Namminersorlutik inuussutissarsiortut

Innuttaasoq inersimasoq kinaluunniit imminut, aappani aamma meeqqani 18-it inorlugit ukiullit pilersornissaannut pisussaaffeqarpoq.
Pisortanit ikiorsiissutit siunertaqarput, inuit suliffeqaannarnissamik ajornartorsiortut ajornartorsiulersinnaasulluunniit pilersornissaminnut ikiorneqarnissamik pisariaqartitsisut pitsaaliornissaat, aamma inunnut imminnut ilaquttaminnullu pisariaqartitanik arlaatigut pissarsisinnaanngitsunut aningaasaqarnikkut ajutuunnginnissaannik pilersitsinissaq. Aningaasaqarnikkut ikiuisoqarnissaani ikiorsiissutinik tigusisartup imminut pilersorsinnaalernissaa siunertaavoq. Taamaattumik qinnuteqartoq pisinnaasani malillugu sulisinnaassutsiminik atuissaaq ineriartortitsillunilu. Innuttaasoq nammineerluni pisariaqartitani naatsorsuutigisanilu aallaavigalugit ikiorsiissutit piareersarnissaanni sunniuteqarsinnaanerminut akisussaaqataanissaminullu periarfissaqassaaq.

Ikiorsiissutaagallartut
Pisortanit ikiorsiissutit tassaapput ikiorsiissutaagallartut, taakkualu unitsinneqassapput, innuttaasoq sulisinnaalerpat, suliffeqarnermi tutiffissarsippat imaluunniit pisortanit ikiorsiissutinik allanik pisartagaqalerpat, soorlu siusinaartumik pensionisianik.

Tapiissutitut periarfissaq
Pisortanit ikiorsiissutit tapiissutitut periarfissaapput.
Tamanna isumaqarpoq, pilersuinissamut il.il. isertitaq alla periarfissaappat, taava periarfissaq taanna atorneqassaaq, pisortanit ikiorsiissutit pillugit qinnuteqartinnani.

Pisortanit ikiorsiissutit immikkoortinneqarneri
Pisortanit ikiorsiissutit marlunnut immikkoortinneqarput: ikiorsiissutit annertussusileriikkat aamma pisariaqartitsineq malillugu ikiorsiissutit.
Ikiorsiissutit annertussusileriikkat attuumassuteqarput ikiorsiissutinik annertussusileriikkanik illit pisartagaqartutut kommunalbestyrelsimut piareeqqasussaanernut aamma suliffik innersuunneqartoq suliffigilernissaanut kiisalu iliuusissatut pilersaarummik suliaqarnermut naammassineqarneranullu peqataasussaanernut. Tamanna isumaqarpoq, piffissami ikiorsiissutinik annertussusileriikkanik pisartagaqarfiusumi suliffeqarfiit unitsinneqartariaqartoq.
Pisariaqartitsineq malillugu ikiorsiissutit attuumassuteqarput immikkut ittumik siumullu takorloorneqarsinnaanngitsumik pisunut aamma aningaasartuutit akilerniarnissaanut nammineq aningaasaqarnikkut periarfissaqartinnat imaluunniit aningaasartuutinik akiliineq ima annertutigippat allaat siunissami nammineq isumaginissamut periarfissatit ajornarnerulersillugit.

Namminersorlutik inuussutissarsiortut, tassunga ilanngullugit inuit inuussutissarsiutigalugu aalisartut piniartullu, pisortanit ikiorsiissutinik, inatsimmi piumasaqaatinik naammassisinnaappata, pisinnaatitaapput.
Tassa imaappoq, inuussutissarsiutigalugu aalisartoq aamma inuussutissarsiutigalugu piniartoq ikiorsiissutinik annertussusileriikkanut aamma pisariaqartitsineq malillugi ikiorsiissutinut, piumasaqaatit naammassisinnaappatigit, pisinnaatitaapput.

Piumasaqaat
Pisortanut ikiorsiissutinut, tassunga ilanngullugit ikiorsiissutit annertussusileriikkanut aamma pisariaqartitsineq malillugu ikiorsiissutinut, piumasaqaatit nalinginnaasut assingi atuupput.
Tamanna isumaqarpoq, ikiorsiissutit annertussusileriikkanut pisinnaatitaasoqassappat, piumasaqaatit ilaat ataaseq tassaasoq, sapaatip akunneranut nalunaaquttap akunneri 20-t qaangernagit sulisinnaassuseqassasutit. Piumasaqaatit ilaat alla tassaavoq, kommunimut illit piareersimassasutit.
Kommunimut piareersimanerup kinguneraa, piffissami ikiorsiissutinik annertussusileriikkanik tigusartagaqartillutit, inuussutissarsiutitut suliffeqarfiit uninngasariaqarpoq.

Pisortanit ikiorsiissutit pillugit qinnuteqaammik tunniussisoqassaaq.

Ikiorsiissutit annertussusileriikkat – kommuni najugarfigisaq
Pisortanit ikiorsiissutit pillugit qinnuteqaat kommunimut najugaqarfigisamut tunniunneqassaaq. Kommuni najugaqarfigisaq isumaqarpoq, inuit allattorsimaffianni nalunaarsorsimaffiit taamaalillunilu inuit allattorsimaffianni najugaqarfigisaq.
Piffissami ikiorsiissutit annertussusileriikkat pillugit qinnuteqaatip tunniunnerani kommunit aggornerisa avataanni najugaqaruit, qinnuteqaat Naalakkersuisunut tunniunneqassaaq. Qinnuteqaat isumaginninnermut akisussaaffeqartumut naalakkersuisoqarfimmut tunniunneqassaaq.

Pisariaqartitsineq malillugu ikiorsiissutit – kommuni najugarigallagaq
Tassanngaannartumik ataasiartumik ikiorsiissutit pillugit qinnuteqaat kommunimut najugarigallakkamut tunniunneqassaaq. Tassa imaappoq kommuni illit qinnuteqaammik tunniussinermi najugarigallakkat, kommuni najugaqarfigisaq apeqqutaatinnagu. Piffissami pisariaqartitsineq malillugu ikiorsiissutit pillugit qinnuteqarnermi kommunit aggornerisa avataanni najugaqaruit, qinnuteqaat Naalakkersuisunut tunniunneqassaaq. Qinnuteqaat isumaginninnermut akisussaaffeqartumut naalakkersuisoqarfimmut tunniunneqassaaq.

Kommunit aggornerisa avataanni qinnuteqaammik tunniussineq
Pituffimmi illersornissaqarfik aamma Kalaallit Nunaata Kangiata avannaarsuani Nuna Allanngutsaalisaq pisortanit ikiorsiissutit atuuffiinut aamma ilaatinneqarput.
Piffissami pisariaqartitsineq malillugu ikiorsiissutit pillugit qinnuteqarfiusumi kommunit aggornerisa avataanni najugaqaruit, qinnuteqaat Naalakkersuisunut tunniunneqassaaq. Qinnuteqaat isumaginninnermut akisussaaffeqartumut naalakkersuisoqarfimmut tunniunneqassaaq.

Oqalulluni imaluunniit allalluni
Aallaaviatigut saaffiginninnermi oqalullutit qinnuteqarsinnaavutit. Oqartussaasut piumasarisinnaavaat, immersugassaq aalajangersimasoq atorlugu qinnuteqaat tunniunneqassasoq. Taamaattoqassappat oqartussaasut pisussaapput qinnuteqaammik immersuinermik pisariaqartillugu ilitsersuutissallutit.