airplanebooksbriefcase business cogs cross election entertainment fish house law lockmedicalpeopleselfservices socialtax

Kommunerisannuinnaq aalajangersimasunik paasissutissaqarpoq

Kommune toqqaruk
Nalinginnaasumik paasissutissiineq

Tuttu neqaa, amia nassuilu pillugit piniarneqartarpoq. Miluumasoq naasortortuuvoq Kitaata sineriaanerusumi Qaanaallu eqqaani ataasiakkaarlutik ataatsimoorlutilluunniit uumasuusartut.

Kommunerisanni tuttunniarneq pillugu kommunimi immikkut ileqqoreqqusamik peqarsinnaavoq, assersuutigalugu kommunini ataasiakkaani sunngiffimmi piniartut pisatik kalaalimineerniarfimmi tunisinnaaneraat aalajangersarneqarsinnaavoq.

Tuttunniartinnak pisussaaffeqarputit kommunip ileqqoreqqusaata ilisimaarinissaanut.

 

Piniarnermut periutsit
Tuttut aallaasit aamma pisissit atorlugit piniaqqusaapput:
• Aallaasit inuussutissarsiutigalugu sunngiffimmilu piniartunut minnerpaamik .222-tut sulloqqortussuseqassapput
• Aallaasit akiliisitsilluni aallaaniartartunut minnerpaamik .243-tut sulloqqortussuseqassapput
• Kalaallit Nunaanni, Danmarkimi nunanilu allani assingusuni pisissimik piniarsinnaanermut misilitsinermut angusisimaguit aatsaat pisissimik qarsunillu piniarsinnaavutit. Pisisseq Compound-iussaaq (katitigaq / nutaaliaasoq), pisisseq aaqqinneqarsinnaasumik umerfeqassaaq / nalunaaqutaqassaaq qarsullu naqqui aalajangersimasut atorneqartillugit nusutsisinnaassusaa minnerpaamik 45 pundiussaaq (21 kg), qarsullu naqqui mekaniskiusut atorneqartillugit nusutsisinnaassusaa minnerpaamik 55 pundiussalluni (25 kg). Qarsut naqqui aalajangersimasut atorneqartillugit qarsut minnerpaamik 385 grains-nik (25 gram-nik) oqimaassuseqassapput, qarsullu naqqui mekaniskiusut atorneqartillugit qarsut minnerpaamik 425 grains-nik (28 gram-nik) oqimaassuseqassallutik. Qarsut taamaalillutik aalajangersimasumik naqqoqarsinnaapput imaluunniit mekanisk-mik naqqoqarsinnaallutik

Assartuutit motoorillit atorlugit tuttunniarneq inerteqqutaavoq, tuttunniarnermilu qimmit nassaqqusaanatik.

Nunakkut assartuutinik motoorilinnik ingerlatillutit tuttut uumasut qaninnerpaamik 500 meterinik ungasitsigissavatit.

Malugiuk
Tuttumik pissaaguit pisussaaffigivat sapinngisamik piaarnerpaamik taassuminnga toqutsinissaq. Tuttu pissanneqartoq nanineqarnanilu toqunneqanngippat pisussaaffeqarputit Aalisarnermut, Piniarnermut Nunalerinermullu Naalakkersuisoqarfimmut imaluunniit piniarnermut nakkutilliisumut ilisimatitsissallutit.

 

Piniarnermut allagartaq aamma akuersissut

Tuttunniarusukkuit uku piumasaaqaataapput:
• Minnerpaamik 16-ileereersimanissat
• Atuuttumik piniarnermut allagartaqarnissat
• Atuuttumik tuttunniarnissamut akuersissuteqarnissat

Piniarnermut allagartamik qinnuteqarit imaluunniit allagartat nutarsaruk uani

Tuttunut akuersissuteqarnikkut piniarfimmi aalajangersimasumi tuttunik pisaqarnissamut akuersissutaavoq. Tuttunut akuersissut illit kisivit atortussaavat. Tamanna ima paasineqassaaq, allamut tuneqqusaanngilaq imaluunniit allamut tunniuteqqusaanngilaq. Tuttunniartillutit akuersissutip nassarnissaanut pisussaaffeqarputit.

