Oqaluffimmi katinneq

Oqaluffimmi katinneq rådhusimi katinnertulli inatsisitigut illersorneqarsinnaavoq . Oqaluffimmi katinneq naalagiarnermi suliatut ingerlanneqartarpoq, qinunertaqarluni, tussiarnertaqarluni, bibelimit atuaanertaqarluni, katinnermullu atatillugu oqaluussisoqarluni pilluaqqusinertaqarlunilu. Oqaluffimmi katinneq kristumiussusermik upperisaqarnermut aamma attuumassuteqarpoq.

Katititsineq oqaluffissinni palasissinnit ingerlanneqassaaq. Katinneq minnerpaamik uppernarsaasussanik marlunnik najorneqassaaq.

2016-imi apriilip aallaqqaataani suiaaqatigiillutik aappariittut oqaluffimmi katissinnaalernikuupput.

Oqaluffimmi katinniaraanni:
• Minnerpaamik arlarsi ilagiinnut ilaasortaassaaq
• 18-it inorlugit ukioqassanngilasi
• Arlarsi tamassiluunniit siusinnerusukkut katinnikuusimagussi, taava eqqartuussivimmit avinnissamut akuersissummik piniassaasi
• Aningaasaqarneq eqqarsaatigalugu avereersimasut aningaasaataat immikkuulereersimassapput

Katitsinnasi katissimanermut uppernarsaat immersorlugulu ullulerlugu atsiussavarsi.

Katissimanermut uppernarsaat uani aajuk

Palaseqarfimmi allami najugaqartuullusi palaseqarfimmi allami katikkusukkussi, taava katissimanermut uppernarsaatip immersorneqarsimasup assilinera najugaqarfissinni palaseqarfimmut tunniutissavarsi, taakkulu misiliutitut uppernarsaammik sanaatissavaasi. Misiliutitut uppernarsaatip qulakkeerpaa katissimasutut inuunissamut piumasaqaatinut naapertuuttusi, ullorlu atuutilerneqarfianiit siumut qaammatit sisamat atuutissaaq.

Katissimanermut uppernarsaatip atsiorneqarneraniit sapaatit akunneri sisamat qaangiutsinnagit palaseqarfiup katiffissassi allaffeqarfianut saaffiginnissaasi katiffissassi ullua qaquguussanersoq isumaqatigiissutigiartorlugu. Siusinaarlusi saaffiginnissaasi katinnissarsi ullulerneqarniassammat.

Palaseqarfimmut saaffiginnitsigasi makku nassarnissaat isumannaassavarsi:
• Kuisinnermut atimulluunniit allagartassi assilinera
• Arlarsi tamassiluunniit avissimagussi avinnissamut akueritinnermut uppernarsaat(it) assilineri nassassavasi
• Katissimanermut uppernarsaat. Uppernarsaat sapaatip akunnerinik sisamat sinnerlugit pisoqaassuseqassanngilaq
• Misiliutitut uppernarsaat, palaseqarfimmi allami katissagussi

Anordning nr. 307 af 14. maj 1993 om ægteskab og opløsning (med senere ændringer).