Angerlarsimaffimmi ikiorteqarneq

Angerlarsimaffimmi ikiorteqarneq nammineq inuttut angerlarsimaffigisami pisariaqartitat najoqqutaralugit, qanoq ukioqarnerit apeqqutaatinnagu, ikiorteqarneruvoq paaqqutarinninnerullunilu. Assersuutigalugu uffarnissamut aamma eqqiluisaarnissamut kiisalu allatigut eqqiaanermut, pisiniarnermut atisanillu errorsinermut ikiuinerusinnaavoq.

Angerlarsimaffimmi ikiorteqarnermittaaq nerisaqarnikkut aaqqiissuteqartitsisarput, tassani nerisassat kissartut kommunimi utoqqaat illuannit angerlarsimaffinnut aggiussisoqartarnissaanut pisisinnaallutit.

Qanoq ikiuitigisoqassanersoq ikiuisoq kisimi apeqqutaanngilaq, aammali ulluinnarni iluarisimaarinninninnut iluaqutaassappat nammineq peqataanissat apeqqutaassaaq. Taamatut ikiuineq taamaalilluni ilatsiinnartuunngilaq, suleqatigiinnerliuna.

Angerlarsimaffimmi ikiorteqarnermi siunertaasoq tassaavoq:
• Illit sapinngisamik sivisunerpaamik nammineq sungiusimasat atugaralugit angerlarsimaffinniissinnaanissat
• Nammineq angerlarsimaffinni toqqissisimanerit qulakkeerlugu
• Najukkanni avatangiiseqarsinnaanissat najukkannilu attavigisatit aamma ilaquttatit ikinngutitillu attavigiuarsinnaallugit

Inuuninni piffissap ilaani piginnaasatit annikillippata ulluinnarnilu nukissatit killeqalerlutik, suliassanut pisariaqartunut angerlarsimaffimmi ikiortimit ikorfartorneqarsinnaavutit. Utoqqaaguit imaluunniit inuusunneruguit, imaluunniit innarluuteqaruit siusinaartumilluunniit soraarnerussutisiaqaruit angerlarsimaffimmi ikiorteqarsinnaavutit.

Angerlarsimaffimmi ikiorteqartartut amerlanerpaajupput utoqqaat, taamaattoq illit pisariaqartitatit apeqqutaallutik ikiorteqarsinnaavutit, ukiutit apeqqutaanatik.

Inoqutigiittut isertitat tunngavigalugit angerlarsimaffimmi ikiorteqarnermut akiliuteqartoqartassaaq. Taamaalilluni ilissi inoqutigiittut ataatsimut isertitasi tunngavigalugit angerlarsimaffimmi ikiorteqarnermut naatsorsorneqassaaq akiliisassanersutit aammalu qanoq amerlatigisunik. Inoqutigiinni ilaatinneqartut tassaapput, illit aamma katissimasat, aapparisatut nalunaarsorsimasoq imaluunniit inooqatigisaq.

1. april 2017-imiit akigititat tassaapput:

Inoqutigiit aningaasarsiaat akileraaruteqaataasussat kingulliit	Nammineq akiliutit %-inngorlugit	Nalunaaquttap akunneranut nammineq akiliutigineqartartussanut missingiut.
kr. 0 – 130.000	00,00	kr. 00,00
kr. 130.001 – 180.000	35,49	kr. 35,49
kr. 180.001 – 280.000	70,98	kr. 70,98
kr. 280.000 qaangerlugit	106,47	kr. 106,47

 

Isumaginninnermut tunngatillugu iliuusissatut pilersaarummut atasumik angerlarsimaffimmi ikiorteqartaruit, inoqutigiissinni isertitasi apeqqutaatinnagit angerlarsimaffimmi ikiorteqarnermut akiliuteqartassanngilatit.

Akiliutissap naatsorsorneqarnerani angerlarsimaffimmi ikiorteqartumut ataatsimut kommunip aningaasartuuterpiaa aallaavigineqarsinnaavoq, kingornalu nammineq akiliutissaq ”Nammineq akiliutit %-inngorlugit” naatsorsuinermi aallaavigineqarluni imaluunniit ”Aki toqqammaviusoq malillugu Nalunaaquttap akunneranut Akiliut” aallaavigalugu naatsorsorneqarsinnaalluni.

Pisariaqartitsinermik naliliineq
Inuit pisariaqartitaat assigiinngitsuupput angerlarsimaffimmilu ikiorteqartarneq illit inissisimaffinnut naleqqussagaassaaq. Angerlarsimaffimmi ikiorteqarnissamut qinnuteqaruit taamaattumik angerlarsimaffinni naliliisoqarnissaanut alakkarneqassaatit.

Matumani angerlarsimaffiit tamaat isigalugu nalilerneqassaaq aammalu sutigut iliuuseqartoqarsinnaanersoq naliliisoqassalluni, soorlu ikiuinissap annertussusissaa, suussusissaa piffissamillu atuiffiunera. Tamakku tunngavigalugit angerlarsimaffimmi ikiortaasup pisariaqartunik ikiorsinnaavaatit.

Pisariaqartitsinermik naliliineq tunngavigalugu angerlarsimaffimmi ikiortaasoq ikiuuttartussaavoq.

Pisariaqartitat allat
Allatut pisoqartillugu kommunimit ikiorserneqartarsinnaavutit, assersuutigalugu:
• Aputaajaanermut
• Imertaanneqarnermut, tassa illumi imermut attavilerneqarsimanngitsumi najugaqaruit
• Iluaqusersuutinik pissarsissunneqarnernut


Pisariaqartitanik allannguineq
Angerlarsimaffimmi ikiorti pisariaqartitsinernik ataavartumik naliliisartussaavoq, taamaalillutit pisariaqartitsinitit nikerartut tunngavigalugit naleqquttumik ikiorserneqartassaatit.

Pisariaqartitatit annertunerusumik nalilersortikkusukkukkit, angerlarsimaffimmi ikiorti, najukkanni innuttaasunik sullissivik imaluunniit kommunimi utoqqarnik sullissisut attavigiuaannarsinnaavatit.