Aalisarnermi ineriartortitsinermut immikkoortitat siunertaraat aalisarnermik ingerlatsisut siuarsaanissamut inerisaanissamullu tapiiffigineqarnissaat, matumanilu aalisariutit nutarsarnissaannut tapiissuteqarneq. Taamaammat isaterinissamut ataatsimiititaliap nalilersuereerneratigut aalisariutinik qanganitsanik isaterinissamut tapiisoqarsinnaavoq.
Tapiisoqarsinnaavoq angallatit:
1) Aalisariutinik nalunaarsuiffimmi nalunaarsorsimappat imaluunniit Angallatinik nalunaarsuffimmiippat aammalu Aalisarnermut, Piniarnermut, Nunalerinermut Imminullu pilersornermut Naalakkersuisoqarfiup angallatinut aalisarnermik inuussutissarsiornermut akuersissutilinnut nalunaarsuiffiani nalunaarsorsimappat,
2) Angallatip allagartaa malillugu angissusaa 5 BRT 8 BT qaangersimappagu taamaattorli 75 BRT/120BT ataallugu angissuseqarpat
3) Ukiunik 25-nik angallat pisoqaassuseqarpat pisoqaanerulluniluunniit,
4) Nunatsinni aalisarnermi aalisaqataasarsimappat, Nunatta sineriaani qanittumi imartani aalisarnermut atorneqarsimappat.
• Pisassiissutinik niuerutigineqarsinnaasunik nammineq pigisaqarluni aalisarnermut akuersissuteqaruit pisassiissutinillu pigisaqarlutit, isaterinissamut tapiissutinik qinnuteqannginninni ukiuni kingullerni marlunni pisassiissutivit tamaasa taakkuluunniit ilaannik tunisaqarsimassanngilatit.
• Pisassiissutinit pigisaqaruit tapiissutinik pereernerup kingorna ukiuni tallimani pisassiissutinit pigisannit tamakkiisumik ilaannilluunniit tunisaqannginnissannik tapiissuteqarnissat piumasaqaatitaqassaaq. Pisassiissutinit pigisannit ukiut tallimat iluanni tunisaqaruit tapiissutit utertillugit akileqquneqarsinnaapput.
• Angallammik isaterititsineq, Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmiit akuerisaasumiit ingerlanneqassaaq, ugguuna akuerisaasut takujuk: Nuummiit Avannamut isaterititsisartut akuerisat
• Tapiissutit tunniunneqartinnagit angallatip aalisariutinik nalunaarsuiffimmit umiarsuarnut nalunaarsuiffimmiittumit nalunaarsorsimanera peerneqassaaq isaterneqarsimassallunilu.
Naalakkersuisut isaterinermut ataatsimiititaliamit pilersitsisimapput, taakkulu qinnuteqaatit tamaasa piumasaqaatinik eqquutitsisimanersut misissortarpaat.
Ataatsimiititaliaq ataasiakkaanik nalilersuereernermini aningaasaliissutit tapiissutissatut atugassanngortinneqarsimasut aammalu isaterinissap pissusissamisoornera aamma tapiissuteqartoqarnissaanik nalilersuereernermini qinnuteqaatinik salliutitsissaaq. Pingaarnersiuinerit makku aallaavigalugit ingerlanneqartarput:
1) Angallatip pisoqaassusaa usigisinnaasaalu,
2) Angallatip siusinnerusukkut pisarisimasai,
3) Nunap immikkoortuata ilaani angallatit akuersissutilluunniit qassiuneri, aammalu
4) Angallativit qanoq sivisutigisumik pigisimanera.
Angallatip angissusaanut pisoqaassusaanullu naleqqiullugu aalajangersimasumik naatsorsueriaaseq tunuliaqutaralugu tapiissutit amerlassusaat aalajangersarneqassapput. Tapiissutit annerpaamik angallatip nalianiit 100 %-imik amerlassuseqarsinnaapput. Angallatip nalinga nalilersuisartumit arlaannaannulluunniit attuumassuteqanngitsumit Aalisarnermut, Piniarnermut Nunalerinermut Imminullu Pilersornermut Naalakkersuisoqarfimmit toqqarneqartumit aalajangersarneqassaaq. Ugguuna takujuk: Isaterititsinissamut nalilersuisinnaasutut innersuunneqartut. Nalilersuisitsinermi aningaasartuutit nammineq akilissavatit.
Angallammik isaterinissamut qinnuteqarnissaq ukiumik ataatsimik sioqqullugu angallatip motorilluunniit ajoqusersimanera pissutigalugu sillimmasiisarfimmiit akiliutigineqartut angallammik iluarsaassinermut atorneqarsimanngippata tapiissuteqarnermi taakkua ilanngaatigitinneqassammata maluginiaruk. Isaterinissamut tapiissutinik qinnuteqareernerpit kingorna angallatit ajoqusersimappat, tapiissutilli suli tunniunneqaratik, sillimmasiissutaasimasinnaasut aningaasartaat tunniunneqarsimasut tapiissutinit ilanngaatigineqassapput.