusaaq ukiullu siuliini marlunni Kalaallit Nunaanni akileraartartuusimassalluni.

Malugiuk
Misileraalluni aalisarnermi nalunaaruteqartarnissamut nalilersuisarnissamullu piumasaqaateqarmat maluginiassavat.

Misiliutissanik Pinngortitaleriffiup misissugassaanik tigusisarnissaq aamma piumasaqaataasinnaavoq. Tamanna aalajangiinermi tunnavinni akuerissummiluunnit takuneqarsinnaavoq.

 

Misileraalluni aalisarnermut akuersissummik qinnuteqarusukkuit misileraalluni aalisarneq pillugu immersugassaq immersussavat. KNAPK-mit kommuninnilluunniit qinnuteqarnermi immersugassap immersornissaanut ikiorneqarsinnaavutit.

Qinnuteqaatinni paasissutissat makku saqqummiutissavatit:

  • Sooq misileraallutit aalisarusunnersutit
  • Aalisagaq sorleq / aalisakkat sorliit aalisarusunneritit
  • Sumi aalisarusunnerlutit
  • Qanoq annertutigisut kissaatigaagit aamma qanoq annertutigisut aalisassallugit naatsorsuutigaajuk
  • Aalisaatit periaatsillu suut atussallugit kissaatigaagit
  • Angallat suna / Angallatit suut aalisarnermi atorneqassappat
  • Missingersuutit aamma taperneqarnissamut qinnuteqarnerlutit

Qinnuteqarnermut immersugaq eqqortumik immersussavat, ilanngussassallu attuumassuteqartut ilanngutissavatit
  • Ingerlatseqatigiiffimmik piginnittuunermut allagartaq atuuttoq
  • Angallatip uuttuutai pillugit allagartap assilinera
  • Angallatip naalagaaffimmut attuumassuteqarneranik uppernarsaatip assilinera

Una tooruk, misileraallunilu aalisarnissamut qinnuteqarlutit

 

Misileraalluni aalisarnissaq Naalakkersuisunit pilersinneqareerpat, qinnuteqarnissamut piffissarititaasoq aamma misileraalluni aalisarnermut tunngaviliussat uani tamanut nalunaarutigineqassapput: Naalakkersuisut.gl

Misileraalluni aalisarnissamut akuersissummik qinnuteqaatit nassiutereerukku taanna nalunaarsorneqassaaq, tiguneqarneranillu uppernarsaammik pissarsissaatit. Qinnuteqaativit suliarisinnaanissaanut Naalakkersuisoqarfik paasissutissanik amerlanerusunik ilinnit pisariaqartitsissappat attavigineqarumaarputit.

  • Qinnuteqaatit aatsaat suliarineqassapput qinnuteqarnissamut piffissarititaasup qaangiutereernerani.
  • Qinnuteqaatit tamarmik qinnuteqarnermut piffissarititaasup qaangiutinnginnerani tiguneqarnikuusut Naalakkersuisoqarfimmit suliarineqartarput.
  • Tunngavissat Naalakkersuisunit aalajangersarneqartut aallaavigalugit qinnuteqaatit suliarineqartarput.
  • Misileraalluni aalisarnermut pisassiissutit Naalakkersuisunit agguaanneqartarput.
  • Sulianik ingerlatsineq naammassereerpat, Naalakkersuisullu qinnuteqartunut pisassinneqartunut akuersissutinik tunniussereerlutik pisassiissutinik agguaassereernerisigut, qinnuteqartunut pisassinneqarsimanngitsunut itigartitsissummik tunngavilersukkamik nassiussisoqassaaq.
  • Ileqquusutut qinnuteqarnissamut piffissarititaasup sap.ak.-nik pingasunik qaangiutereernerani qinnuteqaatinnut akissummik tigusaqassaatit.

 

Misileraalluni aalisarnissaq Naalakkersuisunit pilersinneqareerpat, aalisakkanut aalajangersimasunut pineqartunut qinnuteqarnissamut piffissarititaasoq Aalisarnermut, Piniarnermut Nunalerinermullu Naalakkersuisoqarfimmit uani tamanut nalunaaruteqassaaq: Naalakkersuisut.gl.

 

Oqartussat aalajangeeriaasiat pillugu aallaaviatigut maalaaruteqarsinnaanngilatit. Qinnuteqaatilli akuerineqassanngikkaluarpat tunngavilersuummik tunineqarumaarputit. Aalajangiineq kukkusumik tunngavilerneqarsimasorigukku imaluunniit paatsoortoqarsimasoq Aalisarnermut, Piniarnermut Nunalerinermullu Naalakkersuisoqarfimmut maalaaruteqarsinnaavutit, taassanilu ilinnut suliaq nalileqqitassatut ingerlassinnaavaa. Qinnuteqaativit akuerineqannginneranut allakkiaq tigugukku piaarnerpaamik maalaarutit nassiutissavat.

Maalaarutit allakkatiguussaaq aamma sooq sunalu pillugu maalaaruteqarerlutit allassavat. Eqqaamallugu maalaarutigerusutat pillugu aalajangiinerup assilinera ilanngutissagakku, taannami suliap ingerlanneqarneranut iluaqutaassammat.

Aalisarnermut Piniarnermut Nunalerinermullut Naalakkersuisoqarfiup maalaarutit nalilersussavaa suliarlu ilinnut tunngasoq ingerlanneqareerpat attavigineqarumaarputit.

 

Uanga allanneqarpoq: Aalisarnermut immikkoortortaqarfik

Aalisarnermut, Piniarnermut Nunalerinermullu Naalakkersuisoqarfik
Imaneq 1A, 701
Postboks 269
3900 Nuuk

Oqarasuaat: (+299) 34 50 00
Fax: (+299) 34 63 55
E-mail: apnn@nanoq.gl
Nittartagaq: www.apnn.gl
Innuttaasumut

sullissivik.gl-imut tikilluarit

Sullissivik Innuttaasumut isilerputit. Suliffeqarfiutilimmut nuunniaruit, qulaani ‘Suliffeqarfiutilimmut’ toqqassavat.