Erninermi sulinngiffeqarneq
Angajoqqaajusut sulinngiffeqarnerup nalaani sulilersimappata tamanna sulinngiffeqarnermik unitsitsinertut nalilerneqassaaq. Taamaattumillu sulinngiffeqarneq nangeqqinneqarsinnaanngilaq.
Erninermi sulinngiffeqarnerit pisut ilaanni sivitsorneqarsinnaavoq. Tamannalu pisinnaavoq soorlu erninermi sulinngiffeqarnerup nalaani meeqqat napparsimmavimmut unitsinneqarpat.
Sulisartuuguit, akissarsiaqaatigalugu erninermi sulinngiffeqarsinnaatitaavutit.
Aningaasarsiat pillugit erninermi sulinngiffeqarnerup ataani paasissutissat allat atuakkit
Ernereernermi aningaasarsiaqarniaraanni piumasaqaatit ukuupput:
• Anaanaasoq erniffissatut naatsorsuutigineqartoq sapaatit-akunnerinik marlunnik sioqqullugu naartunerminut atatillugu sulinngiffeqarsinnaatitaavoq
• Anaanaasortaaq ernereernermi kingorna sapaatit-akunnerini 15-ini erninerminut atatillugu sulinngiffeqarsinnaatitaavoq
• Ataataasoq meeqqap inunngorneraniit sapaatit-akunnerini 3-ni meerartaarnerminut atatillugu sulinngiffeqarsinnaatitaavoq. Sapaatit-akunnerini 3-ni sulinngiffeqartoqassaaq meeqqap inunngorneraniit sapaatit-akunnerini 15-it siulliit iluanni
• Taakkua saniatigut sapaatit-akunnerini 17-ini angajoqqaatut sulinngiffeqarsinnaatitaavusi, taakku ilussinni agguataassavasi. Sapaatit-akunnerini 17-ini angajoqqaatut sulinngiffeqarfissat ingerlanneqassapput anaanaasup sapaatit-akunnerini 15-ini erninermut atatillugu sulinngiffeqarneranut ilassutitut. Angajoqqaatut sulinngiffeqarfissat ataatsikkut ingerlassinnaanngilasi
Marlulissanik, pingasulissanik imaluuniiit arlalinnik meerartaarussi uku atuupput:
• Anaanaasoq sapaatit-akunnerinut 15-inut taarsiullugu sapaatit-akunnerini 19-ini erninermut atatillugu sulinngiffeqarsinnaatitaavoq
• Sapaatit-akunnerinut 17-inut taarsiullugu angajoqqaatut sapaatit-akunnerini 21-ni sulinngiffeqarsinnaatitaavusi
Meeravissiartaartussat
Meeravissiartaartut angajoqqaaviusutuulli pisinnaatitaaffeqarput. Ernivissatulli naatsorsuutigineqartoq sioqqullugu sapaatit-akuernnerini marlunni sulinngiffeqarnissaq ilanngunnagu. Matumani meeravissiartaartunut maleruagassat allat atuupput:
• Meeraq Kalaallit Nunaanneersoq meeravissiartaarigukku, meeqqap tigunissaa sioqqullugu sapaatip-akunnera sulinngiffeqarnissamut pisinnaatitaaffeqarputit
• Meeraq Kalaallit Nunaata avataaneersoq meeravissiartaarigukku, meeqqap tigunissaa sioqqullugu sapaatit-akunnerini pingasuni sulinngiffeqarnissamut pisinnaatitaaffeqarputit
Sapaatip-akunnerani ataatsimi aamma pingasuni sulinngiffeqarnissaq pillugu maleruagassat, meeraq ilisarisimareersimanngikkukku taamaallaat atuupput.
• Sulileqqikkuit
• Sulinngiffeqaleruit imaluunniit sulinngiffeqarnermi aningaasarsiat tunniunneqarpata
• Atuartitsinermi ilinniakkamiluunniit peqataaleruit
Erninermut atatillugu sulinngiffeqarnerit unitsikkukku, piffissaq sulinngiffeqarnissap sinnera atorunnaarsinnaassaaq. Tamatuma kingunerisaanik piffissap sinnerani ullormusianik pisartagaqarnissamut pisinnaatitaaffeqarnerit annaassavat.
Sulileqqinneq
Inuit amerlasuut sulinermut isumaqatigiissutigisartik malillugu erninermut atatillugu sulinngiffeqarnerminni akissarsiaqaannarnissamut pisinnaatitaaffeqarput. Illit erninermut atatillugu sulinngiffeqarnivit nalaani akissarsiaqaruit, piffissaq akissarsiaqarfigisat naappat aatsaat piffissaq ullormusiaqalerfiit aallartissaaq.
