airplanebooksbriefcase business cogs cross election entertainment fish house law lockmedicalpeopleselfservices socialtax

Piniarnermik aalisarnermillu nakkutilliisut

Piniarnermik aalisarnermillu nakkutilliisut
Piniarnermik aalisarnermillu nakkutilliisuutitanut pingaarnertut siunertaavoq, pisuussutit uumassusillit piujuaannartitsinissamik tunngaveqarluni iluaquteqarnissamut isumannaarinneqataanissaq. Nakkutilliisut piniarnermik aallaaniarnermillu nakkutilliinernik ingerlatsisuupput, taakkununnga ilaallutik kapisilinniarnerup eqalunniarnerullu nakkutiginissaa.

Nakkutilliisut suliassaannut ilaapput aamma piniarnermut aallaaniarnermullu tunngasunut suliassat allat, paasititsiniaanerit soorlu assersuutigalugu Pinngortitaleriffik suleqatigalugu arfanniarnernit, aarrinit, nannunillu pisanik misissorneqarnissaannut misiligutissanik tigusisinnaaneq, kiisalu tuttunik umimmannillu kisitsisarnernut atatillugu suleqataaneq.

Innuttaasutut piniarnermut aalisarnermut allatulluunniit pinngortitamiinnermut atatillugu nakkutilliisunut saaffiginnissuteqarsinnaavutit. Assersuutigalugu makkuusinnaapput:
  • Piniagassanik aalisakkanillu unioqqutitsisumik piniarneq pillugu pasitsaassaqarnikkut
  • Uumasunik napparsimasunik ikilersimasunilluunniit soorlu arferit aniguinissaannik ilimanaateqanngitsunik siumuisoqartillugu
  • Piniagassat pillugit ilitsersuinerit, apeqquteqaatit assersuutigalugu piniarnermut piffissarititaasut uumasullu suussusaasa ilaat malillugit pisassiissutit agguataarneri pillugit

Aqutsiveqarfinni ukunani Upernavik, Uummannaq, Ilulissat, Kangaatsiaq, Sisimiut, Maniitsoq, Nuuk, Ivittuut aamma Ittoqqortoormiit piniarnermik aalisarnermillu nakkutilliisoqarpoq. Pisariaqartitsineq naapertorlugu nakkutilliisut aqutsiveqarfinnut allanut Piniarnermik nakkutilliisoqarnermik aaqqissuussivigineqarsimanngitsunut nakkutilliiartorlutik angalatitaasarput.

Piniarnermut nakkutilliisoqarneq aaqqissuussaanikkut Kalaallit Nunaanni Aalisarsinnaanermut Akuersissutinik Nakkutilliisoqarfiup (KANUAANA) ataani inissisimavoq, ulluinnarnilu allaffissornikkut ingerlatsisuulluni.


Nakkutilliineq
Piffissat eqqissisimatitsiviusut malittarisassallu allat eqqortinneqarnerat isumannaarniarlugu ingerlatsivimmi tamarmi ingerlaavartumik nakkutilliisunit aallaaniarneq piniarnerlu nakkutilliinernik ingerlatsisissapput. Uumasut suussusaasa ilaat malillugit uumasut ataasiakkaat piniagaaffiini nakkutilliinerit annertusineqartarput. Nakkutilliinerit illoqarfiit qanittuini ungasissuinilu ulluinnartumik imaluunniit ulluni arlalinni ingerlanneqarsinnaasarput.

Ilaatigut nakkutilliinerit makkuusinnaapput
  • Piniarsinnaanermut aallaaniarsinnaanermullu allagartat akuersissutillu atuuttuunerinik nakkutilliineq
  • Piffissat eqqissisimatitsiviusut aallaaniarnermullu aalajangersakkat kiisalu piniarnermut, aallaaniarnermut aalisarnermullu tunngatillugu malittarisassat allat eqqortinneqarnerannik nakkutilliineq

Tamakku saniatigut eqqissisimatitsivinnik, nunanik allanngutsaaliukkanik allanillu pinngortitami illersorneqartut eqqarsaatigalugit nakkutilliinernut peqataasarput. Assersuutigalugu innani timmiaqarfiusuni allunaasat innartornermi atugassiat innartornermilu atortut allat inerteqqutaapput, timmissanillu piniarnermi piniutit akuerisaasunik taamaallaat atuinissaq aallaaniarnermut nakkutilliisup isumannaartussaavaa.


