airplanebooksbriefcase business cogs cross election entertainment fish house law lockmedicalpeopleselfservices socialtax

Namminersortutut suliffeqarfimmi aningaasarsialinnut aningaasarsianik taarsiigallartarnissaq pillugu qinnuteqaat

Aningaasarsianik taarsiigallarnissaq pillugu qinnuteqaat
Tamatigoortumik

Coronavirusip (COVID-19-ip) atuunnerata nassatarisaanik soraarsitsinermut taarsiullugu suliffeqarfiup namminersortup sulisuminik angerlartitsinerminut atatillugu aningaasarsianik taarsiivigineqarallartassapput.

Ilitsersuutip matuma atuarluarnissaa pingaaruteqarpoq, tassami qanoq iliorlutit qinnuteqassanersutit, kisianni aamma piumasaqaatit, tassani nassuiarneqarmata.
Uani apeqqutit akissutillu suliarineqarsimasut takusinnaavatit:
www.businessingreenland.gl

Aningaasarsianik taarsiigallartarnermut aaqqiissut

Aaqqiissut Coronavirusip (COVID-19-ip) nassatarisaanik namminersortutut suliffeqarfinnut immikkut ittumik annertuumik aningaasaqarnermikkut eqqorneqartunut atuuppoq, tamatumalu ilutigisaanik sulisumik minnerpaamik 30 %-iinik, imaluunniit sulisutik 25-t sinnerlugit soraarsitsisariaqalersinnaasunut atuulluni. Angerlartitsineq toqqaannartumik COVID-19-imut tunngasunik pissutsinik aallaaveqassaaq.

Sulisut aningaasarsiaannut ulloq 19. marts 2020 kingorna akissarsiassaalersunut aammalu tunniunneqartunut taamaallaat qinnuteqarsinnaavutit. Sulisuusoq suliffeqarfimmi (CVR) 19. marts 2020 sioqqullugu atorfeqareersimassaaq, ataavartumillu 19. marts 2020-imiit suliffeqarfimmi suliffeqarsimassalluni. Atorfeqarneq ullut marluk sinnerlugit sivisussuseqarsimassalluni. Atorfeqarneq aalajangersimasumik Kalaallit Nunaanni suliffeqarluni pissaaq, sulisuusorlu Kalaallit Nunaanni inuit allattorsimaffianni nalunaarsorsimassalluni.

Aningaasaqarnermik pissuteqartumik sulisunik soraarsitsisimaguit, kingusinnerusukkut sulisut sinnerinik angerlartitsinermut aningaasarsianut taarsiivigineqarnissamik qinnuteqarsinnaajunnaassaatit. Taamaattuni akissarsianut aningaasartuutinut taarsiissuteqartitsineq aatsaat ullormit siullermiit ullup soraarsitsiviusimasup kingorna atortuulersinnaavoq. Sulisunut soraarsinneqareersimasunut tunngatillugu akissarsianut aningaasartuutinut taarsiissuteqartitsisoqarsinnaanngilaq, taakkua soraarsinneqareersimasut soraarnissami tungaanut piffissami siumoortumik nalunaarfiusimasumi suliinnaraluarpataluunniit.

Piffissaq angerlartitsiviusoq sulisorisanut assigiinngitsunut assigiinngitsunik sivisussuseqartarsinnaavoq. Akissarsianut aningaasartuutinut taarsiissutissat assersuutigalugu sulisorisanut 30-inut, immaqa suli amerlanerusunut sulisorisanut aamma angerlartitsinikkut taarsiissuteqarsinnaanermik mattussinngilaq.

Aningaasartuutinut taarsiissutissat ullut 14-ikkaarlugit aamma qaammammoortunik akissarsiaqartitsiviusut piffissat tunngavigalugit taakkununngalu atatillugu nalinginnaasumik naatsorsorneqartassapput.
Peqatigisaanik inuussutissarsiortunut ikiorsiissutissanik qinnuteqarsimaguit, tamanna qinnuteqaaterni paasissutissiissutigissavat. Peqatigisaanik inuussutissarsiortunut ikiorsiissutissanik pissarsisimaguit, aningaasarsianut taarsiivigineqarsinnaanngilatit.

