Imminut sullississutinut iserniaruit NemID suli isissutissatut atussavat.

Saattuarniarneq

Malugiuk: Sinerissap qanittuani inuussutissarsiutigalugu aalisartutut umiatsiaaqqamik/angallammilluunniit saattuarniarniaruit aalisarnissamut akuersissummik pissarseqqaarsimasariaqaravit

Saattussanik inuussutissarsiutigalugu aalisarniaruit aalisarsinnaanermut akuersissummik peqartariaqarputit.
Saattuarniarnermi immikkut piumasaqaatit maleruagassallu quppernermi uani atuarsinnaavutit. Inuussutissarsiutigalugu aalisartutut aalisarnermut malittarisassat piumasaqaatillu aalajangersarneqarsimasut malinnissaannut pisussaaffeqarputit. Tamatumalu saniatigut ileqqoreqqusat kommunerisannut immikkut atuutsinneqartut soorlu sumiiffiit eqqissisimatitat illersorneqarnissaannut tunngasut malinneqartussaapput. Kommunini ileqqoreqqusat pillugit inatsisit.gl-imi atuarsinnaavatit.

Inuussutissarsiutigalugu aalisartutut nalunaaruteqartarnissamik pisussaaffeqarputit. Pisatit pisarisuukkatillu  nalunaarutigisartussaavatit. Saniatigut pisarisuukkat tunineqarsinnaanngitsut tassaapput aalisakkat, timmissat, miluumasut imarmiut, pupiit koral-illu.
Saattussanik aqitsunik qalerualinnik aalisarnermi saniatigut pisarisuukkat aamma nalunaarutigineqartussaapput.  Saattussanik aqitsunik qalerualinnik aalisarnermi saniatigut pisarisuukkaat pisassiissutinit ilanngaatigineqarneq ajorput.  Pisarineqartuni saattussat aqitsunik qaleruallit 20 %-init sinneqarpata aalisarneq allamut nuunneqassaaq.  

Pinngortitap eriagineqarnissaanut nammineerlutit akisussaaffeqarputittaaq. Imaq ataatsimoorluta isumalluutigaarput ataatsimoorlutalu aamma akisussaaffigalutigu.

Saattuarniarneq aqutsiveqarfinnut agguagaavoq. Aqutsiveqarfiit tamarmik immikkut pisassiiffigineqartarput. Aalisarneq paggatassiinertut ingerlanneqartarpoq, tassanilu aalisartut tamarmik pisassiissutinik taakkunannga aalisartarput. Pisassiissutit tamarmik aalisarneqarneqareeraangata aalisarneq unitsinneqartarpoq.

Saattuarniarneq aqutsinermut pilersaarut malillugu ingerlanneqarpoq.
    
Kitaani saattussanut aqutsinissamik pilersaarut atuarniarukku una tooruk

Pinngortitaleriffiup saattussat aqittunik qaleruallit pillugit isiginnaagassiaaraliaa uani takusinnaavat.

Saattuarniarneq sumiiffinni sinerissap qanittuaniittuni avataanilu ingerlanneqartarpoq.

Saattuarniarneq aqutsiveqarfinnut aqqaneq marlunnut agguagaavoq.  Sumiiffiit arfineq pingasuusut ilaanni aalisarnissamut akuersissut pillugu qinnuteqarsinnaavutit.

  • Upernavik, sinerissap qanittuani (aqutsiveqarfik 37)
  • Qeqertarsuup Tunua - Uummannaq, sinerissap qanittuani (aqutsiveqarfik 36)
  • Sisimiut, sinerissap qanittuani (aqutsiveqarfik 32-K)
  • Sisimiut, avataasiorluni (aqutsiveqarfik 32-H)
  • Maniitsoq - Kangaamiut, sinerissap qanittuani (aqutsiveqarfik 31)
  • Nuuk – Paamiut, sinerissap qanittuani (aqutsiveqarfik 30-K)
  • Nuuk – Paamiut, avataasiorluni (aqutsiveqarfik 30-H)
  • Narsaq – Qaqortoq, sinerissap qanittuani (aqutsiveqarfik 29)

Malugiuk: Ukiumi pisassiiffiusumi ataatsimi aqutsiveqarfinnut amerlanerpaamik pingasunut akuersissutinik qinnuteqarsinnaavutit.

Aqutsiveqarfinni sisamaasuni ukunani misileraalluni aalisarnissanut akuersissut pillugu qinnuteqarsinnaavutit.

  • Upernavik, avataasiorluni
  • Qeqertarsuup Tunua - Uummannaq, avataasiorluni
  • Maniitsoq - Kangaamiut, avataasiorluni
  • Narsaq - Qaqortoq, avataasiorluni

Misileraalluni aalisarsinnaaneq pillugu paasisaqarniaruit una tooruk  

Saattuarniarnermi aqutsiveqarfinni piffissaq aalisarfiusartoq assigiinneq ajorpoq:

1. januar - 31. december:

  • Narsaq – Qaqortoq, sinerissap qanittuani
  • Narsaq – Qaqortoq, avataasiorluni (misileraalluni aalisarneq taamaallaat)
  • Nuuk - Paamiut, sinerissap qanittuani
  • Nuuk - Paamiut, avataasiorluni
  • Maniitsoq - Kangaamiut, avataasiorluni (misileraalluni aalisarneq taamaallaat)
  • Maniitsoq - Kangaamiut, sinerissap qanittuani

1. april – 31. december:

