NemID ajorallarpoq. Ajoqutaasoq Nets-ip iluarsiiviginiarlugu sulissutigaa. Pisarissersuineq utoqqatsissutigaarput.

Kapisilinniarsinnaanermut akuersissummik qinnuteqarit

Maana qinnuteqarit

Kapisilinnik inuussutissarsiutigalugu aalisarniaruit aalisarsinnaanermut akuersissummik peqartariaqarputit.

Quppernermi uani kapisilinnik aalisarnissamut piumasaqaatit malittarisassallu immikkut ittut pillugit atuarsinnaavutit.
Inuussutissarsiutigalugu aalisartutut aalisarnermut malittarisassat piumasaqaatillu aalajangersarneqarsimasut malinnissaannut pisussaaffeqarputit. Taakkunani peqqussutit angerlarsimaffittut kommunerisanni immikkuullarissinnaasut, soorlu sumiiffinnut eqqissisimatitanut illersuisut, aamma atuutsinneqarput. Kommunini ileqqoreqqusat pillugit inatsisit.gl-imi paasisaqarnerusinnaavutit.

Inuussutissarsiutigalugu aalisartutut nalunaartarnissamut pisussaaffeqarputit. Pisarisatit sanitigullu pisarisuukkatit nalunaarutigisartussaavatit. Saniatigut pisarisuukkani aalisakkat tunisaanngitsut, timmissat, miluumasut imarmiut, pupiit koral-illu pineqarput.

Kapisillit pisarineqartut ullut tamaasa nalunaarutigineqartussaapput. Pisaqarsimanngikkaangavit (0-mik pisaqarsimannginnermi) imaluunniit aalisariarsimanngikkaangavit aamma nalunaaruteqartassaatit.

Pinngortitap eriagineqarnissaanut nammineerlutit akisussaaffeqarputittaaq. Imaq ataatsimoorulluta isumalluutigaarput ataatsimoorlutalu aamma akisussaaffigaarput.

Kapisilinniarneq inuuniutigalugu aalisarneruvoq, taamaammallu kapisillit avammut nioqqutigeqqusaanngillat tunitsivinnullu tuniniaqqusaanatik. Taamaammat inuussutissarsiutigalugu aalisartutut taamaallaat kalaalimineerniarfinnut suliffeqarfinnulluunniit tunisisinnaavutit.

Sinerissap qanittuani kapisilinniarnerni Kalaallit Nunaat tamaat ataatsimut pisassiissutinik aalajangersaaffigineqartarpoq, taakkulu inuussutissarsiutigalugu aalisartunut saniatigooralugulu aalisartunut agguaanneqartarput. Kapisilinniarneq paggatassiinertut ingerlanneqartarpoq, tassanilu inuussutissarsiutigalugu aalisartut tamarmik pisassiissutinut taakkununnga aalisartarput. Pisassiissutit tamarmik aalisarneqarneqareeraangata aalisarneq unitsinneqartarpoq.

Imatut inissisimaguit akuersissummik qinnuteqarsinnaavutit:

  • inuttut ataasiinnartut
  • ingerlatseqatigiiffittut

Aalisarsinnaanermut akuersissut ukunani atuuppoq:

  • Sumiiffimmut killilikkamut ataatsimut,
  • Ukiumi ataatsimi januaarip aallaqqaataaniit decembarip 31-ianut, imaluunniit
  • Piffissami aalisarfiusumi ataatsimi Aalisarnermut Piniarnermullu Naalakkersuisoqarfimmit nalunaarutigineqartumi.

Atlantikumi kapisilinniarneq aqutsinermut pilersaarut aallaavigalugu aqutsivigineqarpoq.

