Sunngiffimmi kapisilinniarneq

Maana qinnuteqarit

Nammineq atugassannik kapisilinniarusukkuit akuersissuteqassaatit, pisatillu Kalaallit Nunaanni Aalisarsinnaanermut Akuersissutinik Nakkutilliisoqarfimmut (KANUAANA-mut) nalunaarutigalugit. Ukiup siuliani sunngiffimmi kapisilinniarnissannut akuersissutaateqarsimaguit pisatillu nalunaarutiginngitsoorsimagukkit, sunngiffimmi kapisilinniarnissannut akuersissummik tunineqarsinnaanngilatit.

Kapisilinniarnermut aqutsinissamik pilersaaruteqarpoq uani pissarsiarisinnaasannik, tassanilu kapisilinniarneq pillugu malittarisassat sukumiinerusumik atuarsinnaavatit: Kalaallit Nunaata imartaani kapisilinniarnermik aqutsinissamik pilersaarut

Nammineq atugassannik kapisilinniarnissamut akuersissutaateqassaatit. Sunngiffimmi kapisilinniarnissamut akuersissummik tunineqarniaraanni piumasaqaatit tullinnguuttut makku naammassineqarsimassapput:

  • Danmarkimi innuttaasutut Kalaallit Nunaanni aalajangersimasumik najugaqassaatit.
  • Nunami allami naalagaaffimmi innuttaasutut Kalaallit Nunaanni aalajangersimasumik najugaqassaatit aamma ukiuni marlunni ataqatigiissumik najugaqarsimassallutit.
  • Kapisilittat tamarmik qassuseriareernerit imaluunniit aalisaammik qissattaammilluunniit kapisilereernerit tamaasa Kalaallit Nunaanni Aalisarsinnaanermut Akuersissutinik Nakkutilliisoqarfimmut (KANUAANA-mut) nalunaarutigineqassapput. Piffissami aalisarfiusumi pisaqarsimanngikkuit aalisariarsimanngikkuilluunniit akuersissutaateqarlutilli, nalunaaruteqarnissat ingerlatiinnassavat – tassa pisaqanngitsoorsimasutut nalunaaruteqartarlutit.
  • Ukiup siuliani kapisilinniarnermut akuersissuteqarsimaguit akuersissutip atulersinnissaanut pisat pillugit nalunaarusiaq Kalaallit Nunaanni Aalisarsinnaanermik Akuersissutinik Nakkutilliisoqarfimmut (KANUAANA-mut) nassiussimassavat. Tamanna aamma pisaqanngitsoorsimanermut atuuppoq.

Kapisilinniarneq aqutsiveqarfinnut sisamanut agguataarneqarnikuuvoq:

  • Kitaata Avannaa (A-p 64°15'-ip avannaa´tungaani)
  • Kitaata Kujataa (A-p 64°15'-ip kujataa´tungaa)
  • Kapisillit (kuummi aammalu kuup paavanit 1000 meterit tungaannut aalisarneq)
  • Kalaallit Nunaata Kangia (sineriaa tamakkerlugu)


Kapisillit kuuani aamma kuup taassuma paavanit 1000 meterisut ungasitsigisumiittut kapisillit nunatta nammineq kapisilerai aamma kapisillit aqutsiveqarfimmi tassani pisarineqartartut Atlantikup kapisiliinik pisassiissutinit aqutsiveqarfinni allani aalisarneqartartunit ilanngaatigineqarneq ajorput.

Naalakkersuisut kapisilinniarnermut piffissarititaasoq KNAPK isumasioqatigalugu kinguliani allaqqasut malillugit aalajangertarpaat.

 Aqutsiveqarfik:   Aalisarnermi piffissarititaasoq: 
 Avannaata kitaani  1/9 - 31/10
 Kujataata kitaani  1/8 - 30/9
 Kapisilinni  1/8 - 30/9
 Kangiani  15/8 - 15/10

Atortut tullinnguuttut makku atorlugit kapisilinniarsinnaavutit:

  • Qassutit
    • Silap pissusaata taamaattoqartissinnaappagu qassutit kapisilinniutit akuttunngitsumik akulikitsumillu napittaajarneqartassapput, pisat atorluarneqarsinnaanissaat ajornerulertussaajunnaarlugit.
    • Qassutit ataatsit 2000-inik nigartallit, nigartai tasillugit minnerpaamik 140 mm-iusut kisiisa atussavatit.
    • Qassutit kapisilinniutit piginnittup aqqanik nalunaaqutserneqarsimassapput. Nalunaaqutsiussat imermit arrortinneqarsinnaassanngillat.
    • Qassutit tissukartittakkat atussanngilatit.
  • Qarsorsamik qissattaammilluunniit
    • Atortut taakku kisimik Kapisillit kuuani aamma kuup akuanit 1000 meterisut ungasitsigisoq angullugu atorneqaqqusaapput.

