Imminut sullississutinut iserniaruit NemID suli isissutissatut atussavat.

Nipisanniarneq

Malugiuk: Sinerissap qanittuani inuussutissarsiutigalugu aalisartuuguit umiatsiaaraqqamik/angallammilluunniit nipisanniarniaruit aalisarsinnaanermut akuersissummik pissarseqqaassagavik.

Inuussutissarsiutigalugu nipisanik aalisarniaruit aalisarsinnaanermut akuersissummik pissarseqqaarsimasariaqarputit.
Nipisanniarnissamut immikkut piumasaqaatit maleruagassallu quppernermi uani atuarsinnaavatit. Inuussutissarsiutigalugu aalisartutut aalisarnermut malittarisassat piumasaqaatillu aalajangersarneqarsimasut malinnissaannut pisussaaffeqarputit. Tamatumalu saniatigut ileqqoreqqusat kommunerisannut immikkut atuutsinneqartut soorlu sumiiffiit eqqissisimatitat illersornissaannut tunngasut, malinneqartussaapput. Kommunini ileqqoreqqusat pillugit inatsisit.gl-imi paasisaqarnerusinnaavutit.

Inuussutissarsiutigalugu aalisartutut nalunaartarnissamik pisussaaffeqarputit. Pisatit sanitigullu pisarisuukkatit nalunaarutigisartussaavatit. Saniatigut pisarisuukkat tunineqarsinnaanngitsut tassaapput aalisakkat, timmissat, miluumasut imarmiut, pupiit koral-illu.

Pinngortitap eriagineqarnissaanut nammineerlutit akisussaaffeqarputittaaq. Imaq ataatsimoorulluta isumalluutigaarput ataatsimoorlutalu aamma akisussaaffigalutigu.

Nipisanniarneq aqutsiveqarfinnut agguarneqarnikuuvoq. Aqutsiveqarfiit tamarmik immikkut pisassiiffigineqartarput.  Aalisarneq paggatassiinertut pisassiissutit nungunissaasa tungaanut ingerlanneqartarpoq, pisassiissutit ataatsimoorullugit tamanit aalisarneqartarlutik. Pisassiissutit tamakkerlugit aalisarneqarsimaleraangata aalisarneq unitsinneqartarpoq.

Nipisallunnik arnarlunnillu pisaqartarneq assigiinngissuteqarpoq.  Arnarlunnik aalisarneq pisassiissutitigut killilersugaavoq, arnarluillu suaat qanoq annertutigisut tunitsivinnut tunineqarsinnaanerannut ukiumoortumik pisassiissutinik aalajangersaasoqartarluni.

Aqutsinissamut pilersaarut malillugu nipisanik aalisarneq aqutsivigineqarpoq, Marine Stewardship Councilimiillu (MSC) tamanna akuerisaavoq.  

Kitaani arnarlunnik sinerissap qanittuani aalisarnermut aqutsinissamik pilersaarut atuarniarukku una tuussavat

Sinerissap qanittuani imartani taamaallaat nipisanniartoqarsinnaavoq.   

Nipisanniarneq aqutsiveqarfinnut arfineq marlunnut agguagaavoq:
•    Aqutsiveqarfik 510-K 1A (Qasigiannguit, Ilulissat, Qeqertarsuaq, Uummannaq aamma Upernavik)
•    Aqutsiveqarfik 521-K 1Ba (Aasiaat)
•    Aqutsiveqarfik 522-K 1Bb (Sisimiut)
•    Aqutsiveqarfik 530-K 1C (Maniitsoq)
•    Aqutsiveqarfik 540-K 1D (Nuuk)
•    Aqutsiveqarfik 550-K 1E (Paamiut)
•    Aqutsiveqarfik 560-K 1F (Kalaallit Nunaata kujataa)

Ukiumi pisassiiffiusumi ataatsimi aqutsiveqarfinnut marlunnut akuersissutinik tunineqarsinnaavutit.  Aqutsiveqarfik siulleq angerlarsimaffinniissaaq. Aqutsiveqarfiup aappaa tassaassaaq aqutsiveqarfiup angerlarsimaffigisavit saniliani aqutsiveqarfik.

Nipisanik arnarlunniarneq siusinnerpaamik aprilip aallaqqaataani aallartittarpoq kingusinnerpaamillu julip 15-iani naammassisarluni. Piffissaq aalisarfiusussaq aqutsiveqarfinni assigiinngitsuni assigiinngitsuuvoq, sivisunerpaamilli ulluni 60-ini ingerlanneqarsinnaalluni pisassiissutigineqartulluunniit tamakkerlugit aalisarneqarnissaat tikillugu sivisussuseqarsinnaalluni.

Aalisarnerup aallartiffissaa ukiut tamaasa nutaamik aalajangiiffigineqartarpoq aqutsiveqarfiillu ataasiakkaarlugit ataatsimut aalajangersaaffigineqartarlutik.  

