Ulluunerani paaqqinnittarfiit

Ulluunerani paaqqinnittarfik meeqqanut 0-6 ukiullit tikillugit ulluunerani perorsaanermut tunngasutigut neqeroorutaavoq. Ulluinnarni meerarisat perorsaasutut ilinniarsimasunik sulisuniit tamaani paarineqarsinnaavoq. Ulluunerani paaqqinnittarfiit ataasinngornermiit tallimanngornermut ulluunerani ammasarput.
Perorsaasutut sulisut meeqqat ataasiakkaat pisariaqartitaannut ineriartornerannullu tulluarsakkanik sammisassanik pilersaarusiorlutillu ingerlatsisarput. Meeqqat allat peqatigalugit ulluinnarnik toqqissisimanartunik, ilinniarfiulluartunik nuannersunillu pilersitsinissaq anguniagaavoq.

Angajoqqaat akiliisarnerlu
Illit angajoqqaatut aalajangigassaraat meeqqat ulluunerani paaqqinnittarfimmi paarineqartassanersoq.
Meeqqap ulluunerani paaqqinnittarfimmi paarineqarnera akeqarpoq, akiliutip qaffasissusia inoqutigiit isertitaat tunngavigalugit naatsorsorneqartarpoq.

Atualerneq sioqqullugu meeqqanut ulluunerani neqeroorutit assigiinngitsuupput. Neqeroorut sorleq meeqqannut tulluarnerpaanersoq meeqqap ukiui sumilu najugaqarnersi apeqqutaapput – neqeroorutit nuna tamakkerlugu pissarsiassaanngimmata.

Ulluunerani neqeroorutit nalinginnaanerpaat tassaapput:

• Meeraaqqerivik – meeqqanut 0-2-nut ukiulinnut
• Angerlarsimaffimmi paarsineq – meeqqanut 0-2-nut ukiulinnut, ofte i et privat hjem med en fast dagplejer
• Meeqqerivik – pisortaniit namminersortullu, meeqqanut 3-6-inut
• Init pinnguartarfillit – meeqqanut 0-6-inut ukiulinnut, inersimasumik peqateqarluni (ass. angajoqqaaq)
• Nunaqarfimmi paaqqinnittarfiit – meeqqanut 0-6-inut ukiulinnut, tamatigungajak najugaqarfinnut minnernut tulluarsakkat
• Sammisaqartitsiviit allat – ass. ullup ilaanut inissat neqeroorutilluunniit, meeraq inersimasumik peqateqarluni peqataasinnaavoq

Ulluunerani paaqqinnittarfinni perorsaariaaseq suua?
Perorsaariaatsimi ilisimasat suleriaatsillu pineqarput. Matumani meeqqat perorsarneqarneranni, ilinniarneranni ineriartornerannilu pitsaanerpaamik qanoq tapersersuiffigineqassanersut pineqartunut ilaavoq. Meeqqat inuttut, inooqataanikkut suliatigullu ineriartorneranni ikiornissaannut ilisimasat iliuusissallu perorsaasutut sulisut ulluinnarni atortarpaat.

Ulluunerani paaqqinnittarfinni ulluinnarni perorsaariaaseq
Ulluunerani paaqqinnittarfinni perorsaasutut sulisut meeqqat ineriartornerannut anguniagassanik suliaqartarput. Anguniagassat tassaasinnaapput ass. meeqqat namminersorsinnaanerulernissaat, inuttut inooqataasinnaanissaat imaluunniit silarsuarmut avatangiiserisaminnut paasinnissuseqarlualernissaat. Suliatigut ilisimasatik aallaavigalugit meeqqat taakkuninnga anguniagassaannut ikiorniarlugit, sulisut periaatsit sammisassaqartitsinerillu assigiinngitsut atortarpaat. Ulluinnarni sulisut meeqqanik suleqateqarluaraangamik, timikkut, tarnikkut inooqataanikkullu ineriartornerannut nakussassaaqataasarput.

Ataatsimut siunnerfeqarneq naleqqussarnerlu
Ulluunerani paaqqinnittarfinni ataasiakkaani perorsaasutut sulisut ataatsimoorussamik perorsaariaatsimik sammiviliiniarlutik suleqatigiittarput. Tamanna meeqqanut eqimattanut meeqqallu ataasiakkaat pisariaqartitaannut naleqqussarneqartarpoq.

Meerarisat ulluunerani paaqqinnittarfimmikkaangat paarsineriinnaanngilaq – meeqqap ulluinnaanut ineriartorneranullu pingaaruteqarluinnartut ilagaat. Perorsaasutut sulisut ulluinnarmik toqqissisimanartumik ilikkagaqarfiulluartumillu pilersitsinissaq suliassaraat, meeraq ineriartornermini takuneqarluni, tusaaneqarlunilu tapersersorneqassaaq.

Meeqqat atugarissaarnerannik, ilinniarnerannik ineriartornerannillu siunnerfilimmik suliaqartoqartarpoq. Tamanna isumaqarpoq meeqqat paarineqaannassanngitsut, kisianni aamma paaqqinnittarfimmiinnerminni ilinniarlutillu ineriartussasut.

