NemID ajorallarpoq. Ajoqutaasoq Nets-ip iluarsiiviginiarlugu sulissutigaa. Pisarissersuineq utoqqatsissutigaarput.

Qaleralinniarnermi angallatinut pisassiissutit nammineq pigisat

Sinerissap qanittuani aqutsiveqarfinni Qeqertarsuup Tunuani, Upernavimmi Uummannamilu (aqutsiveqarfik 47-mi) angallat 6 meterinit takinerusoq atorlugu inuussutissarsiutigalugu qaleralinniarusukkuit taava pisassiissutit ilaannik pigisaqassaatit.
Taamaaliortariaqarputit sumiiffimmi tassani pisassiissutit nammineq pigisat niuerutigineqarsinnaasut (PNNP) atorneqarmata.

PNNP tassaavoq 'pisassiissutit niuerutigineqarsinnaasut nammineq pigisat'. Pisariaqartitatit naapertorlugit pisassiissutit nammineq pigisat ilaannik tunisillutillu pisisinnaavutit.
Aqutsiveqarfinni ataasiakkaani tamani Qeqertarsuup Tunuani, Upernavimmi Uummannamilu qalerallit pisassiissutit tamarmiusut (TAC) Naalakkersuisunit ukiut tamaasa aalajangersarneqartarput.

Ukiut tamaasa TAC Naalakkersuisut aalajangertarpaat, pisassiissutinit nammineq pigisatit tunngavigalugit qalerallit tonsit qassit pisarisinnaaneritit naatsorsortarpaat (ukiumut pisassiissutit). Angallatinut pisassiissutit ilaannik pigisaqarneq malillugu pisassiissutinik pigisaqartunut assigiinngitsunut agguaasoqartarpoq. Pisassiissutinik nammineq pigisaqaruit atuisinnaatitaaffeqarputit, tassa imaappoq ukiumut pisassiissutinik ilinnut tunniunneqartunik atuisinnaaneq.

Inuussutissarsiutigalugu aalisartutut aalisarnermut malittarisassat piumasaqaatillu aalajangersarneqarsimasut malinnissaannut pisussaaffeqarputit.

 

Aqutsiveqarfinni Qeqertarsuup Tunuani, Upernavimmi Uummannamilu qaleralittassiissutit ilaannik pisiniaruit piumasaqaatit pisussaaffiillu tullinnguuttut tamaasa naammassisimassavatit:

  • Ingerlatseqatigiiffiuteqaruit taannalu aktiaateqarluni ingerlatseqatigiiffiussaaq, piginneqataassuteqarluni ingerlatseqatigiiffiussaaq, piginneqatigiiffiussaaq imaluunniit piginneqatigiilluni umiarsuaatileqatigiiffiussalluni.
  • Qaleralinniarsinnaassaguit Kalaallit Nunaanni nalunaarsorsimasumik angallataateqassaatit. Aalisarsinnaanermut akuersissummik tigusaqaruit angallatip akuersissutaatinnut ilanngunnissaanut qaammatinik 18-inik piffissaqarputit.
  • Kalaallit Nunaanni najugaqartutut inuit nalunaarsorsimaffianni nalunaarsorsimassaatit, Kalaallit Nunaannilu inuit aqqisa nalunaarsorsimaffianni ukiuni kingullerni marlunni nalunaarsorsimassallutit.
  • Kalaallit Nunaanni tamakkiisumik akileraartartuussaatit ukiullu siuliini marlunni Kalaallit Nunaanni akileraartartuusimassallutit.
  • Attavigineqarnissamut paasissutissiinissamik pisussaatitaavutit, soorlu angallatip aalisarnermut atortuutaanni ateq kinguliarlu, angallatip atia GR-normualu paasissutissiissutigineqassallutik.
  • Sumiiffimmi 47-mi angallatinut pisassiissutinit tamarmiusunit 5 %-init amerlanerusunik pigisaqarsinnaatitaanngilatit.