Tuttunut akuersissummik pissarsineq
Tuttunniarnissamut akuersissummik pissarsiniaruit najukkanni innuttaasunut sullissivimmut imaluunniit nunaqarfimmi kommunip allaffianut saaffiginnissaatit.

Ukiaanerani tuttunniarnissamut tuttunut akuersissummik pissarsiniaruit, piniarnermut allagartat 1. maj sioqqullugu akilereersimassavat. Inatsit naapertorlugu 1. maj sioqqullugu piniarnermut allagartap akilereersimanissaa pillugu piumasaqaammit immikkut ittumik akuersissuteqartoqarnissaa periarfissaavoq. Tamannali taamaallaat aqutsiveqarfitsigut pissutsit malillugit pisarpoq. Ukioq piniarfiusumi 2018/2019-mi piumasaqaammit immikkut ittummik akuersisoqanngilaq.

 

Nalunaaruteqartarneq

Tuttuttatit nalunaarutigissavatit. Taamaaliornissamut periutsit marluupput:
• NemID-mik atuisuuguit pisatit Imminut sullinneq atorlugu nittartakkatigut nalunaarutigisinnaavatit
• NemID-mik atuisuunngikkuit pisatit PINIARNEQ-mi quppersagaq atorlugu ukiumut immersuiffissatigut nalunaarsorsinnaavatit, quppersagaq piniarnermut allagartamik tunisinninni ilanngullugu tunniunneqartarpoq nalunaarsukkallu najugaqarfinni innuttaasunut sullissivimmut tunniukkiartussavat.

Pisatittaaq nalunaaruteqarnermi immikkut ittumik immersuiffikkut / immikkut nalunaaruteqarnissami immersuiffissakkut, tuttunut akuersissutivit tunuatigut nalunaarutigisassavatit. Piffissap piniarfiusup naanerani kingusinnerpaamik ullut 14-it qaangiutsinnagit akuersissutit immersugassartaa immersorsimasoq innuttaasunut sullissivimmut imaluunniit nunaqarfimmi kommunip allaffianut utertissavat.

Malugiuk
Ukiup tulliani piniarnermut allagartamik piniaruit, pisatit nalunaarutigissavatit – aamma pisaqarsimanngikkaluaruilluunniit.

 

Pisassiissutit

Tuttuttassat imatut aalajangersarneqartarput agguataarneqartarlutillu:

Tamanut tusarniaareernerup kingorna Piniarnermut Naalakkersuisup tuttuttassat annertussusaat aamma nuna tamakkerlugu agguaanerit aalajangertarpai.

Tamatuma kingorna najukkani KNAPP-t suleqatigalugit nunap immikkoortuini pisassiissutit kommuninit agguataarneqartarput.

Nunap immikkoortuini agguaassineq makitsinikkut imaluunniit qinnuteqarnikkut pisarpoq.

 

Piniarnermi nunat immikkoortui piffissallu piniarfiusinnaasut

Tuttunniarnermi nunat immikkoortut aqqaniliupput (11):
• Qaanaap eqqaani pingasut (3)
• Kitaani arfineq-pingasut (8)

Piniarnermi nunat immikkoortui uani takusinnaavatit www.nunagis.gl

Piniarnermi nunat immikkoortuini piffissat piniarfiit assigiinngitsuusinnaapput. Nunanili immikkoortuni tamani piniarnissamut aallartiffissaq aatsaat piaqqiorfiup kingorna pisarmat, nalinginnaasumik maajimi juunimilu.

 

Allaaserisat attuumassutillit
Aalisarnermut, Piniarnermut Nunalerinermullu Naalakkersuisoqarfik
Imaneq 1A, 701
Postboks 269
3900 Nuuk

Oqarasuaat: (+299) 34 50 00
Fax: (+299) 34 63 55
E-mail: apnn@nanoq.gl
Nittartagaq: www.naalakkersuisut.gl