Eqqumiitsuliornermut Aningaasaateqarfik

Eqqumiitsuliortutut suliallit suliaminnik suliniutiminnillu naammassinninnissaminnut Eqqumiitsuliornermut Aningaasaateqarfimmit aningaasaliissutigisartagaannik Kalaallit Nunaanni najugallit qinnuteqaateqarsinnaapput.

Eqqumiitsuliornermut Aningaasaateqarfik marlunnik tapeeriaaseqarpoq:

• eqqumiitsuliornikkut sulialinnut tapiissutit
• eqqumiitsuliornikkut tapiissutit

Eqqumiitsuliornikkut tapiissutit
Eqqumiitsuliornermut Aningaasaateqarfik eqqumiitsuliortunut eqqumiitsuliornermut tapiissutinik qinnuteqartitsinissamik periarfissaqartitsivoq. Eqqumiitsuliortut sammisatik suliniutitsillu naammassinissaanut tapiivigineqarsinnanngorlugit.

Eqqumiitsuliornermut Aningaasaateqarfik aningaasaliissutigisinnaasaannut makku qinnuteqarsinnaatitaapput:

• Inuit ataasiakkaat
• Kattuffiit
• Suleqatigiit
• Pisortat suliffeqarfiutaat

Tapiissutit pingaarnertut inuussutissarsiutigalugu eqqumiitsuliortunut nunatsinni najugaqartunut pilersitsisartunullu tunniunneqarnerusarput. Tassunga tunngatillugu inuussutissarsiutigalugu eqqumiitsuliortoq eqqumiitsuliornerit ilaannik ilinniagaqarsimasuuvoq misilittagartuujullunilu.

Tapiissutit suliniutinut allanut eqqumiitsuliornermi qaffasissumik pitsaassusilinnut aamma tunniunneqarsinnaapput. Makkununnga tapiissuteqartoqarsinnaanngilaq:

• Sammisanut qinnuteqartup nalinginnaasumik missingersuutaasa iluanni akilerneqarsinnaasutut naatsorsuutigineqartunut.
• Sammisanut qinnuteqarsinnaanermut piffissaliussap nalaani aallartinneqareersimasunut, matumani utertitsisoqarnissaa pineqarsimanngippat.
• Nittartakkanik pilersitsinermut ingerlatsinermullu.
• Ilinniarnernut pikkorissarnernullu.
• Sakkunik, atortunik, nipilersuutinik, pequtinik qarasaasianik softwarenillu pisinermut, taamaattoq imm. 2. takuuk.
• Saqqummersitseqqinnernut, atuakkat cd-llu ilanngullugit
  Sakkunik atortunillu pisinermut tapiisoqarsinnaavoq, tamanna suliaqarnermut imaluunniit suliap suliarineqarneranut aalajangiisuulluni pingaaruteqarpat.

Una toorlugu qinnuteqarnermi maleruagassat atuarsinnaavatit.

Qinnuteqaammik nassiussineq akeqanngilaq.

Tapeeriaaseq qinnuteqarfissat toqqarniaerukku, tapeeriaatsit assigiinngissutaat atuaqqaarsinnaavatit, taamaasillutit qinnuteqarnermi immersugassaq eqqortoq qinnuteqarfissiani toqqassavat.

Eqqumiitsuliornikkut tapiissutinik qinnuteqarusuppit, qinnuteqarnermi immersugassaq immersoriarlugu takussutissiallu pisariaqartut kakkiussinnarlugit qinnuteqaatit nassiutissavat.
Takussutissiat pisariaqartut ukuusinnaapput:

• suliniummik allaaserinninneq
• suliniummi peqataasut pillugit paasissutissat
• isumaqatigiissutit
• aningaasartuutissatut missigersuut
• Suliniummut pingaarutillit takussutissiat pisariaqartut allat ilanngunneqarsinnaapput

Eqqumiitsuliornermut aningaasaateqarfimmut qinnuteqaatit Sullissivik aqqutigalugu nassiunneqartarput. Qinnuteqaatit nassiukkukku, qinnuteqaatip tinguneranut uppernarsaammik nassiussiffigineqassaatit.

Eqqumiitsuliornermut aningaasaateqarfiup qinnuteqartutut allattorsimasuutigilerniarlutit, paasissutissat ilinnut tunngasut nalunaarsussavai. Qinnuteqaativit suliarineqarnissaanut paasissutissat tunniussatit pisariaqarput, sullinneqarnernilu pisariaqalissappat attaveqarfigineqarsinnaaniassagavit.

Qinnuteqarfiup piffiani illit, suliffeqarfiutivit assigisaaluunniit Kalaallit nunaani aaliangersimasumik najugaqarnera uppernarsassavat.

Qinnuteqaativit suliarineranut siunnersuutit pitsaasut:
Suliniut naatsumik ersarissumillu qinnuteqaasiarissavat. Tapiissutinik qinnuteqarnerni pingaaruteqarpoq suliniummut allaatiginninnerit paasiuminarsagaassasoq, suliniut sumut tunnganersoq suliniullu sooq pingaaruteqarnersoq ersarissumik Eqqumiitsuliornermut aningaasaateqarfimmut paasissutissiissutigissavat.

Aningaasaateqarfik tapiissuteqassagaluarpat ersarissumik eqqortumillu tapiissutit qanoq annertutigissanersut paasissutissiissutigilluassavat. Suliniut annertuppat aningaasaateqarfinnullu allanut tapiissutinik qinnuteqarsimaguit, qinnuteqaasiornerni suliniut agguarukku iluaqutaassaaq.

