Raajarniarneq

Raajarniarneq Kalaallit Nunaanni aalisarnermi aallunneqarnerpaavoq, aningaasarsiornikkullu pingaaruteqarnerpaalluni.

Raajarniarneq sinerissap qanittuani avataanilu ingerlanneqartarpoq.

Raajat pillugit pisassiissutitigut aaqqissuussineq pisassiissutinik nammineq pigisanik niuerutigineqarsinnaasunillu tunngaveqarpoq. Tamanna isumaqarpoq umiarsuaatileqatigiiffiit TAC-imit (Total Allowable Catches/Pisassatut akuerineqarsinnaasut tamarmiusut) tamarmiusumit pisassiissutit ilaannik peqartut, taannalu ilisimatuussutsikkut siunnersuutigineqartoq aallaavigalugu Naalakkersuisunit aalajangersarneqartarpoq.  

Pisassiissutit umiarsuaatileqatigiiffinnut agguaanneqartarput, angallallu sorleq atorneqassanersoq piumasaqaataanngilaq.

Suliffeqarfiup avataasiorluni aalisarnermi raajartassiissutit tamarmiusut 33,33 %-ii angullugit pigisinnaavai aamma sinerissamut qanittumi aalisarnermi 15 %-it angullugit pigisinnaallugit.

MSC-mik uppernarsaasiineq aqutsinissamullu pilersaarut 
Kitaani raajarniarneq Marine Stewardship Councilimit uppernarsaaserneqartarpoq Kitaanilu raajarniarneq aqutsinissamut pilersaarut naapertorlugu aqunneqarluni.

 

Illit imaluunniit ingerlatseqatigiiffiit raajarniarusukkuit/raajarniarusuppata, taava tunngaviusumik piumasaqaatit arlallit naammassineqarsimassapput. 
Piumasaqaatiti ukuupput:

  • Ingerlatseqatigiiffik aktiaateqarluni ingerlatseqatigiiffiussaaq, piginneqatigiilluni ingerlatseqatigiiffiussaaq, piginneqatigiiffiussaaq imaluunniit piginneqatigiilluni umiarsuaatileqatigiiffiussalluni 
  • Ingerlatseqatigiiffiup aningaasaatai tamarmik inunnit ataasiakkaanit toqqaannartumik imaluunniit toqqaannanngitsumik pigineqassapput, taannalu  
    • Kalaallinut inuiaqatigiinnut aalajangersimasumik attuumassuteqassaaq,  
    • Kalaallit Nunaanni inuit nalunaarsorsimaffianni nalunaarsorsimassaaq ukiullu siuliini marlunni Kalaallit Nunaanni inuit nalunaarsorsimaffianni nalunaarsorsimassalluni, 
    • Kalaallit Nunaanni tamakkiisumik akileraartartuusaaq ukiullu siuliini marlunni Kalaallit Nunaanni akileraartartuusimassalluni aammalu, 
    • ingerlatseqatigiiffiup aningaasaatai tamarmik toqqaannartumik toqqaannanngitsumilluunniit inunnit ataasiakkaanit inatsimmi piumasaqaatinik siuliani taaneqartunik pingasunik naammassinnissimasunit pigineqassapput,

Raajat pillugit pisassiissutitigut aaqqissuussineq pisassiissutinik nammineq pigisanik niuerutigineqarsinnaasunillu tunngaveqarpoq. Tamanna ima paasineqassaaq, umiarsuaatileqatigiiffiit TAC-imit (Total Allowable Catch/Pisassat akuerineqarsinnaasut tamarmiusut) tamarmiusumit pisassiissutit ilaannik pigisaqartuussasut. Raajarniarnermut peqataaniaraanni ingerlatseqatigiiffik nammineq pigisassanik ukiumullu pisassanik pisisariaqassaaq.

 

Pisassiissutit eqaatsumik atornissaannut periarfissamik inatsisitigut ammaassisoqarpoq, pisassiissutit aalisarneqanngitsut ukiumi tulliuttumi aalajangersimasumik annertussuserlugit aalisarneqarsinnaanngorlugit. Taamatuttaaq ukiumut tulliuttumut pisassiissutit siumut aalisarneqarsinnaapput.

