Ilaqutariittut paarsisartunngorniarlutit qinnuteqarit

Ilaqutariit paarsisartut tassaapput ilaqutariit utaqqiisaasumik ulloq unnuarlu meeqqanik aamma inuusuttunik namminneq angerlarsimmavimminni paarsinissamik neqeroortartut, tamanna ima paasineqassaaq; angajoqqaat meeqqaminnik isumaginnissinnaanngikkaangata meeraq ilaqutariinni paarsisartuni najugaqartassasoq.
Ilaqutariit taamaattut meeqqap illersornissaanut meeqqallu ilaqutariit iluanniiginnarnissaanut, meeqqap imaluunniit inuusuttup angajoqqaavimminut utersinnaalernissaata tungaanut, imminnut pisussaaffilertarput.

Assigiinngitsunik peqquteqartumik meeraq angerlarsimaffiup avataanut inissinneqarsinnaasarpoq, aamma meeqqap ilaqutariinni paarsisartuniinnissaanut piffissap sivisussusaa assigiinngiiaarsinnaasarpoq.
Meeqqat ataasiakkaat angajoqqaavisalu qanoq inissisimanerat tamatigut aallaavigineqartarput.
Meeqqap qanoq inissisimaneranut, pisariaqartitaanut aamma meeqqap ineriartoqqinnissaanut naleqqiullugu angerlarsimaffiup avataanut inissiilluni aaqqiinissaq kommunip pitsaanerpaatut nalilersimatillugu, ilaqutariit paarsisartunut inissiisoqartarpoq.

• 18-inik ukioqalereersimassaatit.
• Pinerlisimannginnermut uppernarsaat pinerluuteqarsimannginnernik allanneqartoq pigissavat

Ilaqutariit paarsisartut assigiinngiiaartuupput:

Ilaqutariit qanigisaasut paarsisartut
Ilaqutariit qanigisaasut paarsisartut tassaapput inuit meeqqap ilaqutai imaluunniit eqqarlii, aammali imaassinnaavoq tassaasut ilaqutariinnut ikinngutaasut imaluunniit inuussutissarsiutigalugu ilaqutariit paarsisartut meeqqamut immikkut atassuteqartut imaluunniit attuumassuteqartut. Siunertaq anguniarneqartorlu tassaavoq meeqqap qanigisaminiit avatangiisiminiillu sungiusimasaminit peersinneqannginnissaa.

Kommunip aaqqissuussaanik ilaqutariit paarsisartut
Kommunip aaqqissuussaanik ilaqutariit paarsisartut meeqqanik siornatigut ilisarisimanngisaminnik paarsisarput. Ilaqutariit paarsisartut meeqqap aalajangersimasup pisariaqartitaanik aamma unamillernarisaanik kivitsisussanngorlugit kommunimit toqqarneqartarput.
Taamaattumik ilaqutariit paarsisartut misilittagaqartuunissaat aamma meeqqap aalajangersimasup pisariaqartitaanik aamma unammillernarisaanik kivitsinissamut piginnaasaqartuunissaat piumasaqaataasarput.

Inuussutissarsiutigalugu ilaqutariit paarsisartut
Inuussutissarsiutigalugu ilaqutariit paarsisartut tassaapput angajoqqaarsiaasuni minnerpaamik ataaseq isumaginninnermik ilinniagaqarsimanissaanik imaluunniit isumaginninnermik ilinniagaqarnermut sanilliunneqarsinnaasumik misilittagaqartuunissaanik piumasaqaatitaqartumik ilaqutariittut paarsisartut.
Meeqqat immikkut ittunik unammilligassallit inuussutissarsiutigalugu ilaqutariinnut paarsisartunut inissinneqartarput.
Meeqqat inuusuttullu tarnimikkut sakkortuumik innarlerneqarsimasut aamma sakkortuumik sumiginnarneqarsimasut, imaluunniit meeqqat inuusuttullu innarluutillit, ilaqutariinnit inuussutissarsiutigalugu paarsisartunit paaqqutarineqarunik atugarissaarnerussinnaasutut kommunimit naliliiffigineqartut taakkununnga inissinneqartarput.

Pinasuartumik ilaqutariit paarsisartut
Pinasuartumik ilaqutariit paarsisartut tassaapput kommunip aaqqissuussaanik ilaqutariit paarsisartut imaluunniit inuussutissarsiutigalugu ilaqutariit paarsisartut pinasuartumik meeqqanik paarsaqartartut.
Pinasuartumik ilaqutariittut paarsisartut kommunimik sullinnissaminnut sillimasarput taamaalillutillu - aamma piffissap sivikitsuaqqap iluani nalunaarfigineqareernerup kingorna - pinasuartumik meeqqanik paarsaqarsinnaasarlutik.

Oqilisaassillutik ilaqutariit paarsisartut
Angerlarsimaffiup avataani meeqqamut oqilisaassisoqarnissaa pitsaanerpaajussasoq kommunip nalilersimagaangagu meeraq imaluunniit inuusuttoq oqilisaassillutik ilaqutariit paarsisartut paarisarpaat.
Meeqqap sivikinnerusumik sivisunerusumilluunniit najugaqarallarnissaanik aalajangersimasumik isumaqatigiissusiorluni oqilisaassinissamik aaqqiissuussiortoqarnissaanik isumaqatigiittoqartarpoq.
Sapaatip akunnerata qaammatilluunniit ingerlanerani ulluni aalajangersimasuni akunnialuit oqilisaassinissaq pineqakkajuttarpoq.