Taamaallaanuna piffissami ullormusiaqarfigisanni sulileqqissinnaanngitsutit, taamaalillutillu sulinngiffeqarnerit unitsillugu.
Sulinngiffeqarnerit unitsissinnaanngilat:
• Killilimmik innuttaasutut pisussaaffinnik ingerlatsiguit, assersuutigalugu atuarfimmi siulersuisutut imaluunniit kommunalbestyrelsimut ilaasortatut
• Piffissami sivikitsumi sulinermut attuumassuteqartumik pikkorissarnerni, ataatsimeersuarnerni, qulequtaqarluni ulloqarnermi assigisaaniluunniit
Sulinngiffeqarneq aamma sulinngiffeqarluni aningaasarsiat
Piffissami ullormusiaqarfinni sulinngiffeqaruit imaluunniit sulinngiffeqarnermi aningaasarsiguit, erninermut atatillugu sulinngiffeqarninnik unitsitsinertut tamanna isumaqarpoq. Taamaattumik piffissap ullormusiaqarfiusup naanissaanut sulinngiffeqarnermi aningaasarsiassat tigunissaat utaqqissuttariaqarpat.
Atuartitaaneq ilinniartitaanerlu
Ilinniartuuguit, erninermut atatillugu sulinngiffeqarnerup unitsinneranik kinguneqanngitsumik, atuartitsinermi annikitsumik peqataasinnaavutit. Annikitsumik peqataaneq assersuutigalugu tassaasinnaavoq:
• Ilinniaqatigisanik ataatsimeeqateqarneq
• Atuartitsineq suugaluartorluunniit
• Immikkut ittumik allaaserisamik allanneq
• Imaluunniit soraarummeernermi peqataaneq
• Piffissami sulinngiffeqarfiusup nalaani meeraq napparsimmavimmut unitsinneqarpat
• Erninerup kingorna nalinginnaasumik uninngatinneqareernermi meeraq angerlartinneqarsimanngippat
Piffissami sulinngiffeqarnerup nalaani napparsimmavimmut unitsinneqarneq
Piffissami sulinngiffeqarfigisinnaasatut pisinnaatitaaffigisavit nalaani meeqqat napparsimmavimmut unitsinneqarpat, piffissap uninngaffiusup sivisoqataanik piffissaq sulinngiffeqarfigisassat sivitsorneqassaaq. Piffissarli sulinngiffeqarfigisinnaasaq sivisunerpaamik sapaatit-akunnerinik 13-inik sivitsorneqarsinnaavoq.
Erninerup kingorna sapaatit-akunneri 15-it ingerlaneranni ataataasup sapaatit-akunnerini pingasuni sulinngiffeqarnissamut pisinnaatitaaffia sivitsorneqarsinnaanngilaq. Aamma meeraq napparsimmavimmut unitsinneqaraluarpat.
Erninerup kingorna angerlarnissap kinguartinnera
Nakorsap naliliinera patsisaalluni, erninerup kingorna nalinginnaasumik piffissap uninngaviusartup qaangiunnerani meeqqat angerlarsinnaanngippat, piffissamik meeqqap uninngaviata sivisoqataanik piffissaq sulinngiffeqarfigisassat ilaneqasaaq.
Meeqqavit uninnganerata malitsigisaanik sulinngiffeqarnerit unitsissagaluarukku, meeqqap angerlartiinneqarnerata kinguninngua, piffissaq sulinngiffeqarfissaq sinneruttoq ingerlateqqilersinnaavat. Tassa ima paasillugu, nalinginnaasumik uninngavissap kingorna meeqqat angerlartinneqanngimmat, sulileqqikkuit assigisaanilluunniit iliorlutit, sulinngiffeqarnerit unitsinneqanngitsutut isigineqassaaq.
Assersuutigalugu aalajangiinerit maalaarutigisinnaavatit makku:
• Naartunermi aamma erninermi sulinngiffeqarneq
• Meeravissiartaarnermi sulinngiffeqarneq aamma meerarsiaqarnermi atukkat
• Erninermut atatillugu sulinngiffeqarnermik unitsitsineq
Maalaaruteqarumaguit, Isumaginninnermi Maalaaruteqarnermi Aalajangiisartunut taama iliorsinnaavutit.
Isumaginninnermi Maalaaruteqarnermi Aalajangiisartunut maalaaruteqarit
- Naartunermi, erninermi meeravissiartaarnermilu sulinngiffeqartarneq ullormusiaqartarnerlu pillugit Inatsisartut inatsisaat nr. 14, 7. december 2009-imeersoq (ltl 14 2009)
- Meeqqamik paarisassamik inissiinermi sulinngiffeqartarneq pillugu Namminersorlutik Oqartussat nalunaarutaat nr. 3, 26. februar 2010-imeersoq (bkg 03 2010)