Qaammatikkaartumik nassuiaat sukumiisoq

Una tassaavoq qaammatikkaartumik nassuiaat sukumiisoq sulisitsisut nalunaarsorsimaffiannut nassiutassaq pillugu ilitsersuut. Suliffeqarfinnit namminersortunit pisortallu suliffeqarfiutaannit atorneqarsinnaavoq.

Suliffeqarfiit qaammammi qaangiuttumi sulisoqarsimasut tamarmik akissarsiat, akeqanngitsumik ajunngitsorsiat, soraarnerussutisiassat aamma akileraarutit pillugit sulisitsisut nalunaarsorsimaffiannut Sulinal.nanoq.gl-imut nalunaaruteqartussaapput.

Qaammatikkaartumik nassuiaatip sukumiisup nassiunnissaa inatsit malillugu pisussaaffiuvoq. Suliffeqarfiit 20-nik amerlanerusunilluunniit sulisoqartut qarasaasiakkut nalunaaruteqartussaapput.

Akileraarutit nalunaaruteqarnerup kingorna Akileraartarnermut Aqutsisoqarfimmut akilerneqassapput.

Akissarsiat pillugit nalunaaruteqarsinnaajumallutit, suliffeqarfiutit sulisitsisut nalunaarsorsimaffiannut nalunaarsortissimassavat. Suliffeqarfiutit piffissami aalajangersimasumi sulisoqassanngippat tamanna sulinal@nanoq.gl -imut nalunaarutigisinnaavat.

Suliffeqarfiuguit sulisulik, taava aamma pisussaaffigivat sulisutit paasissutissanik taakku akissarsiaannut, soraarnerussutisiassaannut akileraarutinullu akiligaannut tunngasunik qaammatit tamaasa tunissallugit.

Nalunaaruteqarnissanni sulisutit tamaasa pillugit paasissutissat makku nalunaarutigissavatit:

• Sulisup kinaanera pillugu paasissutissat: CPR aamma ateq.
• Kommuni akileraarfik.
• Suliffeqarfiutit pillugu paasissutissat: CVR, ateq aamma najugaq.
• Piffissaq nalunaarutigineqartoq – qaammat suna?
• Sulisut ataasiakkaat qanoq akissarsisimanersut: Aningaasarsiat A-t, tassa akissarsiat aamma tunisat.
• Akissarsiat ilaat qanoq amerlatigisut akileraarutaanersut: Akileraarutit A-t unerartitat.
• Sulisutit soraarnerussutisiaqarnissamut aaqqissuussinermik Kalaallit Nunaata avataaniittumik peqarpata: soraarnerussutisiassanut akiliutaasut aamma akileraarutit A-t.
• Akeqanngitsumik ajunngitsorsiat sulisunut atugassiissutaasut nalingi; akeqanngitsumik oqarasuaateqarneq, akeqanngitsumik interneteqarneq, akeqanngitsumik biileqarneq, akeqanngitsumik ineqarneq il.il. Akeqanngitsumik ajunngitsorsiat aningaasarsianut A-nut ilanngullugit nalunaarneqassapput.
• Soraarnerussutisiassat pillugit paasissutissat

Qarasaasiakkut Sulinal.nanoq.gl aqqutigalugu
Qaammatikkaartumik nassuiaatip sukumiisup qanoq nassiunneqarnissaanut ilitsersuut una Akileraartarnermut Aqutsisoqarfiup suliaraa.

Qarasaasiakkut nalunaarsuinissamut ilitsersuut ugguuna aasinnaavat

Qarasaasiakkut nalunaaruteqarnissanni tamanna pissaaq immersuiffissat, sulisut ataasiakkaat pillugit paasissutissanik immersornerisigut, imaluunniit CSV-fil-imik nassiussisinnaavutit.

Fil-imik nassiussiniaruit tassunga piumasaqaatit allattorsimaffiat uaniippoq.

Immersuiffissaq atorlugu
Sulisitsisut tamarmik qaammatikkaartumik nassuiaammik sukumiisumik qarasaasiakkut nassiussisarnissaat inassutigineqarpoq. Taamaaliornikkut sulisitsisup paasissutissat akissarsianut tunngasut ukiup naanerani nalunaaruteqarnissamini nassaarilertorsinnaavai.

Suliffeqarfiit 20-t inorlugit sulisoqartut immersugassaq atorlugu nalunaaruteqarsinnaapput.

Qaammatikkaartumik nassuiaat / Nassuiaat sukumiisoq iserfissami uaniippoq.

Immersoriigaq sulinal@nanoq.gl -imut nassiunneqassaaq imaluunniit Akileraartarnermut Aqutsisoqarfimmut tunniunneqarluni.

Qaammatikkaartumik nassuiaat sukumiisoq nassiukkukku paasissutissat sulisitsisut nalunaarsorsimaffianni tiguneqassapput. Mailikkut sulinal@nanoq.gl-imut nassiussavit tiguneqarneranni tamatigut ingerlaannaq akissutisisassaatit.

Paasissutissat nassiunneqartut kingusinnerusukkut misissuisoqassagaluarpat atorneqartussatut toqqorneqartarput.

Akileraartarnermut Aqutsisoqarfik sulisitsisunik nakkutilliisuuvoq, paasissutissallu tunniussatit paasissutissanut allanut ilanngullugit atorsinnaallugit.

Akileraartarnermut Aqutsisoqarfik isumaqarpat nalunaarutigisatit kukkusuusut, assersuutigalugu akeqanngitsumik ajunngitsorsiat eqqunngitsumik nalunaarutigisimagitit, taava paasissutissat iluarseqqullugit qinnuigineqassaatit kiisalu pillaammik akiliisinneqarlutit. Akileraartarnermut Aqutsisoqarfik ukiut tallimat tikillugit kingumut uterluni paasissutissanik tunniussannik misissuinissaminut periarfissaqarpoq.

Paasissutissat kukkusuunerat nammineerlutit paasigukku sulinal@nanoq.gl attavigisinnaavat, paasissutissallu iluarsinissaannut ikioqqullutit qinnuigalugu.

Qaammatikkaartumik nassuiaat sukumiisoq kingusinnerpaamik nassiunneqassaaq qaammatip suliamik suliaqarfiusup tulliata ulluisa 10-anni. Ulloq taanna sapaatip akunnerata naanerippagu imaluunniit nalliuttuuppat, ulluinnaq tulliuttoq siulleq piffissaliussaavoq.