airplanebooksbriefcase business cogs cross election entertainment fish house law lockmedicalpeopleselfservices socialtax

Kommunerisannuinnaq aalajangersimasunik paasissutissaqarpoq

Kommune toqqaruk
Nalinginnaasumik paasissutissiineq
Aappariit aappariitsillugit imminnut pilersornissaminnut pisussaaffeqarput.

Aappavit katissimatillusi pisussaaffini sumiginnassappagu – qanorluunniit najugaqatigiikkaluarussi imaluunniit immikkut najugaqalersimagussi – aapparisamut akilersuutinik qinnuteqarsinnaavutit.

Naalagaaffiup Sinniisoqarfia aqqutigalugu averusissagussi imaluunniit avissagussi, isumaqatigiissinnaavusi aappaata aappami pilersornissaa ingerlatiinnarneqassasoq.

Aapparisamut akilersuutit qanoq pissasut pillugit isumaqatigiissinnaanngikkussi Naalagaaffiup Sinniisoqarfia aqqutigalugu averusersinnaanngilasi imaluunniit avissinnaanngilasi. Eqqartuussivimmut tamanna saaffiginnissutigissavarsi, tassanilu aapparisamut akilersuutit pillugit apeqqut averusernermi imaluunniit avinnermi atuutissanersoq suliarineqassalluni.

Angutit arnallu aapparisamut akilersuutinik qinnuteqarsinnaapput.

Aapparisamut akilersuuteqarnissamut pisussaaffik namminerisamik atorunnaassaaq, akilersuutinik akilersuisuusoq toqukkut qimaguppat imaluunniit akilersuutinik pissarsisartoq kateqqippat.
Katissimalluni aapparisamut akilersuutit

Katissimatillutit aapparisamut akilersuutinik qinnuteqarniaruit, assersuutigalugu isumaqatigiinngissuteqarneq pissutigalugu najugaqatigiikkunnaarsimagussi, taava Kalaallit Nunaanni Naalagaaffiup Sinniisoqarfianut saaffiginnissaatit.

Aapparisamut akilersuutinik allannguinissamut immersuiffissaq

Averusernerup imaluunniit avinnerup kingorna aapparisamut akilersuutit
Kalaallit Nunaanni Naalagaaffiup Sinniisoqarfia aqqutigalugu averusissagussi imaluunniit avissagussi, averusernermut imaluunniit avinnermut atatillugu aapparisamut akilersuutit pillugit apeqqut aalajangiunneqassaaq.

Akilersuinissamut pisussaaffeqarnissaq isumaqatigiissutigissagussiuk, aamma pilersuinerup sivisussusissaa isumaqatigiissutigissavarsi, assersuutigalugu averusernerup imaluunniit avinnerup kingorna ukiuni aalajangersimasuni pissasoq isumaqatigiissutigissallusiuk.

Akilersuuteqarnermi akilersuutigineqartussaq annertussusilertariaqanngilarsi. Tamanna pillugu Naalagaaffiup Sinniisoqarfianit ikiorneqarsinnaavusi. Akilersuutissat Ankestyrelsens Familieretsafdelingimit maleruagassat naapertorlugit aalajangersarneqartut aallaavigalugit aalajangersagaasarput. Matumani atuupput ilaatigut:

• Aapparisat isertitaat akileraarutit sioqqullugit
• Meeqqanut akilersuuteqarsimagaanni taakku ilanngunneqassapput aamma pisussaaffiit allat meeqqanut tunngasut

Aamma akilersuinissamut pisussaaffeqartoqassasoq isumaqatigiissutigisinnaavarsi, taamaattorli siullermik akiliisoqassannginnera aallarniutigisinnaallugu. Arlassi kissaatigilerpagu akilersuuteqarnissami akimik aalajangersaasoqassaaq.

Aapparisamut akilersuuteqarnermi akilersuutissat aalajangersimasuunissaat isumaqatigiissutigissagussiuk, arlassi qinnuteqaatigissappagu Naalagaaffiup Sinniisoqarfianit kingusinnerusukkut allanngortinneqarsinnaassanersoq isummerfigissavarsi.

Averusernermi aapparisamut akilersuutit averusernerup nalaani taamaallaat atuutissanersut toqqarsinnaavarsi. Aapparisamut akilersuutit avinnerup kingorna aamma atuutissasut toqqarussiuk, atugassarititaasut pillugit oqaloqatiginnikkiartoqqaarasi kingusinnerusukkut avissinnaavusi. Taamaattorli avinnermut atatillugu atugassarititaasut pillugit oqaloqatiginnikkiartornissamut kissaateqarnissarsi periarfissaajuassaaq.

Eqqartuussivik aqqutigalugu averuserneq aamma avinneq
Eqqartuussivik aqqutigalugu averusissagussi imaluunniit avissagussi, averusernermut imaluunniit avinnermut atatillugu aapparisamut akilersuutit pillugit apeqqut aamma aalajangiivigineqassaaq.
Allannguuteqarneq
Akilersuutit allanngortinneqarnissaat kissaatigissagukku, aapparisamut akilersuutit pillugit suliamut ilinnut tunngasumut siullermik oqartussaasutut aalajangiisoq attavigissavat, tassa imaappoq Naalagaaffiup Sinniisoqarfia imaluunniit eqqartuussivik. Aamma ilissi nammineerlusi akilersuutit annertussusaata allanngortinneqarnissaa isumaqatigiissutigisinnaavarsi.

Aapparisamut akilersuutit siullermeerluni Naalagaaffiup Sinniisoqarfianit aalajangiiffigineqarsimappat, allanngortinnissaanut qinnuteqaat immersussavat.

Aapparisamut akilersuutinik allannguinissamut immersuiffissaq

Aamma Kalaallit Nunaanni Naalagaaffiup Sinniisoqarfianut qinnuteqarnissamut immersuiffissaq aasinnaavat imaluunniit Nuup avataaniikkuit politiinut aasinnaavat.

Qinnuteqarnermi allakkat pisariaqartut tamaasa ilanngutissavatit. Qinnuteqarnissamut immersuiffissami takuneqarsinnaapput allakkat suut illit ilanngussinnaaneritit. Allakkat eqqortut ilanngussimanngikkukkit, Naalagaaffiup Sinniisoqarfianit suliaq ilinnut tunngasoq suliarineqarsinnaanngilaq.

Qinnuteqaat kiisalu allakkat pisariaqartut Kalaallit Nunaanni Naalagaaffiup Sinniisoqarfianut nassiutissavatit imaluunniit tunniukkiartussavatit imaluunniit Nuup avataniikkuit najukkanni politeeqarfimmut tunniukkiartussavatit.

Malugiuk
Naalagaaffiup Sinniisoqarfia aqqutigalugu averusersimagussi imaluunniit avissimagussi aammalu isumaqatigiissutigalugu aapparisamut akilersuutit kingusinnerusukkut annertussusaa Naalagaaffiup Sinniisoqarfianit allanngortinneqassanngitsoq, akilersuutip annertussusaa taamaallaat eqqartuussivimmit allanngortinneqarsinnaavoq.

Siullermeerluni eqqartuussivimmit aapparisamut akilersuutit pillugit suliaq ilinnut tunngasoq aalajangiivigineqarsimappat, akilersuutip annertussusaata allanngortinneqarnissaa pillugu eqqartuussivimmut saaffiginnissaatit.
Naalagaaffiup Sinniisoqarfia
Indaleeqqap Aqq. 3
Postboks 1030
3900 Nuuk

Oqarasuaat: (+299) 32 10 01
E-mail: ro@gl.stm.dk
Nittartagaq: www.rigsombudsmanden.gl