Una toorlugu Kalaallit Nunaanni atlantikumi kapisilinnik aalisarnissamut aqutsinissamut pilersaarut atuarsinnaavat

 

Inuussutissarsiutigalugu aalisartutut aalisarsinnaanermut akuersissut pillugu qinnuteqarsinnaanermut piumasaqaatit makku naammassisimassavatit:

  • Kalaallit Nunaanni akileraarutinut akiliisarputit, ukiunilu kingullerni marlunni akiliisarsimallutit
  • Kalaallit Nunaanni najugaqartuuvutit, ukiunilu kingullerni marlunni najugaqartuusimallutit
  • Ukiuni kingullerni marlunni inuussutissarsiutigalugu aalisarnermik inuussutisssarsiuteqarsimassaatit. Ukiuni kingullerni marlunni aningaasarsiarisappit 2/3-ii inuussutissarsiutigalugu aalisarnermiit pisuusimassapput.
  • Qassutit kapisilinniutit nammineerlutit pigissavatit.
  • Umiatsiaaqqamik angallammilluunniit nammineerlutit pigisaqarputit, taakkulu takissutsimikkut annerpaamik 12,8 meteriussapput (42 fod).
  • Pisarisimasatit ukiup siulianeersut piffissaliussaq qaangiutsinnagu nalunaarutigisimavatit (akuersissummik pigisaqarsimassaguit).

Sumi najugaqartuunissamut piumasaqaammit immikkut akuersissuteqartoqarnissaa pillugu qinnuteqarnissannut periarfissaqarputit. Paasisaqarnerorusukkuit Aalisarnermut Piniarnermullu Naalakkersuisoqarfik attavigineqassaaq.

 

Kapisilinniarneq sinerissap qanittuani taamaallaat ingerlanneqartarpoq. Aalisarneq aqutsiveqarfinnut pingasunut agguarneqarnikuuvoq.

  • Kitaata Avannaa (64°15'-ip avannaatungaani)
  • Kitaata Kujataa (A-p 64°15'-ip kujataatungaa)
  • Kalaallit Nunaata Kangia (sineriaa tamakkerlugu)

Aalisarsinnaanermut akuersissummik tunineqarsimaguit taanna aqutsiveqarfimmut najukkannut qaninnerpaamut atuutissaaq.

Malugiuk: Kapisillit kuuat sunngiffimmi aalisartunit taamaallaat atorneqaqqusaavoq. Sumiiffimmi kuummi aalisarneq aamma kuup akuaniit 1000 meterit angullugit aalisarsinnaaneq pineqarpoq.

 

Naalakkersuisut kapisilinniarnermut piffissarititaasoq KNAPK isumasioqatigalugu kinguliani allaqqasut malillugit aalajangertarpaat.

 Aqutsiveqarfik:   Aalisarnermi piffissarititaasoq: 
 Avannaata kitaani  1/9 - 31/10
 Kujataata kitaani  1/8 - 30/9
 Kangiani  15/8 - 15/10

Aalisarnermut Piniarnermullu Naalakkersuisoqarfimmiit nalunaaruteqartoqareerpat aalisarneq aallartissaaq, pisisassiissutillu aalisarneqareerpata unissalluni.

 

Inuussutissarsiutigalugu kapisilinnik aalisarnermi atortut uku atorneqassapput:

  • Qarsorsat aamma
  • Amerlanerpaamik qassutit 20-t 2000-inik qilernillit, taakkulu nigartaat annerpaamik 140 mm-iussapput
  • Qassutit imminnut pitussimasut 5-t tungaannut.

Kapisilinut aalisarnermut atortuutinnut piumasaqaatit makku atuupput:

  • Aalisarnermut atortuutit piginnittup aqqanik aamma/imaluunniit angallatip taaguutaanik ersarissumik ilisarnaaserneqarsimassapput. Nalunaaqutsiussat imermit arrortinneqarsinnaassanngillat.
  • Aalisarnermut atortuutit tamarmik atorneqareernermikkut igittarnissaannut nammineerlutit akisussaaffigaat. Aalisarnermut atortuutit nalunaaquttap akunneri 24-t iluanni qaqissinnaassanngikkukkit tamanna KANUAANA-mut nalunaarutigissavat. 3 sømilit iluanni tunngaviusumik killeqarfiup iluani atortuutitit annaasimagukkit tamanna aamma kommunimut nalunaarutigissavat.

