Kapisilinniarnissamut qinnuteqarit

Maana qinnuteqarit

Inuussutissarsiutigalugu aalisartuuguit imaluunniit inuussutissarsiutigalugu aalisartunngorusukkuit kapisilinnillu aalisarniaruit akuersissutaateqassaatit. Sinerissap qanittuani kapisilinniarneq eqqarsaatigalugu pisassiissutit siullermik aqutsiveqarfinnut agguarneqartarput, kingornalu aqutsiveqarfinni inuussutissarsiutigalugu aamma sunngiffimmi aalisartunut agguaanneqartarlutik.

Kapisilinniarneq inuuniutigalugu aalisarneruvoq, taamaammallu kapisillit nunanut allanut tunitsivinnulluunniit tunineqaqqusaanngillat. Taamaammat inuussutissarsiutigalugu aalisartutut taamaallaat kalaalimineerniarfinni suliffeqarfinnulluunniit tunisisinnaavutit.

Kapisilinniarneq pillugu aqutsinissamik pilersaarut maani nassaarineqarsinnaavoq, tassanilu kapisilinniarnermut tunngatillugu malittarisassat uani atuarneqarsinnaallutik: Kapisilinniarneq pillugu aqutsinissamik pilersaarut.

Inuussutissarsiutigalugu aalisartuuguit imaluunniit inuussutissarsiutigalugu aalisartunngorusukkuit sinerissap qanittuani kapisilinniarsinnaanermut akuersissummik pigisaqassaatit. Kapisilinniarnermut akuersissummik pissarsinissamut piffissarititaasoq malillugu ukiup siulianit pisanik nalunaarsuutinik nassiussisimanissaq piumasaqaataavoq.

Aalisarnermi akuersissut tassaavoq aalisarnerqarsinnaasutut (art) pisassiissutigineqartunut malittarisassaqartinneqartunillu inuussutissarsiutigalugu aalisarsinnaanermut akuersissut.

Imatut inissisimaguit akuersissummik qinnuteqarsinnaavutit:

  • Nammineq inuttut
  • Umiarsuaatileqatigiittut
  • Ingerlatseqatigiiffittut

Aalisarsinnaanermut akuersissut aalisarnernut ukununnga atuuppoq:
  • Artimik aalajangersimasumik aalisarnermut
  • Sumiiffimmut aalajangersimasumut ataatsimut
  • Akuersissummi atuutilerfittut allaqqasumiit ukiumi pineqartumi 31. decemberip tungaanut.

Sinerissap qanittuani angallammik inuussutissarsiutigalugu aalisarsinnaanermut piumasaqaatit
  • Umiatsiaaraqassagavit 6 meterit tungaanut taassumatulluunniit takissusilimmik. Imlt.
  • Angallatit 6 meterit sinnerlugit takissuseqarpat annerpaamik 12,8 meterinik takissuseqarsinnaavoq (42 fod), aamma inuussutissarsiutigalugu angallatitut akuerineqarsimassaaq, Søfartsstyrelsemilu nalunaarsorneqarsimassalluni. Angallativit nalunaarsortinnissaa nammineq akisussaaffigaat. Aalisarsinnaanermut akuersissummik qinnuteqaatinnut angallatit nalunaarsorsimaneranut uppernarsaat ilanngullugu tapiliutissavat.
  • Aalisariutaatit 6 meterit sinnerlugit takissuseqarpat naalagaaffimmut atassuteqarneranut allagartaa, angallatip Kalaallit Nunaanneerneranut ilinnilu pigineqarneranut uppernarsaataasoq, aammalu angallatip uuttuutaanut allagartaq aalisarsinnaanermut akuersissummik qinnuteqaammut ilanngullugit tapiliutissavatit.

Kapisilinniarneq aqutsiveqarfinnut pingasunut agguataarneqarnikuuvoq:

  • Kalaallit Nunaata Kitaata Avannaa (64°15'N-ip avannaa)
  • Kalaallit Nunaata Kitaata Kujataa (64°15'N-ip kujataa)
  • Kapisillit (kuummi aammalu kuup paavanit 1000 meterit tungaannut aalisarneq)
  • Kalaallit Nunaata Kangia (sineriaa tamakkerlugu)

Naalakkersuisut kapisilinniarnermut piffissarititaasoq KNAPK isumasioqatigalugu kinguliani allaqqasut malillugit aalajangertarpaat.

 Aqutsiveqarfik:   Aalisarnermi piffissarititaasoq: 
 Avannaata kitaani  1/9 - 31/10
 Kujataata kitaani  1/8 - 30/9
 Kapisilinni  1/8 - 30/9
 Kangiani  15/8 - 15/10

Inuussutissarsiutigalugu aalisarninni aalisarnermi atortut uku atorneqassapput:

  • Qarsorsat aamma
  • Amerlanerpaamik qassutit 20-t 2000-inik qilernillit, taakkulu nigartaat 140 mm-iussapput


Malugiuk
Qassutit tissukartittakkat atorneqaqqusaanngillat, aammattaaq Kapisillit kuuani aammalu kuup paavanit 1000 meterinik ungasissusilimmut qassutit suulluunniit atorneqaqqusaanngillat.

Sinerissap qanittuani kapisilinniarnissamut akuersissummik qinnuteqarniaruit kommunerisanni inuussutissarsiornermut siunnersortimut saaffiginnissaatit.

Akuersissut ukiumut pisassiiffiusumut ataatsimut atuuppoq ukiullu tamaasa akuersissummik nutaamik qinnuteqartassaatit. Ukioq pisassiiffiusoq 1. januaarimiit 31. december tungaanut atuuttarpoq. Taamaattorli akuersissutaatit aatsaat akuersissummi allassimasutut ullormiit ukiullu pisassiissuteqarfiusup naanissaata tungaanut atuutissammat eqqaamassavat.