Ingerlatseqatigiiffinnut aalisarnermi pisassiissutit ilaannik piserusuttunut piumasaqaatit:

  • Ingerlatseqatigiiffiup aningaasaataasa minnerpaamik 2/3-lii inunnit ataasiakkaanit toqqaannartumik imaluunniit toqqaannanngitsumik pigineqassapput, taannalu
  • Kalaallinut inuiaqatigiinnut aalajangersimasumik attuumassuteqassaaq (piginnittuunermut uppernarsaat aamma inuit allattorsimaffiat)
  • Kalaallit Nunaanni inuit nalunaarsorsimaffianni allanneqarsimallutik najugaqartunit Kalaallit Nunaannilu inuit nalunaarsorsimaffianni allanneqarsimallutik ukiuni siuliini marlunni najugaqarsimasunit,
  • Ukiuni qaammatisiuteqarfiusuni marlunni siuliini Kalaallit Nunaanni tamakkiisumik akileraartussaatitaasimassaaq

Aqutsiveqarfik 47-mi angallatinut piumasaqaatit:

  • Angallatit minnerpaamik 6 meterinik tamakkiisumik takissuseqassaaq.
  • Angallatit sutigulluunniit annerpaamik 15 meterinik tamakkiisumik takissuseqassaaq. Ukiup siuliani pisassiissuteqarfiusumi angallammik 19,99 BRT/31,99 BT angullugu usitussusilimmik aalisarsimaguit angallammut tassunga pisassiissutinik suli pissarsisinnaavutit.
  • Angallatit Søfartsstyrelsip angallatinut nalunaarsuiffiani nalunaarsorsimasussaavoq.

 

PNNP sunaanersoq, kiisalu pisassiissutit niuerutigineqarsinnaasut nammineq pigisat aamma ukiumut pisassiissutit assigiinngissutaat matumani naatsumik nassuiarneqassapput, taakkumi pisinermut tunisinermullu isumaqatigiissummi allassimammata.

Qaleralinniarnermi taamaallaat aqutsiveqarfik 47-mi PNNP tunngavigalugu aalisarneq periarfissaavoq, tamannalu taamaallaat angallatinut tamakkiisumik 6 meterinik takinerusunut atuuppoq. Tamannalu isumaqarpoq aqutsiveqarfik 47-mi qaleralittassiissutit tamarmiusut, tassa Qeqertarsuup Tunuani, Upernavimmi Uummannamilu, aalisariutinut umiatsiaaqqanullu agguarneqassapput. Umiatsiaararsortut pisassiissutigineqartut ataatsit aalisartarpaat pisassiissutillu tamakkerneqaraangata aalisarneq unitsinneqartarpoq. Aalisariutinut atatillugu aalisariutit tamarmik immikkut pisassaannik pisassinneqartarput. Pisassiissutit niuerutigineqarsinnaasut nammineq pigisatit annertussusaat naapertorlugu ukiumut pisassinneqartassaasit. Pisassiissutinik niuerutigineqarsinnaasunik nammineq pigisaqarneq qaleralinnik aalisarsinnaanermut pisinnaatitsivoq. Tamanna isumaqarpoq tamakkiisumik ukiumut pisassiissutaasunit illit aalisarsinnaanissannik.
Inatsit naapertorlugu ingerlatseqatigiiffiit inuilluunniit ataasiakkaat tamakkiisumik pisassiissutinit tamarmiusuniit 5 %-nik amerlanerusunik pisisinnaanngillat. Pisassiissutit niuerutigineqarsinnaasut nammineq pigisanik aatsaat pisisimaguit ukiumut pisassiissutinik tunineqarsinnaavutit.

Pisassiissutinik niuerutigineqarsinnaasunik nammineq pigisassannik pisisimaguit, nammineq pigisanik ukiumullu pisassiissutinik niueruteqarnissamut periarfissaqarputit.