'Pisassiissutinik nuussisinnaaneq' oqariartaasiuvoq ulluinnani atugaasartoq. Marloqiusamik nuussisoqarsinnaavoq – siumoortumik kingumoortumillu:

  • Ukiumut pisassiissutinit annertussutsit ukiumi aalajangersimasumi aalisarneqanngitsut ukiup tulliani 30. april ilanngullugu aalisarneqarsinnaapput.  
    Tamanna pisarpoq, ukiup siuliani sinneruttut ukiumut tulliuttumut  pisassiissuteqarfiusumut nuunnerisigut.  
    Ukiumut pisassiissutinit annertussutsit aalisarneqanngitsut APNN-imit ingerlaannaq siumut nuunneqassapput, taassumalu akuersissut iluarsisaq tunniutissavaa.  
    Ukiumut pisassiissutinit annertussutsit ukiup tullianut nuussat niuerutigineqarsinnaanngillat, kingusinnerpaamillu 30. april aalisarneqarsimassallutik, tamatumalu kingorna sinneruttut uterteqqinneqassapput.   
  • Umiarsuaatileqatigiiffik ukioq naatinnagu pisassiissutiminik tamakkerlugit aalisarsimasoq, qinnuteqareernikkut 15. novembarimiit ukiumi tulliuttumi pisassiissutinik aalisarluni aallartissinnaavoq. Tamanna pisarpoq, pisassiissutit aalajangersimasumik annertussusillit ukiumut pisassiiffiusumut ilanngunneqarnissaannik qinnuteqarnikkut. Ukiumut tulliuttumut pisassiissutinik umiarsuaatileqatigiiffimmut tunniussinermi annertussutsit taakku pisassiissutinit  ilanngaatigineqassapput. Taamatut iliuuseqarneq akuersissutinik aaqqissuussinermi suliarineqartarpoq, umiarsuaatileqatigiiffimmullu akuersissut iluarsisaq nassiunneqartarluni.

 

  • Raajat pillugit pisassiissutitigut aaqqissuussineq pisassiissutinik nammineq pigisanik niuerutigineqarsinnaasunillu tunngaveqarpoq. Tamanna isumaqarpoq, umiarsuaatileqatigiiffiit TAC-imit (Total Allowable Catch/Pisassat akuerineqarsinnaasut tamarmiusut) tamarmiusumit pisassiissutit ilaannik pigisaqartuussasut. Tamatuma kingunerisaanik raajarniarnermi peqataasinnaanermut ingerlatseqatigiiffik pisassiissutit ilaannik pisassanillu pigisaqassaaq. 
  • Pisassiissutit ilaannik pigisaqaruit Naalakkersuisoqarfiup ukiut tamaasa aalisarnermut akuersissut nassiutissavaa, tassanilu pisassiissutit ilaannik pigisatit aallaavigalugit pisassinneqarnerit aalajangersarneqarsimassaaq.  TAC Naalakkersuisunit aalajangerneqareeriarpat taanna nassiunneqassaaq. 
  • Tamatuma saniatigut pisassiissutinik niuerfimmi ukiumut pisassiissutinik pisisinnaavutit.   
    Pisassiissutinik niuerfimmi pisassiissutinit annertussutsit aalisarneqarsimanngitsut pillugit takussutissiaqarpoq. Taanna Kalaallit Nunaanni Aalisarsinnaanermut Akuersissutinik Nakkutilliisoqarfimmut (KANUAANA-mut) saaffiginnikkuit ilinnut nassiutsissinnaavat.  
    Pisassiissutinik niueqatigiinnerit tamaasa Naalakkersuisoqarfimmit akuerineqassapput. Taamaammat pisinermik isumaqatigiissutit tamarmik akuerisassanngorlugit uunga nassiunneqassapput: APN@nanoq.gl
  • Niuerneq Naalakkersuisoqarfimmit akuerineqareerpat aalisarnermut akuersissutit nutaat nassiunneqassapput.

 

Pisassiissutit ilaannik piserusukkuit raajanik pisassiissutinik niuerfimmi pisassiissutaatilinnit assigiinngitsunit pisisinnaavutit.

Pisassiissutinik niuerfimmi pisassiissutinit annertussutsit aalisarneqarsimanngitsut pillugit takussutissiaqarpoq, taannalu Kalaallit Nunaanni Aalisarsinnaanermut Akuersissutinik Nakkutilliisoqarfimmut (KANUAANA-mut) saaffiginnikkut nassiunneqarsinnaavoq.

Raajartassiissutinik niueqatigiinnerit tamarmik Naalakkersuisoqarfimmit akuerineqassapput. Niueqatigiinnermi isumaqatigiissut Naalakkersuisoqarfimmut nassiunneqassaaq, taassumalu niuerneq akuerissavaa, aalisarnermullu akuersissutit nutaat nassiunneqassapput.

 

Uannga allanneqarpoq: Aalisarnermut immikkoortortaqarfik

Aalisarnermut, Piniarnermullu Naalakkersuisoqarfik
Imaneq 1A, 701
Postboks 269
3900 Nuuk

Oqarasuaat: (+299) 34 50 00
Fax: (+299) 34 63 55
E-mail: apn@nanoq.gl
Nittartagaq: www.apn.gl
Innuttaasumut

sullissivik.gl-imut tikilluarit

Sullissivik Innuttaasumut isilerputit. Suliffeqarfiutilimmut nuunniaruit, qulaani ‘Suliffeqarfiutilimmut’ toqqassavat.