Malugiuk: Qassutit tissukartittakkat atorneqaqqusaanngillat.

 

Kapisilinnut aalisarsinnaanermut akuersissutit pillugit qinnuteqassaguit nammineerluni immersuinissamut toortagaq sungaartoq "Maana qinnuteqarit" quppernermi uani qullerpaamiittoq atorlugu qarasaasiakkut qinnuteqarsinnaavutit. Immersuiffissaq qarasaasiakkut immersorniarukku nassiunniarukkulu "Immersoruk nassiullugulu" toqqaruk.

Nammineerluni immersuiffissamut aaqqiissutissaq/webi atorniarukkit nammineerlutit NemID-it atorlugu qarasaasiamut isissaatit.

Qinnuteqaatinni ilanngussassat makku ilanngutissavatit:

  • Nunami sorlermi najugaqarnermut uppernarsaat, tassanilu uppernarsarneqarsimassaaq angallatigisat Kalaallit Nunaanneersuusoq, ilinnillu pigineqartoq (angallatinut taamaallaat atuuppoq)
  • Angallatip takissusaanut uppernarsaat, tassanilu angallatip pisinnaassusaa uppernarsarneqassaaq (angallatinut taamaallaat atuuppoq)
  • Pisariaqarpat angallammut tunngatillugu pisinermut uppernarsaat atsiugaq, taannalu nunami sorlermi najugaqartuunermut uppernarsaataagallartutut atorneqassaaq
  • Piginnittuunermut uppernarsaat (ingerlatseqatigiiffinnuinnaq attuumassuteqarpoq)

Toortakkap sungaartup "Ugguuna qinnuteqarit" toorneratigut qarasaasiakkut nammineerlutit immersuiffissamik immersuillutit aallartissaatit.

 

Kapisilinnut aalisarsinnaanermut akuersissummik qinnuteqarniaruit qinnuteqarnermut immersugassaq immersorneqassaaq.
Toortakkap sungaartup ”Ugguuna qinnuteqarit” atorneratigut imaaliorsinnaavutit:

  • "Anisiguk" toqqassavat qinnuteqaat anisinniarukku, assannik immersorniarukku tunniunniarukkulu (NemID-qarnissaq pisariaqanngilaq).

Immersuiffissaq najukkanni innuttaasunik sullissivimmut imaluunniit nunaqarfiup allaffianut tunniutissavat.

Qinnuteqaatigisanni ilanngussassat makku nassassavatit:

  • Nunami sorlermi najugaqarnermut uppernarsaat, tassanilu uppernarsarneqarsimassaaq angallatigisat Kalaallit Nunaanneersuusoq, ilinnillu pigineqartoq (angallatinut taamaallaat atuuppoq)
  • Angallatip takissusaanut uppernarsaat, tassanilu angallatip pisinnaassusaa uppernarsarneqassaaq (angallatinut taamaallaat atuuppoq)
  • Pisariaqarpat angallammut tunngatillugu pisinermut uppernarsaat atsiugaq, taannalu nunami sorlermi najugaqartuunermut uppernarsaataagallartutut atorneqassaaq
  • Piginnittuunermut uppernarsaat (ingerlatseqatigiiffinnuinnaq attuumassuteqarpoq)

 

Qinnuteqaatit nassiutereerukku aalisarsinnaanermut akuersissummik suliaqarneq aallartissaaq.

Qarasaasiaq atorlugu qinnuteqarsimaguit qinnuteqaatit Aalisarnermut Piniarnermullu Naalakkersuisoqarfimmut toqqaannartumik nassiunneqassaaq, tassaniittullu qinnuteqaatigisat suliarissavaat. Qinnuteqaaterpit tigusimaneranut tunngatillugu uppernarsaammik mailikkut akineqarumaarputit.

Qinnuteqaatit assilereerlugu immersorsereerukku qinnuteqaatit kommunip Aalisarnermut Piniarnermullu Naalakkersuisoqarfimmut ingerlateqqissavaa, tassanilu qinnuteqaatit suliarineqassaaq.