Pisassiissutinik niuerutigineqarsinnaasunik nammineq pigisanik pisineq tunisinerlu
Pisassiissutit niuerutigineqarsinnaasut nammineq pigisat tassaapput pisassiissutit tamarmiusut procentiisa ilaat. Assersuutigalugu pisassiissutit niuerutigineqarsinnaasut nammineq pigisat tamarmiusut 2 %-iinik pisassiissutinik pisisinnaavutit. Pisassiissutit niuerutigineqarsinnaasut nammineq pigisatit tunngavigalugit ukiut tamaasa ukiumut pisassiissutinik tunineqartassaatit. Tassa taakku amerlassutsit ukiumi pineqartumi aalisarsinnaasatit. Pisassiissutinik niuerutigineqarsinnaasunik nammineq pigisatit tamakkerlugit ilaannaaluunniit allanut tunisinnaavatit. Pisassiissutit niuerutigineqarsinnaasut nammineq pigisatit tunigukkit pisineq allanngortinneqarsinnaanngilaq. Pisassiissu ilaat tamaasa tunigukkit, aalisariummik sumiiffimmi aalisarsinnaajunnaassaatit. Pisassiissutit ilaasa ilaat tunigukkit aalisarsinnaasatit ikilissapput. Pisassiissutit ilaat amerlanerusut kissaatigigukkit, allamit pisassiissutit ilaannik tunisaqarusuttumit pisiarisariaqassavatit. Ukiumi tullinnguuttumi pisassiissutit ilaat tunngavigalugit aatsaat pisassiissutit amerlassusaannik tunineqarsinnaavutit. Assersuutigalugu ukiumi pineqartumi novembarimi pisassiissutit ilaannik pisisimaguit, ukiup tulliani januarimi pisassiissutit annertussusaannik pigisannik akuersissummik tunineqassaatit pisassiissutit.

Ukiumut pisassiissutinik pisineq tunisaqarnerlu
Ukiumut pisassiissutit amerlassusaat tassaapput pisassiissutit niuerutigineqarsinnaasut nammineq pigisatit tunngavigalugit ukioq manna tonsit aaliagartassiissutisiatit. Taakku amerlassusaat nikerartarput pisassiissutit tamarmiusut amerlassusaat nikerararaangata. Pisassiissutit niuerutaasinnaasut nammineq pigisatit pisassiissutit tamarmiusut 2 %-iinik pigisaqaruit, taakku assersuutigalugu ukiumi pineqartumi 200 tonsit ilinnut qaleralittassiissutaasinnaapput. Pisassiissutit taakku pisiarisinnaallugillu tunisinnaavatit. Ukiumut pisassiissutit amerlassusaannik pisineq tunisinerlu ukiumut pineqartumut taamaallaat atuuppoq.

Ukiumut pisassiissutinik pisiniaruit pisassiissutinik niuerutigineqarsinnaasunik nammineq pigisaqaqqaassaatit, tamatumanilu aqutsiveqarfik 47-mi qaleralinniarnissamut akuersissut aamma pigeqqaartariaqarpat. Pisassiissutinik niuerutaasinnaasunik nammineq pigisanik aatsaat pisisimaguit ukiumut pisassiissutinik pisisinnaalissaatit, pisassiissutinik niuerutaasinnaasunik nammineq pigisatit aallaavigalugit ukiup tulliani pisassiissutinik aatsaat tunineqarsinnaavutit.

Pisassiissutit niuerutigineqarsinnaasut nammineq pigisatit qularnaveeqquserneqarsimappata, qularnaveeqqusiisup (ass. banki) piumasaqaatigaa pisineq namminneq akuereqqaassallugu. Ukiumut pisassiissutinik tunisineq pisassiissutit niuerutigineqarsinnaasut nammineq pigisanik attartortitsinertut inissinneqassanngilaq.

