Aalisartunut, piniartunut savaatilinnullu ataatsimoortunut sillimmasiineq

Piniartutut aalisartutullu namminersortut ajoqusertarnerat pillugu ataatsimoortunut sillimmasiisarnermi pineqarput. Illit inuttut ataasiakkaatut aalisartuuguit piniartuullutillu, inuussutissarsiutigalugu piniarnermut allagartaqarlutit, aalisariutillu 15 meterit inorlugit takissuseqarpat, tapiiffigineqarsinnaasumik sillimmasernissannut pisinnaatitaaffeqarputit. Ataatsimoortunut sillimmasiinikkut ajutoornerit inuussutissarsiornermullu atatillugu nappaateqalerneq sillimmaserneqartarput.

Illit pillutit sillimmaserniaruit piumassutsinnik sillimmasissaatit, sulisoqaruilli sulinermi ajoqusernermut sulisutit sillimmasernissaannut inatsisitigut piumasaqaataavoq. Sulisutit sillimmasinngikkukkit sulisillutik ajoquserneri illit akilertussaavatit.

Ataatsimoortunut sillimmasiinikkut makku pissarsiarisinnaavatit:
• Napparsimallutit angerlarsimaqqusaaguit, ullormusiaqarsinnaatitaavutit sap. ak. 3.243 kr. tikillugit pisartagarisinnaasannik
• Ajoqusernerup kingorna innarluuteqalersimaguit, aningaasanik pisartagaqalersinnaavutit
• Ajoqusernerup kingorna isertitanik annaasaqaateqaruit, taarsiivigineqassaatit tunniunneqarallartartussanik, taarsiivigineqarneq qaammatit tamaasa tunniunneqartarlutik
• Ajoqusernerup kingorna piaarnerpaamik katsorsartinnissamut ikiuutissaagut. Ajoqusernerup kingunerisaanik suliaritittariaqaruit Nunatsinni pisinnaanngitsumik, Danmarkiliarlutit katsorsartikkiartornissat isumagisinnaavarput

Sillimmasiineq ukiumut 1.800 kr. akeqarpoq.

Ataatsimoortunut sillimmasiineq pillugu paasissutissat allat uani atuarsinnaavatit www.cfa.gl uanilu nalunaarlutit www.gruppeforsikring.gl.

Namminersortut ataatsimoortunut sillimmasiisarfimmut ilaasortaareersut sillimmasiinissamut nalunaartariaqanngillat imaluunniit sulisuni pillugit Sulisilluni Ajoqusernerit pillugit Sullissivimmut nalunaarutigisariaqanngilai, pissutigalugu sulisorineqartut ataatsimoortunut sillimmaserneqareermata.

Ataatsimoortunut sillimmasiineq pillugu inatsisit Sulisilluni Ajoqusernerit pillugit Sullissiviup nittartagaani takusinnaavatit.