Uani inuussutissarsiortunut ikiorsiissutissat pillugit atuarsinnaavutit:
www.businessingreenland.gl/kl-GL/COVID-19/Lonmodtagerpakke

Aaqqiissut makkununnga atuuppoq:

Namminersortunut atorfilittalinnut
Assersuutigalugu ataatsimik sulisoqaruit , sulisorisat 100 % -mik atorfilittalittut sulisutut naatsorsuunneqarpoq , taamaattumillu isumaqatigiissummi ilaassaatit.
Suliffeqarfimmik piginnittoq aamma piginneqataasoq sulisuusutut isigineqassanngillat, taamaattumillu taakkununnga taarsisiaqartoqarsinnaanngilaq. Tamannali immikkut taakkununnga malitassat naapertorlugit umiatsiaararsortunut atuutinngilaq, aammalu umiatsiaararsorlutik aalisartut sulisutut isigineqarput. Umiatsiaararsorlutik aalisartunut immikkut uppernarsaanissamut atugassarititaasunik atuuttoqarpoq. Takuuk immikkoortoq ”Umiatsiaararsorlutik aalisartunut immikkut”.

Tamakkiisuunngitsumik atorfeqartut
Sulisunut eqqorneqartunut taakkununnga aningaasarsianut aningaasartuutinit 90 %-itut aningaasarsianik taarsiigallarneq naatsorsorneqassaaq. Ullup ilaatigut atorfeqartitsissaguit aningaasarsiaat naatsorsuutini tamakkiisuni taakkunani ilaaginnassapput.

Sulisut kattuffimmi ilaasortaanngitsut
Sulisartut kattuffianni ilaasortaanngitsunut sulisunut aningaasarsianik taarsiissuteqarfigineqarnissamik pissarsiaqarsinnaavutit.

Aaqqiissut makkununnga atuutinngilaq:

Pisortani oqartussat, suliffeqarfiit imminnut ingerlattut, aamma ingerlatseqatigiiffiit tamakkiisumik ilaannaasumilluunniit pisortanit pigineqartut

Namminersortut sulisoqanngitsut, immikkut ilai pinnagit
(takuuk “Angallateerarsorlunga aalisartuuvunga”)

Aalajangersimasumik sulineq ajortut
Aaqqiissut laajanut atuutinngilaq, tassaasunut sulisut ullormut/nalunaaquttap akunneranut ilaanneeriarlutik atorfinitsitaasartunut, ullulli marluk sinnerlugit atorfeqarnissaannik isumaqatigiissuteqarfigineqanngitsut.

Angallateerarsorlutik aalisartunut

Sulisuusoq umiatsiaararsortuuppat, piffissami pineqartumi sulinnginneq Coronavirus-imik pissuteqarpat aatsaat pisoq angerlartitsinertut isigineqarsinnaavoq. Uppernarsaasissavat ilumut piviusumik “angerlartitaasimallutit”, tassa imaappoq Coronavirus (COVID-19) pissutigalugu aalisarsinnaanngivillutit imaluunniit tunisisinnaanngivillutit. Angerlartitaaneq mattussaagallarnermik (karantæne) tunngaveqartoq peqqinnissaqarfimmiit oqaaseqaammik uppernarsaaserneqassaaq.

Umiatsiaararsortuuguit angerlartitaasimallutillu qanoq akissarsisimassagaluarnerit uppernarsassavat, tassa qaammatini kingullerni 12-ini isertitarisimasat aallaavigalugit qaammammut agguaqatigiissillugit isertissimasassaraluatit.

“Akissarsiavit” 90 % -iinik (annerpaamik 20.190,- kr.-inik) qaammatit kingulliit 12-it tunngavigalugit naatsorsugaasunik taarsiivigineqassaatit, piumasaqaatigineqarporlu ullut 30-ikkaat tamaasa ulluni tallimani sulinngiffeqarnissat allatulluunniit sulinnginnissat.

Qaammammut ilivitsumut akissarsianut aningaasartuutit (ullut 30-it) ullorsiutit ukiuanni qaammatini pingasuni agguaqatigiissillugit tunisat nalingisut naatsorsorneqassapput, piffissaq taarsiissuteqarfiusussaq qinnutigineqartoq sioqqullugu.