 

Ukiumut pisassiissutinik pisassiissutinilluunniit niuerutigineqarsinnaasut nammineq pigisassanik piserusukkuit qaleralinnik pisassanik niuerfimmi pisassiissutaatillit assigiinngitsut allattorsimaffianni nanisinnaavatit. Pisassanik niuerfik tassaavoq pisassat aalisarneqarsimanngitsut pillugit nalunaarsuiffik.

Kalaallit Nunaanni Aalisarsinnaanermut Akuersissutinik Nakkutilliisoqarfimmut (KANUAANA-mut) gflk@nanoq.gl saaffiginninnikkut nalunaarsuiffik ilinnut nassiunneqarsinnaavoq.

 

NemID atorneqarsinnaanngilaq.

 

Pisassiissutit niuerutigineqarsinnaasut nammineq pigisanik pisiniaruit tunisiniaruilluunniit, niueqatigiinnermi isumaqatigiissut pisisumit tunisisumillu immersugassaq immersorneqarsimassaaq.
Tunisup pisisullu aqqi aalisarsinnaanermullu akuersissutaasa normui/CVR normuilu ilanngunneqassapput.

Pisassiissutit niuerutigineqarsinnaasut nammineq pigisatit qularnaveeqquserneqarsimanersut aamma ilisimatitsissutigissavat. Pisassiissutit niuerutigineqarsinnaasut nammineq pigisat qularnaveeqquserneqarsimappata qularnaveeqqusiisumit akuersinermut uppernarsaat ilanngutissavat.

Una toorlugu sinerissap qanittuani qaleralinniarnermi inunnut ataasiakkaanut pisassiissutit niuerutigineqarsinnaasunik pisineq tunisinerlu pillugit isumaqatigiissutip aajuk

Isumaqatigiissut e-mailikkut Aalisarnermut Piniarnermullu Naalakkersuisoqarfimmut akuerisassanngorlugu nassiutissavat.

 

Aalisarnermut Piniarnermullu Naalakkersuisoqarfiup pisineq tunisinerlu pillugit isumaqatigiissutigisat e-mailikkut tiguppagu, aalisarnermut immikkoortortaqarfimmi sulianik sullissisumut eqqortumut ingerlateqqinneqassaaq.
Qinnuteqaativit tiguneqarsimaneranik uppernarsaammik e-mailikkut tigusaqassaatit.
Suliap suliarineqarnera ullunik suliffiusunik qulinik sivisussuseqarsinnaavoq.
Naalakkersuisoqarfiup pisinermut tunisinermullu piumasaqaatit naammassisimaneritit misissussavai.

Qinnuteqaatit akuerineqarsimanersoq itigartinneqarsimanersorluunniit pillugu akissut mailimut pisineq tunisinerlu pillugit isumaqatigiissummik nassiussissutigisannut nassiunneqassaaq.
Niueqatigiinneq Naalakkersuisoqarfiup akuerippagu aalisarsinnaanermut akuersissutinik nutaanik pisassiissutitallit tigussavatit.

 

Pisassiissutit niuerutigineqarsinnaasut nammineq pigisanik PNNP-nik peqaruit pisassiissutinik nuussisinnaavutit.
Pisassiissutinik nuussinikkut ukiumut pisassiissutit amerlassutsit tunniunneqarsimasut ullorsiutini ukiumut januaarip aallaqqaataanit decembarip naanissaata tungaanut eqaatsumik atorluaasinnaavutit.

