Angajullerni misilitsinnerit

Meeqqat atuarfianni angajullerni atuarneq arlalinnik allattariarsornikkut oqaluttariarsornikkullu misilitsinnernik naggaserneqassaaq. Tamatuma saniatigut atuartut aalajangersimasumik qulequtsiilluni suliamik suliaqassapput.

Ukiup atuarfiusup ingerlanerani ukiakkut upernaakkullu faginilu sorlerni misilitsittoqassanersoq atuarfimmit nammineq aalajangerneqassaaq. Ukiakkut upernaakkullu misilitsinnermi naggataarutaasumik misilitsinneq qanoq innersoq atuartunit misigineqarsinnaavoq.

Meeqqat atuarfianni 10. klassimi atuartut naggataarutaasumik allattariarsornikkut oqaluttariarsornikkullu misilitsinnerit apriilip, maaji juunillu qaammataanni ingerlanneqartarput, aalajangersimasumillu qulequtsiilluni suliamik suliaqarneq januaarip februaarillu qaammataanni ingerlanneqartarluni. Misilitsinneq atuartut atuartitaanerisa sungiusimasaasa ingerlanerisut ingerlanneqassaaq takutissallugulu anguniagassatut angusassaat qanoq angusimatigineraat.

Atuarfinni assigiinngitsuni 10. klassini atuartut fagini sorlerni misilitsissanersut pillugit takussutissamik, Ilinniartitaanermut Aqutsisoqarfimmit Naalakkersuisoqarfiup ataaneersumit kingusinnerpaamik 1. november nassiussisoqassaaq.

Meeqqat atuarfianni nuna tamakkerlugu atuartitsissutit sisamat allattariarsornikkut misilitsitsissutaasarput:

• kalaallisut
• qallunaatut
• tuluttut
• matematikki
  
  

Allattariarsornikkut misilitsissutaasut sisamat saniatigut, atuartitsissummik ataatsimik ilanissaat Ilinniartitaanermut Aqutsisoqarfimmit aalajangiunneqarsinnaavoq, assersuutigalugu upperisarsiorneq filosofilu, inuiaqatigiilerineq imaluunniit pinngortitalerineq.

Allattariarsornikkut misilitsinnermi piginnaasanik allattariarsornikkullu allatigut misilitsissutaapput.
Oqaatsinik atuartitsinermut tunngatillugu allattariarsornikkut misilitsinnerussaaq, matematikkimilu kisitassat eqqarsaatigisariassaassallutik.

Piginnaasanik misilitsinneq
Piginnaasanik misilitsinnermi atuartup atuartitsissutini piginnaasani takutissavai, assersuutigalugu piginnaasaqarfigissavaa:

• allanneq
• killiffilersuineq
• oqaaseqatigiiliorneq
• qivernernik uuttuineq
• avitanik kisitsineq
  
  

Piginnaasanik misilitsinnerit akunneq ataatsimik sivisussuseqartarput.

Allattariarsornikkut misilitsissutit allat
Fagit apeqqutaatillugit, taamatut misilitsinnermi 2 tiiminiit 4 tiiminut atorneqartussanngorlugit misilitsittoqartarpoq.

Oqaatsinik atuartitsinermi allattariarsorluni misilitsinneq marlunngorlugu avinneqartarpoq:

• oqaloqatigiinnermi nalunaaquttap akunnerata affaanit ilivitsumut. Atuartut suleqatigiillutik qulequttat assigiinngitsut oqaloqatigiissutigalugit taamaalillutik suliassat qanoq paasisariaqarnersut qulequttallu sunik imaqarsinnaanersut isummersoqatigiissallutik
• immikkoortup aappaani allassapput atuartullu tamarmik immikkut qulequttami qulequtarlu pillugit allaaserinnissallutik
  
  

Allattariarsornikkut misilitsinnerit ullormi aalajangersimasumi nalunaaquttap akunnerini aalajangersimasuni ingerlanneqartarput.