Nammineq aaqqissuussamik ilaqutariit paarsisartut
Nammineq isumaqatigiissutigisamik ilaqutariit paarsisartut paaqqutarinnitsillugit meeqqamut angajoqqaatut oqartussaassuseqartup tamanna nammineerluni aaqqissuussarisarpaa.
Isumaqatigiissutigisamik meeqqap ilaqutariinni paarsisartuni najugaqarnera meeqqat meeqqat tapersersorneqarnissaannik inatsimmi aalajangersakkat naapertorlugit ikiorsiissutitut isigineqarneq ajorpoq. Najugaqarneq angajoqqaatut oqartussaassusillip aamma ilaqutariit paarsisartut akornanni isumaqatigiissuteqarnerannik taamaallaat tunngaveqarpoq.

Paarsisuunermut aningaasarsiat

Nalinginnaasumik ilaqutariit paarsisartut

Aningaasarsiat qaammammut .......................................... 5.902 kr.

Paarsisuunermut aningaasarsianit 75 pct.-ii akileraarutinut tapiliutitut tunniunneqassapput nalinga:............................................................................ 4.427 kr.

Aningaasarsiat qaammammut, akileraarutinut tapiliutit ilanngullugit annertussuseqassapput: .......................................................................................10.329 kr.

Paarsisuunermut aningaasarsianik qaffaasoqassappat, qaffaanermi akileraarutinut tapiliuteqassanngilaq.

Nukinginnartumik inissiineq, akileraarutinut tapiliut ilanngullugu

Aningaasarsiaq ulloq unnuarlu....................................................................................562 kr.

Paarsisuunermut aningaasarsiap 75 pct.-anik akileraarutinut tapiliut tunniunneqartarpoq nalinga:......................................................................................................................422 kr.

Nukinginnartumik ulloq unnuarlu inissiinermi aningaasarsiaq akileraarutinut tapiliutit ilanngullugit.............................................................................................................. 984 kr.

Oqilisaassineq akileraarutinut tapiliut ilanngullugu

Aningaasarsiaq ulloq unnuarlu, missingersuut, ...........................................................393 kr.

Oqilisaassinermi aningaasarsianit akileraarutinut tapiliut 75 pct.-anik tunniunneqartarpoq nalinga...................................................................................................................... 295 kr.

Oqilisaassinermi ulloq unnuarlu aningaasarsiaq akileraarutinut tapiliut ilanngullugu.... 688 kr.

Atuarfimmiinnerani piareersimaneq Aningaasarsiaq qaammammut ............................ 885 kr

Inuussutissarsiutigalugu ilaqutariit paarsisartut

Tunngaviusumik akissarsiat, qaammammut

Akissarsiat 1. Januar 2026 .............................................................................27.423,72 kr.

Akissarsiat 1. April 2026.................................................................................27.670,54 kr.
Immikkut tapeqartitsineq, ukiumut

Meeqqamut ataasimut...........................................................................................55.200kr

Meeqqanut marlunnut.........................................................................................147.600 kr.

Meeqqat pingajuat* , ilassut.................................................................................14.042 kr

*Meeqqap pingajuata inissinnissaanut piumasaqaataavoq, inuussutissarsiutigalugu ilaqutariinni paarsisartut marluunissaat. Tassunga atatillugu tapeq tapit allat saniatigut immikkut tapiuvoq.

Nerisaqarneq, kaasarfimmiussat atisassarsiutissallu kiisalu inissiinermi allatsinnermut aki

Inissiinermi allatsinnermut aki, ataasiartumik aningaasat, annerpaamik ...................... 8.526 kr

Kaasarfimmiussat atisassarsiutissallu

Meeqqat inuusuttullu 16-it inorlugit ukiullit, ulloq unnuarlu ataaseq..............................62,02 kr

Meeqqat inuusuttullu 16-iniit 18-inut ukiullit, ulloq unnuarlu ataaseq............................71,61 kr

18-it sinnerlugit ukiullit, siusinaartumik pensionisiaqanngitsut, qaammammut.............2.267 kr

Nerisaqarneq Ilaqutariinnut paarsisunut nerisaqarnermut aningaasat qaammammut. 1.432 kr.

Qinnuteqaatit digitalikkut nassiukkusukkukku una tuussavat ”Maana qinnuteqarit”.

Nammineerluni immersuiffissamut aaqqiissutissaq atorniarukku nammineerlutit MitID-risat atorlugu qarasaasiamut isissaatit.

Ilaqutariittut paarsisartunngorniarlutit qinnuteqarniaruit, qinnuteqarniarluni immersugassaq immersussavat.

Toortagaq sungaartoq “Maana qinnuteqarit” tooriarlugu:

• “Immersoruk anisillugulu” toqqassavat, immersugassaq attaveqaatitigoortumik immersoriarlugu pappiaranngorlugu anisikkusukkukku (MitID pisariaqanngilaq)
• “Anisiguk” toqqassavat, immersugassaq pappiaranngorlugu aniseriarlugu assammik allallutit immersoriarlugu, immersoreerukku tunniukkiartussagukku (MitID pisariaqanngilaq)
  
  

Immersugassaq immersoriarlugu najukkanni kommunimut imaluunniit isumaginnittoqarfimmut tunniutissavat.

Kommunip illit qinnuteqaatit sullissivik.gl aqqutigalugu tiguguniuk imaluunniit illit kommunimut ornigullutit qinnuteqaatit tunniukkukku, kommunip uppernarsaatit makkua pissarsiariniarlugit aallertarpoq:

• Meeqqanik pinerlisimannginnermut uppernasaat
• Peqqissutsimut uppernarsaat
• Akileraartarfimmut aningaasaqarneq pillugu paasissutissat
  
  

Kommuni illit angerlarsimaffinnut pulaassaaq aamma illit/ilissi ataatsimeeqatigereerunisi isumaginninnermut nalunaarusiussaaq.