Taarsiissutissat pineqartut aalajangersimasut piffissamut angerlartitsiviusumut naapertuuttumik aammalu qaammammi pineqartumi (ulluni 30-ini) akissarsianut aningaasartuutaasoq amerlisaatigalugu naatsorsorneqassapput.

Taarsiigallarnermi qanoq annertutigisumik pissarsissavit

Piffissami sulisut qanoq annertutigisumik aningaasarsiaqassappat
Angerlartitsinermi tamakkiisumik aningaasarsiaqartitsisoqassaaq.

Namminersortutut suliffeqarfik taarsiigallarnermik qanoq annertutigisumik pissarsiaqassanera
Aalajangersimasumik atorfeqartunut: Piffissaq tamakkerlugu sulisunut ilaasunut ataasiakkaanut tamanut qaammatikkaani aningaasarsianik taarsiissuteqaneq aningaasarsianut aningaasartuutinit 90 %-iussaaq, taamaattorli annertunerpaamik 20.190 kr.-usunik.
Nalunaaquttap akunnermusialinnut: Sulisunut ataasiakkaanut tamanut qaammatikkaani aningaasarsianik taarsiissuteqarneq 90 %-iussaaq, taamaattorli annertunerpaamik 20.190 kr.-usunik.

Malugiuk
Taarsiissuteqarnernik pissarsinissamut sulisoq piffissaq tamakkerlugu atorfeqartariaqanngilaq.
Taarsiissuteqarneq sulisup suleqqilersinneratigut atuukkunnaassaaq

Aningaasarsianik taarsiigallarnissaq pillugu qinnuteqaat

Aningaasarsianik taarsiissuteqarnissaq pillugu qinnuteqaat qarasaasiakkut linki aqqutigalugu pissaaq. Uppernarsaatit attuumassuteqartut tamarmik nassiunneqarnissaat qulakkiissavat.

Taarsiissutissaq imatut naatsorsorneqassaaq:
a) Aningaasarsianut aningaasartuutit 90 %-ii, taamaattoq sulisumut ataatsimut piffissami aningaasarsianik taarsiiviusumi ullut 30-it tamaasa annerpaamik 20.190 kr.
b) Piffissaq aningaasarsianik taarsiiviusussaq ullunit 30-init sivikinnerusimappat, taarsiissutissaq ullut unnuallu iluitsunut qaninnernut akunnaallisarlugu naleqqiussilluni annertussusaatut naatsorsorneqassaaq.
c) Aningaasarsianut aningaasartuutinut taakkununnga tunngatillugu pisortat aningaasaataannit allatut tapersiissutaasimasinnaasut ilanngaatigalugit.

Taarsiissutissat naatsorsorneqarneranni qaammatisiutit malillugit qaammammi akileraarutinut A-nut aamma sulisoqarnermut akitsuummut matussutissanut akiliutaagallartussat 30 %-it uninngatinneqassapput. Kontulersuinissamut ilitsersuut immikkut isumaqatigiissutaasoq innersuunneqarpoq.

Kikkut qinnuteqarsinnaappat

Suliffiit namminersortut tamarmik, aamma najoqqutassanik naapertuutitsisut suliffeqarfiup suunera suliaqarfiusorlu apeqqutaatinnagit taarsiissuteqarnerit pillugit qinnuteqarsinnaapput.

Pisortat tapiissutaat taakkua ingerlatsinermut aningaasartuutaasa affaannit annikinnerusimappata aatsaat peqatigiiffiit, aningaasaateqarfiit aamma sullissiviit iminnut pigisut qinnuteqarsinnaatitaassapput .

CVR normut immikkut tamarmik qinnuteqartutut ataatsitut isigineqartassapput, immikkoortut ataaniittut P-it qassiuneri apeqqutaatinnagu. Immikkoortut P-it immikkut qinnuteqarsinnaanngillat. Siuliani allassimasut apeqqutaatinnagit suliffeqarfiit P-nik immikkoortortaqartut illoqarfinni arlaqartuni agguarsimasuni aamma /imaluunniit najukkani assigiinngitsuniittuni, immikkullu P-nik immikkoortortaqartut pinngitsaalineqarlutik matuneqarsimasut, pinngitsaalineqarlutik matuneqarsimasunut tunngatillugu immikkoortukkaarlugit akissarsianut taarsiissutissiassanik qinnuteqaanneqarsinnaapput.