Meeqqat ataasiakkaat atugarissaarnerat ineriartornerallu qulakkeerniarlugu, ulluunerani paaqqinnittarfimmi sulisut ilai perorsaasutut ilinniarsimasuussapput. Ulluunerani paaqqinnittarfimmi sulisut assersuutigalugu tassaasinnaapput:

• Pisortaq perorsaasutut ilinniarsimasoq
• Meeqqat akornanni ulluinnarni sulisut – ass. perorsaasut, inulerinermi peqqissaanermilu ikiortit kiisalu ikiortit ilinniarsimanngitsut
• Igaffimmi sulisut eqqiaasullu
  
  

Ulluunerani paaqqinnittarfimmi suliniaraanni, pineqaatissinneqarsimannginnermut meeqqanillu pinerliisimannginnermut uppernarsaateqartariaqarpoq. Meeqqanik sullissinermi aporfiusinnaasunik qinnuteqartup pineqaatissinneqarsimannginnermut uppernarsaataani peqarnersoq kommunip misissussavaa. Uppernarsaatit akuerineqarsinnaanngippata atorfinittoqarsinnaanngilaq. Tamanna angajoqqaatut toqqissisimallutit meeqqavit paaqqinnittarfimmut tunniussinnaanissaanut qulakkeerinneqataassaaq.

Nipangiussimasussaatitaaneq
Ulluunerani paaqqinnittarfinni sulisut tamarmik nipangiussisussaatitaapput. Illit imaluunniit meeqqat pillugu paasissutissanik, paaqqinnittarfiup avataaniittumik avitseqateqaqqusaanngillat.

Meeqqamik atugarissaanngitsumik pasitsaassaqassaguit, qisuariannissannut innuttaasutut pisussaaffeqarputit. Tamanna tassaavoq nalunaaruteqartussaatitaaneq. Meeraq assersuutigalugu nakuusernermik, sumiginnagaanermik kinguaassiutitigulluunniit atornerlunneqarnermik nalaataqartoq pasitsaakkukku, isumaginninnermut oqartussaqarfik attavigissavat. Meeqqat ilaqutariillu namminneq aaqqiiffigisinnaanngisaminnik ajornartorsiutillit ikiornissaat nalunaaruteqartussaatitaanerup siunertaraa.

Sulianik ilisimasallit pisussaaffiat sukannerneruvoq.
Meeqqanik inuusuttunillu inuussutissarsiutigalugu suliallit tamarmik – ass. perorsaasut ulluuneranilu paaqqinnittarfinni suleqataasut – sukannernerusumik nalunaaruteqartussaatitaapput. Ulluunerani paaqqinnittarfimmi qanimut meeqqanik sullissisut, meeraq atugarliornersoq pillugu eqqumaffiginninnissaminnut immikkut ittumik akisussaaffeqarput.

Sulisut meeqqamik atugarliortumik pasitsaassaqassagunik, tamanna pillugu isumaginninnermut oqartussaqarfinnut nalunaarutiginninnissaminnik pisussaaffeqarput – allallu iliuuseqaqqaarnissaat utaqqeqqusaanngilaat.

Nakkutilliineq
Ukiumut ikinnerpaamik pingasoriarluni, tassannga ataaseq nalunaaruteqaqqaarani nakkutilliinerussaaq. Neqeroorutit toqqissisimanartuusut, ineriartortitsisuusut inatsimmillu eqquutsitsisuusut nakkutilliiartornerit qulakkiissavaat.

Ulluunerani paaqqinnittarfinni illut atorneqarnissaannut piumasaqaatit
Illunut ulluunerani paaqqinnittarfittut atorneqartussanut piumasaqaatit arlaqarput. Tamatumani meeqqat sulisullu toqqissisimasumi isumannaatsumilu inissimaffeqarsinnaanissaat qulakkeerniarneqarpoq.

Illut sanaartukkat malittarisassanik eqquutsitsinersut pillugit oqartussaqarfiit arlallit nakkutilliiartortarput:

• Qatserutaasiveqarfik aqqutissaqarluartoq qatserinissamullu atortunik pisariaqartunik peqarnersoq misissuisarpoq.
• Uumasut Nakorsaqarfia Inuussutissalernermullu Oqartussaqarfik, ilaatigut anartarfeqarfinnik igaffeqarfinnillu misissuisarpoq.
• Sullivimmi Nakkutilliisoqarfik sulisut sullivimmi avatangiisii – ass. eqqortumik kivitsisarnissaat meeqqanilluunniit sullissinerminni ajoquseratannginnissaat pillugu misissuisarpoq.
• Kommunalbestyrelse, ulluinnarni suliassamik ingerlatsivimmut akisussaaffimmik tunniussisoq, illut maleruagassanik malinninnersut pillugu misissuisarpoq. Inip angissusaanut naleqqiullugu meeqqat qassit inimeeqqusaanersut misissortarpaa. Assersuutigalugu meeraaqqerivimmi inimi ataatsimi meeraaqqat amerlanerpaamik 12-iusinnaapput, meeqqerivimmilu amerlanerpaamik 20-usinnaallutik.
  
  

Ulluunerani paaqqinnittarfik piumasaqaatinut tamanut eqquutsitsisimagaangat akuerineqarnermut uppernarsaat tunniunneqartarpoq. Illut atugassarititaasullu akuerineqarsimanerat illit angajoqqaatut takusinnaaniassagakku, uppernarsaat paaqqinnittarfimmi takuneqartariaannanngorlugu inissisimassaaq.