Naggataarutaasumik misilitsittussat ikinnerpaamik pingasoriarlutik oqaluttariarsornikkut misilitsissapput. Pinngitsoorani misilitsinnerit saniatigut atuartup nammineerluni atuartitsissutip misilitsiffiginissaanut nammineq aalajangersinnaavoq. Assersuutigalugu atuartitsissutini mernguernartuni atuartitsissutaasinnaavoq. Atuartup allamiut oqaasii pingajuinik toqqaasimasup atuartitsissut misilitsissutigissallugu toqqarsinnaavaa.

Oqaluttariarsornikkut misilitsinnernut tunngavittut atuartut isumasioqatigalugit ilinniartitsisut pisassiissutiliussapput, atuartut 10. klassimi atuarnerminni suliarisimasaannut suliassaqarfinnut qulequttanullu takutitsisussat. Pisassiissutit atuartunut agguaanneqassapput. Agguaanneqarnerisigut misilitsinnermi qulequttat suut pineqartussaanersut atuartunit ilisimaneqariissasut qulakkeerneqassaaq.

10. klassimi atuartut januaarip imaluunniit februaarip qaammataani aalajangersimasunik qulequtaqarlutik suliaqartinneqassapput. Atuartut ilinniartitsisullu ataatsimoorlutik pingaarnermik qulequtassarsiussapput. Tamatuma kingorna atuartut suleqatigiikkaarlutik qulequttat ataanniittunik toqqaassapput sapaatip-akunnerata ingerlanerani sulinerminni najoqqutassaminnik.

Ulluni atuarfiusuni tallimani atuartut suliaqarnerminni suliassaasa akissutissaat misissussavaat kiisalu paasisat nutaat aallaavigalugit saqqummiussassaliussallutik. Aalajangersimasumik qulequtaqarluni suliaq naammassippat, oqaluttariarsornikkut misilitsinnermi saqqummiunneqassaaq.

Saqqummiussereernerup kingorna atuartut karakteerilerneqassapput. Aalajangersimasumik qulequtaqarluni suliap oqaaseqaataa karakteerilersorneralu allaganngorlugu nalilersorneqassaaq.

Atuartoq napparsimalersimappat taamaammallu naggataarutaasumik misilitsinnerni peqataasinnaanani, angajoqqaat atuarfimmut piaartumik tamatuma nalunaarutiginissaanut aamma nakorsap oqaaseqaataanik uppernarsaanissaannut akisussaapput.

Napparsimasimasimasunut allattariarsorluni misilitsinnissamut periarfissaqarpoq, kingusinnerpaamik misilitsinnerit nalinginnaasut sap. ak. 2-3-nik kingoqqullugit ingerlanneqartarput.

Oqaluttariarsornikkut misilitsinnissami napparsimasimagaanni ukiup atuarfiusup tullissaata aallartinnerani misilitsinnissaq periarfissaavoq.

Meeqqat atuarfianni naggataarutaasumik misilitsinnerit pillugit atuartoq, angajoqqaat imaluunniit angajoqqaatut akisussaatinneqartut allakkatigut naammagittaalliuteqarsinnaapput.

Naammagittaalliutigisinnaavasi:

• misilitsinnermi misilitsissutit
• misilitsinnerup ingerlannera
• karakteerit
  
  

Misilitsinnerit kingorna kingusinnerpaamik sapaatit-akunneri sisamat imaluunniit karakteerit nalunaarutiginerisa kingorna kingusinnerpaamik sapaatit-akunneri sisamat qaangiuppata naammagittaalliuut atuarfiup pisortaanut tunniunneqarsimassaaq.

Tamatuma kingorna naammagittaalliuut atuarfimmit Ilinniartitaanermut, Kultureqarnermut Ilageeqarnermullu Naalakkersuisoqarfimmut nassiunneqassaaq, tassanngaanniit aalajangiisoqassammat.