Ilitsersuinerit paasititsiniaanerillu
Piniarnermik aalisarnermillu nakkutilliisut sapinngisaq naapertorlugu ilitsersuinikkut paasititsiniaanikkullu ikiuuttassapput kiisalu uumasunik nungutsaaliuinernut pinngortitamullu tunngatillugu suliassanut allanut peqataasassallutik pisortat kiisalu ingerlatsisut erseqqinnerusumik isumaqatigiissuteqarneq naapertorlugu. Uumasut killilersugaasut piniarneqarnerannut atatillugu nakkutilliinermi piniarnermik aalisarnermillu nakkutilliisoq nalunaaruteqartarnermi pisanillu nalunaaruteqarnermi ilitsersuisinnaavoq.


Pisinnaatitaaffii
Piniarnermik aalisarnermillu nakkutilliisoq nakkutilliinernik suliaqartilluni kinaassutsimik uppernarsaatinik nassataqartarpoq, tassaasut kinaassutsimut uppernarsaat.

Piniarnermik aalisarnermillu nakkutilliisoq eqqartuussiviit siumut akuersiseqqaarnagit piniarsinnaanermut aalisarsinnaanermulluunniit uppernarsaammik atuuttumik takutitaqarnissat piumasaqarfigisinnaavaatit.

Nakkutilliinermut atatillugu piniarnermik aalisarnermillu nakkutilliisoq makkununnga pisinnaatitaaffeqarpoq
  • piniarnermut, aallaaniarnermut aalisarnermullu angallatigisannut ikisinnaatitaapput
  • piniarnermut, aallaaniarnermut aalisarnermullu assartuutigalugit angallatinnut ikisinnaatitaapput
  • angallatinni inissiiviusinnaasunut aamma toqqorsivinnut, pisanik inissiiviusinnaasunut isersinnaatitaavoq
  • aalisakkat piniakkallu pisarineqarsimasut kiisalu piniarnermut, aallaaniarnermut aalisarnermullu atortut misissuiffigisinnaallugit
  • inatsisinik unioqqutitsigunarluni pisanik imaluunniit piniarnermut, aallaaniarnermut aalisarnermullu atortunik assiliinikkut video-mulluunniit immiussinikkut nalunaarsuisinnaatitaavoq
  • inatsisinik unioqqutitsilluni pisarineqarsimagunartunik misissugassanik annikinnerusunik uppernarsaatissatut atugassanik tigusisinnaatitaavoq

Piniarnermik aalisarnermillu nakkutilliisoq inatsisinik unioqqutitsisoqarneranik ilimasunnermut up­pernarsaatissatut piniarfinni, najukkani kalaalimineerniarfinni kiisalu tunitsivinni uumassusillit misissugassaannut misiligutissanik tigusisinnaavoq.

Aammattaaq uumasumik qularnanngitsumik pissatamik napparsimasumilluunniit, uumaannassasutut ilimagineqarsinnaanngitsumik, takunnittoqartillugu piniarnermik aalisarnermillu nakkutilliisoq pisinnaatitaavoq uumasoq toqussallugu.


Malugiuk
Piniarnermut aalisarnermillu nakkutilliisuutitap peqqussutaa naammassinngikkukku imaluunniit piniarnermut aalisarnermillu nakkutilliisuutitap suliniarneranik akornusersuiguit akiliisitsissummik kinguneqartinneqarsinnaavoq.
Allaaserisat attuumassutillit
Kalaallit Nunaanni Aalisarsinnaanermut Akuersissutinik Nakkutilliisoqarfik (KANUAANA)
Indaleeqqap Aqq. 3
Postboks 501
3900 Nuuk

Oqarasuaat: (+299) 34 50 00
Fax: (+299) 34 63 60
E-mail: gflk@nanoq.gl
Nittartagaq: www.naalakkersuisut.gl