  • Sisimiut, sinerissap qanittuani
  • Sisimiut, avataasiorluni
  • Qeqertarsuup Tunua - Uummannaq, sinerissap qanittuani
  • Qeqertarsuup Tunua – Uummannaq, avataasiorluni (misileraalluni aalisarneq taamaallaat)
  • Upernavik, sinerissap qanittuani
  • Upernavik, avataasiorluni (misileraalluni aalisarneq taamaallaat)

Saattuarniarnermi aalisaatit makku atorneqarnissaat piumasaqaataavoq:

  • Pullatit atorlugit taamaallaat saattuarniarsinnaavutit.
  • Pullatini affarmik nigartanut nigartat minnerpaaffissaat tassaavoq 70 mm.   
  • Pullatit amerlanerpaamik 50-it siaarlugit ningissinnaavatit.  
  • Pullataatitit atorneqanngikkaangata imaani uninngateqqusaanngillat.
  • Pullatigisanni "qimaaffissaq" atortussaavat.  
  • Aalisarnermi atortut piginnittup aqqanik/imaluunniit angallatip aqqanik ersarissumik nalunaaqutserneqarsimassapput. Nalunaaqutsiussat imermit arrortinneqarsinnaassanngillat.
  • Aalisarnermut atortut atorneqareernerisa kingorna peerneqartarnissaat illit nammineerlutit akisussaaffigaat. Aalisarnermut atortutit nalunaaquttap akunneri 24-t iluanni qaqissinnaassanngikkukkit tamanna KANUAANA-mut nalunaarutigissavat. Aalisarnermi atorunik 3 sømilimik killeqarfiup iluani annaasimagukkit taakku kommunimut nalunaarutigissavatittaaq.

"Qimaaffissaq" pillugu piumasaqaat 1. januar 2023-meersoq

"Qimaaffissap" ilinnit atorneqarnissaa piumasaqaataavoq, taannalu allunaasaavoq arrortinneqarsinnaasoq, taannalu pullammi qimaaffissaliorniarluni saattussanut pullammut ikkunneqartussaavoq, taassumalu imaani uninngaannarluni pisaqaannartarnissaa tassuuna pinngitsoortinneqarsinnaavoq.  Imaani piniutit qaqinneqaratit uninngaannartunik  pisaqartarnermi aalisakkanut atortuutit annaaneqaraangata qimaannarneqaraangatalu, pisallu qaqinneqarsimatinnagit aalisaannalertarnerat pineqarpoq.  

Saattussanut pullatitit tamaasa qimaaffissamik minnerpaamik ataatsimik ikkussiffigissavatit, taannalu allunaasaq bomuldiusoq ikiorsiullugu matoqqatinneqassaaq.  Allunaasaq bomuldiusoq nigartat affaannut aqqaneq marlunnut ikkunneqassaaq.

Bomuldimik allunaasaaraq atorneqartoq allunaasaaqqani amerlanerpaanik 96-inut nigartaqartinneqassaaq.

Affarmik nigartani allunaasaq bomuldiusoq qanoq inississanerit uani takutinneqarpoq:

Asseq: KANUAANA

Malugiuk: Aalisarnermut atortuutivit naleqqussarnissaannut piffissaqarluarnissat qulakkeerniarlugu ikaarsaariarnissamut piffissaliisoqarnikuummat. Taamaammat qimaaffissaliornissamut piumasaqaat aatsaat 1. januar 2023-mi atuutilissaaq. Taamaammat aalisarnermut atortuutivit naleqqussarnissaannut ukioq 2022 naallugu periarfissaqarputit.

Saattuarniarnermut angallatigisat 75 BRT/120 BT-init mikinerussaaq (angallat tamakkerlugu meterit arfinillit qaangerlugit).

Tamanna sinerissap qanittuani avataanilu aqutsiveqarfinnut atuuppoq.  

Inuussutissarsiutigalugu aalisartutut saattussanik aalisarniaruit akuersissummik peqartussaavutit.  

Umiatsiaaraq atorlugu inuussutissarsiutigalugu aalisartuuguit aalisarsinnaanermut akuersissut qinnutiginiarlugu kommunigisannut saaffiginnissaatit.
Angallammik inuussutissarsiutigalugu aalisartuuguit qarasaasiaq atorlugu internettikkut aalisarsinnaanermut akuersissummik qinnuteqarsinnaavutit.

  • Umiatsiaararsorluni aalisarsinnaanissamut akuersissutit pillugit una toorlugu paasisassarsiorit
  • Angallat atorlugu aalisarsinnaanissamut akuersissutit pillugit una toorlugu paasisassarsiorit

Malugiuk: Saattussanik inuussutissarsiutigalugu aalisarnermik ingerlatsisunut nutaanut 1. januar 2021-miit 31. december 2022 ilanngullugu ukiuni marlunni atuuttussamik aalisarsinnaanermut akuersissutinik tunniussisoqarneq ajorpoq.

Uannga allanneqarpoq: Aalisarnermut immikkoortortaqarfik

Aalisarnermut, Piniarnermullu Naalakkersuisoqarfik
Imaneq 1A, 701
Postboks 269
3900 Nuuk

Oqarasuaat: (+299) 34 50 00
Fax: (+299) 34 63 55
E-mail: apn@nanoq.gl
Nittartagaq: www.apn.gl
Innuttaasumut

sullissivik.gl-imut tikilluarit

Sullissivik Innuttaasumut isilerputit. Suliffeqarfiutilimmut nuunniaruit, qulaani ‘Suliffeqarfiutilimmut’ toqqassavat.