Kapisilinniarsinnaanermut akuersissummik tunineqassaguit ukiup siuliani pisatit piffissaq eqqorlugu nalunaarutigisimassavatit, aamma pisaqarsimanngikkaluaruilluunniit, tamannalu inuussutissarsiutigalugu sunngiffimmilu aalisartunut atuuppoq.

Kapisilinniarnermut akuersissummik qinnuteqarniaruit una tooruk

Siornatigut akuersissutaateqarsimanngikkuti nutaatut qinnuteqassaguit uku piumasaqaataapput:

  • Piffissap qinnuteqarfiup nalaani 18-it 29-llu akornanni ukioqassaatit.
  • Imarsiornermik ilinniarsimasuussaatit imaluunniit taamaaqataanik piginnaasaqarnerit uppernarsarsinnaassavat. Ilanngullugu aalisarnermut piginnaasatit aalisartut piniartullu peqatigiiffianit attuumassuteqarfigisannit, aalisarnermik sulisitsisunnit aamma / imaluunniit inuussutissarsiornermut siunnersortinnit oqaaseqaammik uppernarsarneqarsinnaassapput.
  • Inuussutissarsiornermut umiatsiaaqqamik angallammilluunniit pigisaqassaatit.
  • Aalisarnermut atortuutinik naleqquttunik pigisaqassaatit.
  • Aalisarsinnaanermut akuersissummik tunineqaruit taanna aqutsiveqarfimmut najukkannut qaninnerpaasumut atuutissaaq.

Ingerlatsisussatut nutaatut qinnuteqarniaruit ataani allaqqasut tapiliutissavatit.
  • Imarsiornermut ilinniarsimanermik allagartat ilanngunneqassapput
  • Aalisarnermut piniarnermullu peqatigiiffimmit oqaaseqaat
  • Aalisarnermik sulisitsisumit oqaaseqaat
  • Inuussutissarsiornermut siunnersortimit oqaaseqaat
  • Angallatip uuttuutaanut uppernarsaat, naalagaaffimmut attuumassuteqarnermut uppernarsaat aamma piginnittuunermut uppernarsaat.

Aalisarsinnaanermut akuersissummik qinnuteqaatit kommunimi najugarisami suliarineqartarput. Inuussutissarsiutigalugu aalisartunut piumasaqaatit naammassisinnaagukkit akuersissummik tunineqarsinnaavutit.

Umiatsiaararsorluni aalisarneq

  • Umiatsiaararsorluni aalisarsinnaanermut akuersissutaatit nutartissagukku kommunip nutartertissinnaavat.
  • Siullermeertumik (siornatigut akuersissutaateqarsimanngitsutut nutaatut) umiatsiaararsorluni aalisarsinnaanermut akuersissummik qinnuteqaruit, taava qinnuteqaatit kommunip Aalisarnermut Piniarnermullu Naalakkersuisoqarfimmut ingerlateqqissavaa, taassumalu qinnuteqaatit suliarissavaa.

Angallatinik aalisarneq
  • Angallammik aalisarsinnaanermut akuersissutaatit nutartissagukku, taava qinnuteqaatit kommunip Aalisarnermut Piniarnermullu Naalakkersuisoqarfimmut ingerlateqqissavaa, taassumalu qinnuteqaatit suliarissavaa.
  • Siullermeertumik (siornatigut akuersissutaateqarsimanngitsutut nutaatut) angallatersorluni aalisarsinnaanermut akuersissummik qinnuteqaruit, taava qinnuteqaatit kommunip Aalisarnermut Piniarnermullu Naalakkersuisoqarfimmut ingerlateqqissavaa, taassumalu qinnuteqaatit suliarissavaa.


Ileqquusutut ullut 14-t ingerlaneranni qinnuteqaatinnut akissutisissaatit. Qinnuteqaativit suliarineqarnissaanut paasissutissat amigarpata attavigineqarumaarputit.

Qinnuteqariaatsimut apeqqutissaqaruit Aalisarnermut Piniarnermullu Naalakkersuisoqarfimmut attaveqarsinnaavutit.

Kapisilittatit tamaasa Kalaallit Nunaanni Aalisarsinnaanermut Akuersissutinik Nakkutilliisoqarfimmut (KANUAANA-mut) nalunaarutigisassavatit, TAMATIGUT napittaajaareernermi imaluunniit qarsorsanik qissataammilluunniit pisaqarsimanerit kingorna.

Nalunaaruteqartassaatit pisaqarsimanngikkaluaruilluunniit.

Piffissap aalisarfissap naammassereerneranit, kingusinnerpaamik ullut 14-t kingorna KANUAANA-mut nalunaaruteqarsimanngikkuit, ukiup tulliani akuersissummik tunineqarsinnaanngilatit.

Una tooruk kapisilittatillu uani nalunaarutigalugit

Uannga allanneqarpoq: Aalisarnermut immikkoortortaqarfik

Aalisarnermut, Piniarnermut Nunalerinermullu Naalakkersuisoqarfik
Imaneq 1A, 701
Postboks 269
3900 Nuuk

Oqarasuaat: (+299) 34 50 00
Fax: (+299) 34 63 55
E-mail: aalisa@nanoq.gl
Nittartagaq: www.apnn.gl
Suliffeqarfiutilimmut

sullissivik.gl-imut tikilluarit

Sullissivik Suliffeqarfiutilimmut isilerputit. Innuttaasumut nuunniaruit, qulaani ‘Innuttaasumut’ toqqassavat.