airplanebooksbriefcase business cogs cross election entertainment fish house law lockmedicalpeopleselfservices socialtax

Kommunerisannuinnaq aalajangersimasunik paasissutissaqarpoq

Kommune toqqaruk
Nalinginnaasumik paasissutissiineq
Erninermi ullormusiat aningaasaqarnikkut ikiorsiissutaapput, angajoqqaat erninermut atatillugu sulinngiffeqarnerminnut pissarsiarisinnaasaat. Angajoqqaanngortussaaguit pisortaniillu piffissami siusinnerusukkut ikiorsiiffigineqarnak, erninermi ullormusiaqarneq pillugu malittarisassanut ilaavutit.

Erninermi ullormusiat qanoq annertutigisut pissarsiarisassaneritit assigiinngitsuupput, matumani sulinermik inuussutissarsiortuunersutit, ilinniartuunersutit, namminersortuunersutit imaluunniit namminersortumik inooqateqarnersutit apeqqutaalluni.

Erninermi ullormusiat ullut 14-ikkaarlugit tunniunneqartarput.

Erninermi ullormusiat akileraaruteqaataasussaapput.
Piumasaqaatit
Erninermi ullormusianik pisartagaqarsinnaavutit illit:
• Kalaallit Nunaanni najugaqartutut inuit allattorsimaffianni nalunaarsorsimaguit
• Sapaatit-akunneri kingulliit 13-it sivikinnerpaamik akunneq ataaseq sulisimaguit
• Sulinngiffeqarnerup nalaani sulisitsisunnit akissarsiaqanngikkuit
• Erninermut inatsimmi piumasaqaataasut naammassisimagukkit
Akigititat
Sulinermik inuussutissarsiuteqartuuguit
Sulinermik inuussutissarsiuteqartuuguit erninermilu sulinngiffeqarnerup nalaani akissarsiornak SIK-p isumaqatigiissutaa malillugu sulisartup ilinniagaqarsimanngitsup 18-it sinnerlugit ukiullip ikinnerpaatut akissarsiarisartagaata erninermi ullormusiat amerlaqatigaat. Aningaasat taakku akunnernut sapaatit-akunnerini kingullerni 13-ini suliffigisimasavit naleqqatigaat, taamaattoq sapaatip-akunneranut akunnerit amerlanerpaamik 40-t tikillugit.

Ilinniagaqartuuguit
Ilinniartuuguit erninermi ullormusiat ilinniarnersiutivit sulillutit misiliininni akissarsiavit imaluunniit meeqqamut tapit ilanngullugit tapiissutisiarisartakkavit mannalu tikillugu pissarsiarisarsimasavit amerlaqatigaat aamma meerartaannut meeqqamut tapit allat ilaassapput.

Namminersortuuguit imaluunniit namminersortumik inooqateqaruit
Namminersortuuguit imaluunniit namminersortumik inooqateqaruit erninermi ullormusiat sapaatit-akunnerini kingullerni 13-ini akunnerit 182-it naleqqatigaat. Tassa sapaatip-akunneranut ataatsimut akunnerit 14-it.

Isertitatit qaffasinnerusimappata, tamanna assersuutigalugu tunisinermi allagartat atornerisigut uppernarsassavat.
Qinnuteqarneq
Erninermi ullormusianik pisartagaqalernissaq qinnuteqaatiginiarukku, najukkanni innuttaasunut sullissivimmut imaluunniit nunaqarfimmi allaffimmut saaffiginnissaatit. Pappiaqqat uppernarsaatit assigiinngitsut nassassagakkit eqqaamassavat.

Arnat
Arnat/anaanaasut nassiutissavaat nassarlugilluunniit:
• Qinnuteqaatitut immersugassaq immersugaq
• Ernisussiortumit naartunermut uppernarsaat
• Sapaatit-akunnerini kingullerni 13-ini akissarsiavit allagartaat
• Akileraartarnermut allagartat
• Kontuit normua
• Sulinngiffeqarnerup nalaani sulisitsisunnit akissarsiaqartitaannginnissamut uppernarsaat

Angutit
Angutit/ataataasut nassiutissavaat nassarlugilluunniit:
• Qinnuteqaatitut immersugassaq immersugaq
• Sapaatit-akunnerini kingullerni 13-ini akissarsiavit allagartaat
• Akileraartarnermut allagartat
• Kontui normua
• Meeqqap anaanaanut katissimanngikkuit, ataatassarsiuussinermut immersugassaq Politiineersoq immersugaq
• Sulinngiffeqarnerup nalaani sulisitsisunnit akissarsiaqartitaannginnissamut uppernarsaat

Meeqqamut inatsisitigoortumik ataataaguit, erninermi ullormusianik pisartagaqarnissamik qinnuteqarsinnaavutit – naak meeraq aamma ilinni najugaqanngikkaluartoq. Taamaattoq sapaatit-akunnerini pingasuni pisartagaqarnissamut pisinnaatitaaffeqarputit.

Angajoqqaavissiartaassanut angajoqqaarsianullu
Angajoqqaavissiartaassat angajoqqaarsiallu erninermi ullormusianik qinnuteqarsinnaapput. Erninermi ullormusianik qinnuteqarniaruit najukkanni innuttaasunut sullissivimmut imaluunniit nunaqarfimmi allaffimmut saaffiginnissaatit.
Piffissaliussatut killigititat
Naatsorsuutigisamik erninissamut sapaatit-akunneri 13-it sioqqullugit sulisitsisunnut nalunaaruteqassaatit.
Maalaaruteqarneq
Erninermi ullormusiaqarnissamik qinnuteqarsimaguit, qinnuteqaatillu tamakkiisumik taperserneqarsimanngippat, kommune tunngavilersuinissaminut maalaaruteqarnissamullu ilitsersuinissaminut pisussaaffeqarpoq.

Assersuutigalugu aalajangiinerit maalaarutigisinnaavatit makku:
• Sulinngiffeqarnerup nalaani ullormusiaqarnissamut pisinnaatitaaneq
• Erninermi ullormusianik pinngitsaalisaasumik aqutsivigineqarneq
• Aningaasanik utertitsinissamut piumasaqaateqarneq

Maalaaruteqarumaguit, Isumaginninnermi Maalaaruteqarnermi Aalajangiisartunut taama iliorsinnaavutit.

Isumaginninnermi Maalaaruteqarnermi Aalajangiisartunut maalaaruteqarit
Allaaserisat attuumassutillit