Taamaaliornerni marluusuni qinnuteqaat Aalisarnermut Immikkoortortaqarfimmi sulianik suliarinnittartumut attuumassutilimmut ingerlateqqinneqassaaq.

Qinnuteqaaternik suliarinninneq ullut suliffiusartut 10-t missaannik sivisussuseqassaaq. Qinnuteqaativit suliarineqarnissaanut paasissutissat amigarpata attavigineqarumaarputit.

Mail-imut qinnuteqarfissami nalunaarutigisannut qinnuteqaatip akuerineqarsimanera itigartitsissutigineqarsimaneraluunniit akissuteqartoqarumaarpoq.

Qinnuteqaatigisat kommunimut tunniutereersimagukku qinnuteqaatigisat akuerineqarsimanersoq imaluunniit itigartinneqarsimanersoq pillugu kommunimit akissutisiumaarputit.

 

Aalisarsinnaanermut akuersissummi massakkut pigisanni paasissutissanik allanngortoqarsimappat tamanna Aalisarnermut Piniarnermullu Naalakkersuisoqarfimmut paasissutissiissutigissallugu pisussaaffeqarputit. Assersuutaasinnaapput ingerlatseqatigiiffiutit angallataatilluunniit pillugit allannguinerit.

Allannguinerit pillugit tigusaqartoqariarpat nutaamik akuersissusiuunneqassaatit, tassanilu paasissutissat nutaat ilaatinneqassapput.

Inuussutissarsiutigalugu aalisartutut paasissutissat eqqortut tunngavigalugit aalisarnermik ingerlatarnut akuersissummik atuuttumik peqarnissat illit akisussaaffigivat.

 

Kapisilittatit tamaasa Kalaallit Nunaanni Aalisarsinnaanermut Akuersissutinik Nakkutilliisoqarfimmut (KANUAANA-mut) nalunaarutigisassavatit, napittaajaareernerit TAMAASA imaluunniit qarsorsanik qissataammilluunniit pisaqarsimanerit kingorna.

Pisaqarsimanngikkaluaruilluunniit nalunaartartussaavutit (0-mik pisaqarsimannginneq). Kapisilinnik aalisariarsimanngikkaluaruilluunniit aamma nalunaartartussaavutit.
Piffissap aalisarfissap naammassereerneranit kingusinnerpaamik ullut 14-t kingorna KANUAANA-mut nalunaaruteqarsimanngikkuit ukiup tulliani akuersissummik tunineqarsinnaassanngilatit.

Una tooruk kapisilittatillu uani nalunaarutigalugit

 

Aqutsiveqarfigisanni aalisarnerup uninnissaa tikillugu kapisilinnut akuersissut pillugu qinnuteqarsinnaavutit.

Malugiuk: Pisat nalunaarutigisarnerat ullut tamaasa pisassaaq. Aalisarnerup unereernerata kingorna kingusinnerpaamik ullut 14-it qaangiutsinnagit nalunaartarnissaq piffissaliussaavoq. Piffissaliussaq kapisilinnik pisaqarsimanngikkuit kapisilinnillu aalisarsimanngikkuit aamma atuuppoq.

 

Aalisarnermut Piniarnermullu Naalakkersuisoqarfiup aalajangiinerta maalaarutigineqarsinnaanera periarfissaanngilaq.

 

Uannga allanneqarpoq: Aalisarnermut immikkoortortaqarfik

Aalisarnermut Piniarnermullu Naalakkersuisoqarfik
Imaneq 1A, 701
Postboks 269
3900 Nuuk

Oqarasuaat: (+299) 34 50 00
Fax: (+299) 34 63 55
E-mail: aalisa@nanoq.gl
Nittartagaq: www.apn.gl
Innuttaasumut

sullissivik.gl-imut tikilluarit

Sullissivik Innuttaasumut isilerputit. Suliffeqarfiutilimmut nuunniaruit, qulaani ‘Suliffeqarfiutilimmut’ toqqassavat.