Eqqumiitsuliornermut aningaasaateqarfiup siunertaa, ilinnut suliniummullu piumasaqatai pingaarnerpaavoq paasilluarsimassagitit.

MitID-qarpit, eqqumiitsuliornermut tapiissutinut qinnuteqarnermi immersugassaq elektronikkikkut immersorsinnaavat, takussutissiallu pisariaqartut kakkiullugit, taamaasillutit attaveqaatitigut ingerlaannaq qinnuteqaatit nassiutissavat.

NemID-mik peqanngikkuit qinnuteqarnissamut immersugassaq immersoriarlugu allanik pappialanik pisariaqartunik kakkiussillutit uunga nassiussissaatit: kultur@nanoq.gl

Una toorlugu eqqumiitsuliornikkut tapiissutinut qinnuteqarnermi immersugassaq aasinnaavat.

Malugiuk
Qinnuteqaatit fax-ikkut nassiussinnaanngilat.

Suliamik paasisimasallit eqqumiitsulioriaatsimi ilisimasaminni qinnuteqaatinik tiguneqartunik nalilersuissapput aammalu tapiissutinik agguaassisarneq, matumani tapiissutit angissusiat, ilusiat piffissarlu tapiissuteqarfiusoq pillugit Eqqumiitsuliornermut Aningaasaateqarfimmi siulersuisunut inassuteqaasiussallutik.

Sulianik paasisimasalinnit inassuteqaatit tunngavigalugit siulersuisut tapiissutinik tunniussissapput. Suliamik paasisimasallit inassuteqaataannut siulersuisut pisussaaffeqanngillat.

Naatsorsuutigissavat qinnuteqaativit suliarineqarnera tiguneqarneraniit sapaatit akunneri ikinnerpaamik 6-it qaangiuppata aatsaat piareerneqarluni akineqarsinnaammat. Taamaattumik qinnuteqaatinnut tunngatillugu apeqquteqarfigineqarnissat naatsorsuutigissavat aammalu aningaasanik atuinissaq eqqarsaatigalugu qinnuteqaativit piffissaagallartillugu nassiunnissaa isumagissavat.

Qinnuteqaammi aningaasartuutissanut missigersuut allannguuteqassappat allattoqarfik nalunaarfigissavat.

Eqqumiitsuliornikkut tapiissutinik suliniummut tapiiffigineqarsimaguit, naatsorsuutit atsiornikut nassiutissavatit.
Suliniutip naammassinerata kingorna, kingusinnerpaamik qaammatit pingasut qaangiunnerisigut naatsorsuutit atsiornikut Eqqumiitsuliornermut Aningaasaateqarfimmut nassiussinissannut pisussaatitaavutit.
Suliniummut tapiissutit kr. 150.000 ataappagit, illit tapiiffigineqartoq naatsorsuutit atsiornikuusatit nassiutissavatit.
Illit tapiiffigineqartoq atsiornikkut uppernarsassavat naatsorsuutit eqqortuusut, aningaasanik aqutsisimallutit tapiissutillu siunertamut atorneqarsimasut uppernarsassagakku.
Suliniut allanit aningaasaateqarfinniit tapiiffigineqarsimappat, suliniutip tapiiffigineqarsimaneranut takussutissiamik naatsorsuutinut ilaasumik nassiussissaatit.

Suliniummut tapiissutit kr. 150.000 sinnerlugit tapiiffigineqarsimaguit, naatsorsuutit kukkunersiuisumit naalagaaffimmit akuerineqartumit nalunaarsorneqartumilluunniit kukkunersiorneqarsimassapput.
Naatsorsuutit illit tapiiffigineqartumit kukkunersiuisumiillu atsiorneqassapput.
Naatsorsuutit imarissavai, aningaasat isertitat, aningaasartuutit aammalu aningaasat ataatsimoorussamik inerneri.
Eqqumiitsuliornermut aningaasaateqarfiup allattoqarfiata qaqagukkulluunniit paasissutissanik pingaarutilinnik tapiissutinik illit tigusisoq nassiussinissarnut piumaffigisinnaatitaavaatit.
Paasissutissanik pingaarutilinnik naatsorsuutinilluunniit nassiussinissarnut itigartitsisimaguit, tapiissutit akuerineqartut tamakkiisumik ilaannakortumilluunniit uterteqquneqarsinnaapput.

Tapiissutisiarisimasatit tamakkiisumik imaluunniit ilaannakorlugit utertinneqarnissaat pisinnaavoq, ima pisoqarsimappat:

• Illit tapiiffigineqartoq, tapiiffigineqarnissamut piumasaqaataasut naammassisinnaajunnaarukkit.
• Illit tapiiffigineqartoq, tapiissutitut akuersissutigineqartunut piumasaqaatigineqartut naammassisinnaajunnaarukkit.
• Illit qinnuteqartoq, eqqunngitsunik paasissutissiisimaguit.
• Illit tapiiffigineqartoq, paasissutissanik pingaarutilinnik nassiussinissamik itigartitsisimaguit, taakkununngalu naatsorsuutit ilaapput.

Eqqumiitsuliornermut aningaasateqarfimmiit aaliangerneq allaffissornermi pisortanut / oqartussanut allanut naammagittaalliutigisinnaanngilat, eqqartuussivimmulli ingerlateqqissinnaavat.