Sunngiffimmi kapisilinniarnissamut akuersissummik qinnuteqarusukkuit matuma ataatungaani qinnuteqarnissamut immersuiffissaq internet atorlugu immersussavat imaluunniit qinnuteqaammi ilitsersuut malillugu Aalisarnermut Piniarnermullu Naalakkersuisoqarfimmut nassiutissavat. Ikiortariaqaruit kommunerisannut saaffiginnissinnaavutit.

Kapisilinniarnissamut akuersissutaateqarsimaguit pisatillu ukiup siuliani nalunaarutiginngitsoorsimagukkit ukiumi pineqartumi kapisilinniarnissamut akuersissummik tunineqarsinnaanngilatit.

Akuersissut ukiumut pisassiiffiusumut ataatsimut atuuppoq, taamaattumillu ukiut tamaasa akuersissummik nutaamik qinnuteqassallutit. Ukioq pisassiiffiusoq 1. januaarimiit 31. decembarip tungaanut atuuttarpoq. Taamaattorli akuersissutaatit aatsaat akuersissummi allassimasutut ullormiit ukiullu pisassiissuteqarfiusup naanissaata tungaanut atuutissammat eqqaamassavat.

Sunngiffimmi kapisilinniarnissamut akuersissummik qinnuteqarniaruit una tooruk

Ukiup siuliani akuersissuteqarsimaguit ingerlaannaq kommunip akuersissummik tunisinnaavaatit, ukiup siuliani aalisarnerit pillugit nalunaaruteqartarsimaguit. Nalunaaruteqartarsimanngikkuit akuersissummik tunineqarsinnaanngilatit.

Aatsaat siullermik kapisilinniarnissamut akuersissummik qinnuteqarniaruit qinnuteqaat immersoriarlugu Aalisarnermut Piniarnermullu Naalakkersuisoqarfimmi Akuersissutinut immikkoortortaqarfimmut nassiutissavat.

Qinnuteqaatinnut ileqquusutut ullut 14-t ingerlaneranni akissutisissaatit. Qinnuteqaativit suliarineqarnissaanut paasissutissat amigarpata attavigineqarumaarputit.

Qinnuteqariaatsimut apeqqutissaqaruit Aalisarnermut Piniarnermullu Naalakkersuisoqarfimmut attaveqarnissannut tikilluaqqusaavutit.

Kapisilittatit tamaasa Kalaallit Nunaanni Aalisarsinnaanermut Akuersissutinik Nakkutilliisoqarfimmut (KANUAANA-mut) nalunaarutigisassavatit, TAMATIGUT napittaajaareernermi imaluunniit qarsorsanik qissataammilluunniit pisaqarsimanerit kingorna.

Nalunaaruteqartassaatit pisaqarsimanngikkaluaruilluunniit.

Piffissap aalisarfiup naaneraniit kingusinnerpaamik ullut 14-it kingorna KANUAANA-mut nalunaaruteqarsimanngikkuit ukiup tullianut akuersissummik tunineqarsinnaanngilatit.

Una tooruk kapisilittatillu uani nalunaarutigalugit

Uannga allanneqarpoq: Aalisarnermut immikkoortortaqarfik

Aalisarnermut, Piniarnermullu Naalakkersuisoqarfik
Imaneq 1A, 701
Postboks 269
3900 Nuuk

Oqarasuaat: (+299) 34 50 00
Fax: (+299) 34 63 55
E-mail: apn@nanoq.gl
Nittartagaq: www.apn.gl
Innuttaasumut

sullissivik.gl-imut tikilluarit

Sullissivik Innuttaasumut isilerputit. Suliffeqarfiutilimmut nuunniaruit, qulaani ‘Suliffeqarfiutilimmut’ toqqassavat.