Ingerlattagassat
  1. Taarsiissutissanik pissarsinerup nalaani aningaasartuutigineqareersimassapput. Tamanna isumaqarpoq piffissanut akissarsiaqartitsiviusunut tamanut taarsiivigineqarnissamik qinnuteqaammik nassiussisoqartassasoq, akissarsiat allagartaat piffissamut suliffeqarfiup taarsiissuteqarfiginiagaanut tunngasut ilanngunneqassallutik.
  2. piffissamut 19. marts 2020 – 30. juni 2020, ullut marluk taakkua tamaasa ilanngullugit, tunngassuteqassapput.
  3. skattekortimi/skattebillet-imi ilanngaatigineqartussap procentia sioqqullugu aningaasartai naatsorsorneqassapput.

Umiatsiaararsorlutik aalisartunut aningaasarsianut aningaasartuutit naatsorsorneqarnissaannut tunngatillugu, inussiarnersumik takuuk ”Angallateerarsorlutik aalisartunut”.

Qinnuteqaraanni uppernarsaatit

Uppernarsaatinik attuumassuteqartunik nassiussinissaq suliffeqarfiup pisussaaffigaa.
Qinnuteqaruit qinnuteqaammi makku nalunaarsussavatit:

  • Suliffeqarfiup aqqa, CVR-normu, aamma suliaqarfiusoq
  • Oqarasuaatip mobilillu normua, aamma E-mail
  • Kontonormu (aningaasarsianik taarsiivigineqarnissamut aningaasat ikineqarnissaannut)
  • Sulisut ilai angerlartitaasussat (minnerpaamik 30 %-it, imaluunniit ikinnerpaatut sulisut 25-t).
  • CPR-normu, aningaasarsiat aamma sulisunut ataasiakkaanut tamanut suliaqarnerup annertussusia (sulisoq piffissaq tamakkerlugu sulisuua imaluunniit tamakkiisuunngitsumik sulisuua).
  • Aningaasarsiat allagartaat kingulleq
  • Piffissaq, taarsiivigineqarallartussatut kissaateqarfiusoq, kiisalu tamatumunnga tunngaviliineq, soorlu suliassanik amigaateqarneq.

Sulisut amerlassusaasa naatsorsorneqarneranni suliffeqarfiup inuit aalajangersimasumik atorfeqartut amerlassusaat atussavai.

ilumoorneraanermik nalunaarut

Pisortanit ilumoorneraanermik nalunaarut, pineqarlutik paasissutissat tamarmik eqqortuunerannik (ilumoorneraanermik nalunaarut linki aqqutigalugu nassaarineqarsinnaavoq, aammalu taanna pappialanngorlugu anisinneqassaaq, atsiorneqassaaq, scannerneqassaaq ivertinneqassallunilu).

Coronavirusimik (COVID-19-imik) ajornartoorfiup naanerani uppernarsaatit

Coronavirusip (COVID-19-imik) atuunnerata qaangiunnerani aaqqiissutip atorsimaneranut uppernarsaatit nassiunneqassapput.
Taarsiivigineqarnerup nalaa qaangiuppat piffissami nalunaarneqartumi tassani sulisunik eqqorneqartunik angerlartitsisimanerminik suliffeqarfiup uppernarsaanissaanik tamanna isumaqarpoq. Sulisut Coronavirusimik (COVID-19-imik) ajornartoorfiup aallartinneraniissapput. Sulisartut sinniisaannik sulisoqaruit, sulisoq suliassaqarani angerlartinneqarsimasoq tassanngaaniit uppernarsaat, uppernarsaammi ilaatinneqassaaq.

Suliffeqarfik misissuilluni misissugassanik tigusiffigineqarsinnaavoq, tassungalu atatillugu suliffeqarfimmi aningaasarsiaqartunut sinniisoq imaluunniit sulisut sinniisaat akuutinneqassasoq, piumasaqaatigineqarsinnaavoq.

