Akisussaaffiit immikkut ittut

Meeqqat atuarfianni atuartitsinerup nalinginnaasup saniatigut arlalinnik suliassaqarpoq akisussaaffinnillu immikkut ittuusunik. Taamaappoq atuartut pitsaanerpaamik atuartinneqarnissaat qulakkeerniarlugu.

Suliat akisussaaffiillu immikkut ittut tassaasinnaapput:

• Atualersussanik ilinniartitsinermi siunnersorti
• Immikkut ittumik atuartitsinermi siunnersorti
• Atuarfimmi siunnersorti
• Atuarfimmi inerisaasoq
• Immikkoortortami aqutsisoq
• Perorsaanermi ikiorti
• Atuartitsissutini siunnersorti
• Atuarfimmi atuagaatilerisoq

Atuarfimmi sulisut tassaapput akisussaaffinnik immikkut ittunik suliaqartut.

Siunnersortit meeqqat atualersussat pillugit meeqqerivinni perorsaasut qanimut suleqatigaat, meeqqerivimmit atuarfimmut ikaarsaarnerup oqinnerpaamik pisarnissaa anguniarlugu.

Siunnersortit atuartut immikkut ittumik atuartinneqartut pillugit angajoqqaanik, ilinniartitsisunik, PPR-mik (Perorsaanermik tarnip pissusiinillu siunnersuisarfik), atuarfiup aqutsisuinik aamma oqartussaqarfiit assigiinngitsunik suliallit suleqatigiiffiannik qanimut suleqateqartarput, immikkut ittumik atuartinneqartut tapersersorneqarnissaat ikiorserneqarnissaallu anguniarlugit.

Atuarfimmi siunnersortit klassini annerni atuartut suliffissat ilinniarfissallu tungaatigut periarfissarsiornerini ikiuuttarput, atuartut meeqqat atuarfiata kingorna ingerlariaqqinnissaannik siunnersuisarnissaq anguniarlugu.

Atuarfimmi inerisaasut atuarfimmi perorsaanikkut ineriartorneq pillugu atuarfimmi aqutsisunik suleqateqartarput, atuarfiup sulisullu perorsaanikkut ineriartortuarnissaat anguniarlugit.

Atuarfiit annerit immikkoortortanut agguataagaapput, ilaatigut atuartitaanermi agguataarinerit alloriarfiit pingasut malillugit, immikkoortortamilu aqutsisut atuarfimmi aqutsisut sulisullu allat akornanni attaveqaataapput.

Perorsaanermi suleqataasut meeqqanut inuusuttuaqqanullu atuartuusunut sunngiffimmi neqeroorutinik kiisalu inuusuttunut inersimasunullu unnukkut atuartitsinermi neqeroorutinik suliaqarput.

Atuartitsissutini siunnersortit atuartitsissutini ataasiakkaani atuartunik ilinniartitsisunillu siunnersuinermik suliaqarput.

Atuarfinni atuakkanik atorniartarfilinni atuakkanik atorniartitsisartoqassaaq atuartunut sulisunullu atuakkanik atorniarnerini ikiuuttussamik, atuartut sulisullu atuagassaannik paasissutissaannillu ujartuinerini ikiuunnissaq anguniarneqarpoq.