Taamaattumik pisassiissutinik nuussinikkut makku periarfissaraatit:

  • Siumut nuussineq - Ukiumut pisassiissutit amerlassusaat aalisarneqanngitsut ukiumi tullinnguuttumi aalisarsinnaavatit
  • Kingumut nuussineq - Ukiup tullianut pisassiissutigineqartunit nuussinikkut ukiumi matumani aalisarsinnaavatit

Siumut nuussineq
Ukiumut pisassiissutit amerlassusaat ukiumi pineqartumi aalisarneqarsimanngitsut ukiumi tullinnguuttumi aalisarneqarsinnaapput. Taakku amerlassutsit ukiumi tullinnguuttumi juulip aallaqqaataata tungaanut aalisarneqarsinnaapput.
Aalisarnermut Piniarnermullu Naalakkersuisoqarfimmit ukiup siulianit pisassiissutit tamakkerneqanngitsut sinnerit ukiumut pisassiiffiusumut tullermut nuunneqartarput. Ukiumut pisassiissutinit amerlassutsit aalisarneqanngitsut Naalakkersuisoqarfimmit nuunneqassapput malitsigisaanillu akuersissut aaqqitaq nassiunneqassalluni.

Kingumut nuussineq
Ukiup naannginnerani ukiumut pisassiissutisiatit tamaasa aalisarsimagukkit, ukiup tulliani ukiumut pisassavit aalisarnissaanut qinnuteqarsinnaavutit. Tamannalu 15. november-imiit qinnutigisinnaalissavat. Tamanna Aalisarnermut Piniarnermullu Naalakkersuisoqarfimmut e-mailimik nassiussinikkut pissaaq, tassanilu ukiumit tullinnguuttumit pisassiissutit qanoq amerlatigisut nuunniarnerlugit allassavatit.
Tamatuma kingorna pisassiisutit niuerutigineqarsinnaasut nammineq pigisatit tunngavigalugit ukiumut tulliuttumut aalisagartassiissutisiassannit ilanngaatigineqassapput. Ukiumut pisassiissutit amerlassusaat nutaat akuersissummut nutartikkamut ilanngullugit nassiunneqassapput.
Amerlassutsit qinnutiginikuusatit tamaasa ukiup naannginnerani aalisarsimanngikkukkit, taakku ukiumut nutaamut nuunneqarumaarput.

Malugiuk: Ukiumut pisassiissutit amerlassusaat kingumut nuussinikkut imaluunniit aalisarneqarsimanngitsunik siumut nuussinikkut pissarsiarineqarsimasut tuniniarneqarsinnaanngillat.

 

Pissutsit atugarisatit pillugit paasissutissat allanngorpata Aalisarnermut Piniarnermullu Naalakkersuisoqarfimmut ilisimatitsisussaatitaavutit. Assersuutaasinnaapput ingerlatseqatigiiffiutit angallataatilluunniit pillugit allannguinerit.

Allannguinerit pillugit tigusaqartoqariarpat nutaamik akuersissusiunneqassaatit, tassanilu paasissutissat nutaat ilaatinneqassapput.

Inuussutissarsiutigalugu aalisartutut paasissutissat eqqortuunissaannut akisussaaffeqarputit.

 

Pisassiissutit niuerutigineqarsinnaasut nammineq pigisat ukiumullu pisassiissutit amerlassusaannik pisinissamut tunisinissamut akuerineqarnissamut ukioq naallugu qinnuteqarsinnaavutit.

 

Aalisarnermut Piniarnermullu Naalakkersuisoqarfiup aalajangiinerta maalaarutigineqarsinnaanera periarfissaanngilaq.

 

Uannga allanneqarpoq: Aalisarnermut immikkoortortaqarfik

Aalisarnermut, Piniarnermullu Naalakkersuisoqarfik
Imaneq 1A, 701
Postboks 269
3900 Nuuk

Oqarasuaat: (+299) 34 50 00
Fax: (+299) 34 63 55
E-mail: apn@nanoq.gl
Nittartagaq: www.apn.gl
Innuttaasumut

sullissivik.gl-imut tikilluarit

Sullissivik Innuttaasumut isilerputit. Suliffeqarfiutilimmut nuunniaruit, qulaani ‘Suliffeqarfiutilimmut’ toqqassavat.