Uppernarsaaneq kukkunersiuisartumit ikiorserneqarluni pisinnaavoq.
Taarsiissutit utertillugit akileqquneqarsinnaapput, imaattoqarpat:
A. Qinnuteqartup piffissami aningaasarsianik taarsiiffiusumi aningaasaqarnermik tunngaveqartumik sulisut soraarsippagit.
B. Qinnuteqartup piffissami aningaasarsianik taarsiiffiusumi sulisoq sulilerseqqippagu.
C. Qinnuteqartoq aningaasarsianik taarsiivigineqarnissamik qinnuteqaammi eqqunngitsunik paasissutissiippat.
D. Qinnuteqartoq pisinnaatitaanani aammalu piumasaqaatit matuma siuliani taaneqartut unioqqutillugit aningaasarsianut taarsiissutissanik tigusaqarsimappat.

A1-imik Akileraartarnermut Aqutsisoqarfimmut Nalunaarutip nalunaarutigiuartarnera

Nalinginnaasumik A1-imik Akileraartarnermut Aqutsisoqarfimut Nalunaarummik nalunaarutiginnittuarneq qularnaassavat.

Aningaasarsianik taarsiiviginnikkallarnerup nalaani sulinerit

Sulisut soraarsitaanissamik aarleqquteqartut suleqqusaanngillat, piffissamili taarsiigallarfiusumi tamakkiisumik aningaasarsiaqartitaallutik angerlartinneqassapput. Sulisoq piffissami angerlartitsiviusumi qinnuteqartoq sullillugu suliassanik suliaqaqqusaanngilaq – imaluunniit sulisitsisumi allami aningaasarsiaqarluni sulileqqusaanani (imaluunniit atuutereersut annertunerulersillugit).

Akissarsianut aningaasartuutinut taarsiissutisiassat tunniunneqartarput sulisumik angerlartitsigallarnermut atatillugu, aammalu sulisup ingerlaqqittumik piffissamut suliffiusussamut akissarsiaqarfigisaani. Akissarsianut taarsiissutisiassat taamaallaat piffissami angerlartitsiviusumi akissarsiat ilaannut matussutissatut tunniunneqarsinnaapput.

Taxanut

Taxacentrali suliffiuvoq nalinginnaasoq, aammalu taxacentrali sulisitsisutut namminersortutut nalinginnaasutut aningaasarsianik matussuteqarnissaq pillugu qinnuteqarsinnaavoq.

Biiliutiliuguit inunnut taxanik ingerlatitsisorisarnut tunngatillugu sulisitsisutut isigineqassaatit. Taamaatttumik sulisitsisutut namminersortutut nalinginnaasutut aningaasarsianik taasiissutissanik qinnutigisinnaavat.

Sulisunnik soraarsitaqarsimaguit

Suliffeerunnermi ikiorsiissutinut imaluunniit pisortanit ikiorsiissutinut pisinnaatitaaffinnut tunngatillugu nalinginnarmik malittarissiat taakku atuutissapput, pineqartumullu aningaasarsianik taarsiissutaagallartunik pissarsissanngilatit.

Pinngitsoorani sulinngiffeqarnissaq / akunnernik afspadseriinissaq

Sulisoq ullut 30-ikkaartut akissarsianut aningaasartuutinik taarsiissutissaqarfiusut tamaasa ulluni 5-ini sulinngiffeqarfissaminik / akunnernik afspadserigassaminik atuissaaq. Piffissaq akissarsianut taarsiissutissaqartitsiviusoq ullunit 14-init sivikinneruppat, piffissaq sulinngiffeqarfiusussaq ullunut 2,5-inut sulinngiffeqarfiusunut / afspadseriiffiusutut, aammalu piffissamut akissarsianut aningaasartuutinut taarsiissutissaqartitsiviusunut, ullut 14-it sinnerlugit sivisussusilinnut aammalu ullut 30-it angullugit sivisussusilinnut ullunut 5-inut sulinngiffeqarfiusutut / afspadseriiffiusutut naatsorsorneqassaaq.

Sulisuusunut akissarsiaqarluni sulinngiffeqarnissamik katersisimanngitsunut, taarsiissutitut akiliutigineqartussat 2,5/30 imaluunniit 5/30-imik annikillineqartassapput.

Naammagittaalliuut

Akileraartarnermut Qullersaqarfiup aalajangiineramut allatut isumaqaruit, taava Inuussutissarsiornermut, Nukissiuuteqarnermut Ilisimatusarnermullu Naalakkersuisoqarfimmut naammagittaalliorsinnaavutit. Naammagittaalliuut nittartakkakkut ingerlanneqarpoq link  malillugu.