Najukkami suliffissuarmi aqutsisut aalisartullu sinniisuat aqutsiveqarfinni ataasiakkaanni aalisarnerup qaqugu aallartinnissaanut oqartussaasunut siunnersuuteqartartuupput. Aalisarnermut Piniarnermullu Naalakkersuisoqarfik inaarutaasumik aalajangiissaartuuvoq.  
Piffissaq aalisarfiusussaq aqutsiveqarfinnullu ataasiakkaanut pisassiissutaasussat pillugit nalunaaruteqarnissat Aalisarnermut Piniarnermullu Naalakkersuisoqarfiup naalakkersuisut.gl aqqutigalugu nalunaarutigisarpai.


Piffissami 16. juli - 1. april arnarlunnik nipisanniaqqusaanngilatit.
Piffissami 16. juli – 31. januar angusallunnik aalisarsinnaanngilatit.

Nipisanniarnermi aalisarnermut atortunut piumasaqaatit:

  • Qassutinik atuisimaguit qassutini nigartat annerpaaffissaat 260 mm-iuvoq.
  • Aalisarnermut atortuutit piginnittup aqqanik aamma/imaluunniit angallatip aqqanik ersarissumik ilisarnaaserneqarsimassapput. Nalunaaqutsiussat imermit arrortinneqarsinnaassanngillat.
  • Aalisarnermut atortut atorneqareernerisa kingorna peerneqarnissaat illit nammineerlutit akisussaaffigivat. Aalisarnermut atortuutit nalunaaquttap akunneri 24-t iluanni qaqissinnaassanngikkukkit tamanna KANUAANA-mut nalunaarutigissavat. Aalisarnermut atortunik 3 sømilimik killeqarfiup iluani annaasaqarsimaguit taakku kommunimut nalunaarutigissavatittaaq.
  • Qassutinik piginnittoq kinaassusersineqarsinnaasimanngippat nipisanik aalisarnerup uninneraniit ullut arfineq marluk qaangiunnerisigut nipisanut qassutit qaqinneqarsimanngitsut qaqissinnaavatit tigummiinnarlugillu.

Kalaallit Nunaata MSC-mik uppernarserneqarsimanera eqqarsaatigalugu nipisanik aalisarnermi saniatigut pisarisuukkappit nalunaarutigisarnissaat pingaaruteqartorujussuuvoq.  Timmissanik immamilu miluumasunik saniatigut pisarisuukkat nalunaarutigineqartartussaapput, aamma angalaninni saniatigut pisarisuukkatit igittoorsimagaluarukkilluunniit.  Pisiortortut amerlanersaat saniatigut pisarisuukkanut immersuiffissamik illit immersugassannik peqartarput. 
Nammineerlutit umiatsiaararniik nammineerlutit angallaternut taakkua akornanni nipisanik nuussinissamut akuersissummik tunineqarsinnaavutit.  Angallatit inuussutissarsiutigalugu aalisarnissamut akuerineqarsimassaaq.  Akuersissut Aalisarnermut Piniarnermullu Naalakkersuisoqarfimmiit tunniunneqassaaq, ilinnullu akuersissutigineqartumi takuneqarsinnaassalluni.  
Angallammut allamut nuussinissamut akuersissut pillugu qinnuteqarniaruit una tooruk


Inuussutissarsiutigalugu nipisanniarniaruit akuersissummik pissarseqqaarsimasariaqarputit.   

Umiatsiaaraq atorlugu inuussutissarsiutigalugu aalisartuuguit aalisarsinnaanermut akuersissut qinnutiginiarlugu kommunerisannut saaffiginnissaatit.  
Angallammik inuussutissarsiutigalugu aalisartuuguit qarasaasiaq atorlugu aalisarsinnaanermut akuersissummik qinnuteqarsinnaavutit.  

Malugiuk: Nipisanik inuussutissarsiutigalugu aalisarnermik ingerlatsisunut nutaanut 31. marts 2021-miit 28. februar 2023-p tungaanut ukiuni marlunni atuuttussamik aalisarsinnaanermut akuersissutinik tunniussisoqarsinnaanngimmat.

Uannga allanneqarpoq: Aalisarnermut immikkoortortaqarfik

Aalisarnermut Piniarnermullu Naalakkersuisoqarfik
Imaneq 1A, 701
Postboks 269
3900 Nuuk

Oqarasuaat: (+299) 34 50 00
Fax: (+299) 34 63 55
E-mail: aalisa@nanoq.gl
Nittartagaq: www.apn.gl
Innuttaasumut

sullissivik.gl-imut tikilluarit

Sullissivik Innuttaasumut isilerputit. Suliffeqarfiutilimmut nuunniaruit, qulaani ‘Suliffeqarfiutilimmut’ toqqassavat.